Зярдо эри седейсэть вечкема

Зярдо эри седейсэть вечкема, –
Эрямот пешти сы шкас кемема,
Теке лиякс неезевить сельметь,
Сэрей мельть оймепотмозост вельмить.

Тон анокат мастор кутмордамо,
Арасть теть а пирявкст, а кардамот.
Тундонь ёжот чадыведекс чуди,
Сыргозтьсы эрьватань, кие уды!..

Зярдо вечкемась тонь потсо кулы,
Седеенть вельтясы кельме кулов,
Ойменть матрасы а кандовиця сталмо,
Мерят, эрямсто каидизь калмос.

Мезесь истя куловты вечкеманть?
Мезесь истя лоскавты кемеманть?
Сынь каладыть сэпей манчемадо.
Сынь лоскадыть ялгань миемадо.