Ванятка и сявась

Ванятка кизонь каникулатнень ётафнесыне велеса атянц мархта бабанц пяле. Тяса сонь лама кельгома тевдонза: ялганзон мархта якай калонь кундама, арни велосипедса, налхкси футболса. А нинге дразнесесы Яшка атянь Манька сяванц. Вестьке тяфтак аф ётай ваксканза: то кяленц няфтьсы, то мезьсовок ёрдай лангозонза. Сявась сиреня ни, машни дразняйхнень лангс и лац мяляфнесыне обжаензон. Тонафтолезе зарник-цёранять, да пиксоц перяфкста ичкози аф нолясы.
Фкя шиня Ванятка кода и фалу, аф пелезь, ётась сявать малава. Пильгалонза повсь байдек, кеподезе и ушедсь сюруть дразнямонза, ну-ка, кле, сатомак! Сявась стясь фталце пильгонзон лангс и вов-вов няфтьсы, кие тяса азорсь. Ванятканди весялаль, сяс мяльсонзонга ашель ёрдамс байдеконц. Сявась сяшкава кяжиясь, нльне сязезе пиксонц. Врьгятсь Ваняткань лангс. Цёранясь ласьки ков няихть сельмонза, сявась мельганза,  фталост качамкс кеподсь пульсь. Ванятка юпадсь перяфксть вельф Митька щенять садняс и куцсь марлють пряс. Сяшкава сизесь, цють ваймоц тарксевсь. Ёню жуватась курокста музе обжаенц. Ярхцсесь-тись тишеняда и мадсь марлють алу ваймама.
Шись кармась саворне валгома. Ваняткань мольсь мялец нюрьксемс тарадть лангса. Кармась юватькшнема. Яшка атя тя пингть вешендезе сяванц. Сембе васттнень ётазень – косовок аш. Кульсь вайгяль, кона вятсь Митя щенять садняс. Няйсы, Ванятка шуфта пряса куку лаца ащекшни, а сявац алува ваймоси. Яшка сотозе Манькань шуфтти и валхтозе цёрокшть. Ся эстокиге ворьгодсь куду. Бабанцты пеняцясь, кле, оду аф саян вели. Но кизода меле ни тага тясоль.