Раиса Кемайкина

Раиса Степановна Кемайкина (Маризь Кемаль) чачсь 1950-це иень умарьковонь 13-це чистэ Чаунзабуень Вишка Маризьвелесэ. Тосо 1965-це
иестэ прядсь кавксо класст, мейле кавто иеть тонавтнесь Покш Маризьвелень школасо. Н.П. Огарёв лемсэ Эрзянь-мокшонь госуниверситетэнь филфаконть прядомадо мейле зярыя иеть тонавтсь тиринь велень школасо. 1975-це иень кизна тусь эрямо Саран ошов. Кавто иень перть ульнесь «Эрзянь правда» газетань корреспондентэкс. Мейле сисем ды пель ие важодсь А.С. Пушкин лемсэ ловнома кудосо. 1985-1988-це иетнестэ – «Сятко» журналсо поэзиянь отделэнь ветий. 1989-це иестэ саезь 2009-це иес «Чилисема» журналонь ответственной секретарель.

Топавтсь ды топавты общественной тевтькак. 1989-це иестэ ульнесь «Масторава» вейсэндявксонь теицятнестэ вейкекс ды сонзэ васень
секретарекс. Теекшнесь «Эрзява» авань движения. Пурнызе ды ветясь «Ламзурь» фольклорно-этнографической ансамблянть. Сёрмады эрзянь
раськень койде, культурадо, кемемадо пшти статьят. Печатави «Чилисема», «Сятко» журналтнэсэ, «Эрзянь мастор» газетасо.

Башка книганзо:
«Сынь ульнесть эрзят» (1991), «Ёвксонь кужо» (1993) (неть кавто пусмотнень пурнызе Р.С. Кемайкина), «Лавсь» (1988), «Штатол» (1994),
«Вечкевикс морот» (2003) (пурныцясь Р.С. Кемайкина), «Ашо нармунть» (2007), «Кортатано эрзякс – говорим по-эрзянски» (2012), «Масторов
нолдасынек сюкпрянок» (2013), «Котова таргазь монь палям…» (2019) (Л.Ф.
Игнатьева марто вейсэ), «Штрихи времени» (2023).

Россиянь сёрмадеень Союзонь член (1996).
Мордовия Республикань заслуженной поэт.