Мастя

Ашо вельтявкс ало уды виресь,
Чивалгомась манейстэ якстерди;
Ванта, ванта: ловонь някась «иредсь»,
— Эли алкукс сонгак тундонть терди?!
Вай, тундо, ёжонь витий, мазыйне!
Кода эйсэть, дугай, учотано!
Кадык зярс якшамот, даволт зыйнить,
Киштезь-морсезь теленть ильтятано.
Тейтерьпингень морот, истят питнейть,
Оев сюкорот, тантей пачалксеть...
Латопрятне тюрьсэ кольгить-петнить,
— Тундось теленть кочкарянзо чалгси.
Чись яла рашты, чоподась туи,
Апаронть мартонзо тулкадьсынек:
Эрзянь койсэ нецей-инегуенть
Мастянь толпандясо пултасынек!