Учительти

Цинняй козк пайгонясь-звоноксь,
Сайхть школав тонафнема иттне.
Учительсь ушедсы урокть,
И ушедыхть аф тёждя шитне.

Учительсь сембонкса ризнай,
Сай куду, вайгялец мянь кашкомф,
Катк иттне кельгсазь шачем крайть,
И араламонзовок маштольхть.

Учительсь содай тевонц вельф.
Ульсь, меленц колсезь Петя, Ваня.
Тетрадьснон ванонды веньберьф,
Ризнась, сонць мезе тись аф стане.

И вешендсь кизефксти ответ,
И макссесь иттненди эсь виенц.
И содаецка ашель, щять,
Мзярда кудонь тефнень тиендсь.

Иднятне кассть, тусть эсь кигаст,
И арасть сембе пара ломанькс.
И тяни: кона сёра касфтсь,
А кона сонць иднят ни тонафтсь.

Вов Сёма флотса инженер,
А Нина цебярь копшат пици.
А Коля сембонди пример -
Пяк лац сон аралай границать.

Синь весть учительть аф юкстайхть,
Сюкпря эсь сёрманясост азыхть,
И гайфнихть, ширезонза сайхть,
И мазы панчфта пусмонь казихть.

Учительсь тонафнемост маштсь,
Аф визькс, тись семботь, мезе ёрась,
Эрь тонафтф идсь - катф тяште мяштьс.
Аш павазуфт учительть коряс!