Тялонь куку

Витянь щятяц мадсь илядьбяли куфкснезь, лофтана шамат. Васенда мольсь ваксозонза щавась, кизефтезе:
– Мезе мархтот, Митрей?
– Кельмофтевонь, улема. Чайня эжделеть. Мзярс щавась срхкафтозе плиткать, мзярс ведь кайсесь, атясь матодовсь.
Витя васенда тянь лангс мяльге изь шарфта. Щятяц сиреняль ни, сидеста сярятькшнесь. Аньцек шобдава соньге сявозе кодама-бди седиень суски таколдома, мзярда няезе, кода щятянц перьфке шарондыхть щавац, тядяц. Сон тонадсь ни: мзярда стяй, шрать лангса лофцське ащи, вайса ватьф копшаняське... А тяни мезьге ашель.
– Мезе мархтот, Митрей?
– Аляй, азк мезце сяряди?              
А Витянь щятяц бта афи кулезень аватнень. Матфоль – лофтана. Апак нарак улоц вельф вяри кепотьфоль. А ваймонц тарксезе стакаста, кода-бди нльне крназь.                      
– Тядяй, – пшкядсь Витя,– щятязе кулось?
– Ворьть, шяйтан лефкс! – машнезь и нльне кяжиста ювадсь тядясь. – Тят каркна, матт.
Щавать ня валхне бта сргозьфтезь, сон нльне аердсь щятять ваксста, сияк нотфтазе ожада Витянь тядянцка:
– Месть тон, Проса?.. Мезенкса ёмлась мувору?
Сонць эстокиге аськолдась Витянь малас, вадердазе прянц, кядьта вятезе шрать ваксс, ёразе ётафтомс валда кудти, лоткась...
– Тонга, Витя, пращак щятяцень мархта, пади, афи няйсак оду, – пшкядсь тошказне.
– А коза щятязе туй? — тядянц лангс варжакстсь Витя.
– Туй ичкози... Врачкясь сашендсь... Корхтай...– и шарфтсь эсь тядянцты: – Ащек аф ламос алязень ваксса. А мон молян вятьса шабать шабратненди, завтракафтса.
Витянь тядяц эряскодозь, кода-аф кода щазе цёранц. Пялес ласькозь вятезе сонь Проса щакать шири.
– Ватт мельганза, – пшкядсь и лиссь кудстонза.
Тяса Витя содазе: мзярс сон утцесь, пялост сашендсь врачкясь и азозе, бта щятяц курок кулы. И сонь кандсазь калмотненди...
Витя афи ванць инголенза путф кружкаса лофцть лангс. Тейнзовок пачкодсь кудонь ризфсь. Васенда тусть сельмоведенза, сяльде оцю вайгяльхть аварьгодсь. Проса щакаське мес-бди афи басясь, аньцек корхнесь вакссонза:
– Тят кирде ризф потмосот. Авартть. Сельмоветтнень мархта ризфсь сяда курок лиси...
А Витя ня валхнень афи марязень. Сонць авардсь и сияк лятфнесь, кода нинге аф сяшкава кунара, кизонда, сон якась щятянц мархта маластонь  вирьбулоняв.  Щятяц  корхнесь:
«Кульсак, унок, кода кукусь кукай? Тейнек мархтот сядонь киза луви...» – «А мес кукай?» – эста нинге кизефтезе Витя. «Эрь кукамац – тя тейнек тифтень киза... Э-э-э, да мон нинге тонь рьвяяфтте, тоньге шабатнень мархта тишенкса карман сашендома...»
Проса баба стясь шабра цёрокшть ваксста, ушедсь пянакудонц инголе пульхкома. А Витя апак учсек кодак комоти, пальтафтома-вазьфтома ласькозь лиссь шабрань кудста, ласьксь эсь вальмалозост и сембе вийса ушедсь юватькшнема: «Ку-ку!»
Эхи повсь эста цёраняти тядянц эзда! Пилензовок палсть, озама вастоцка. А мзярда мольсь щятянц лазксонзон мельге, сон афи кулезень явсематнень-ольксематнень, кяжиста лятфнезе ся кукуть, кона, улема, васькафнезь лувсь кизот щятянцты.