ТОНАФНИ ПЕНСИОНЕР

НАЛХКИХНЕ:

В о л о д я – нилеце классонь тонафни.

М и х е й – Володянь атяц.

П е т р а – Володянь аляц.

М а р и я  И в а н о в н а – учительницась.

Л и я   ш к о л ь н и к т.

ВАСЕНЦЕ КАРТИНАСЬ

Велень куд. Володя озаф шрать ваксс, инголенза келептьфт учебниконза, тетраденза, 
сонць ваны вальмава. Михей атя озаф пянакудть инголи, лакси байдеконя.

В о л о д я (куфкстазь). Ялгане ульцяса налхксихть, а мон уроконень пялеснонга 
ашине тие. (Михеенди.) Атяй, пади, нолдасамак ульцяв?
М и х е й. Нолдалихтень. Аньцек ванды тага “кафтт” кандат, тага аляцень шнанц 
таньфонц варжасак. Тонафнек…
В о л о д я. Тонафнек и тонафнек, тяфта шрать ваксса ащезь афи фатят, кода 
сиредят.
М и х е й (пеедезь). Сиредят, пенсияв туят. Работама аф кармат. Лацон газетанят 
кармат лувондома, да байдеконят лаксема.
В о л о д я. А мезенди байдеконятне?
М и х е й. Ёран тиемс волшебнай байдеконя, кона пяшкоделезе инь оцю мялезень.
В о л о д я. А кодама мяльце?
М и х е й. Меки одкс арамс.
В о л о д я. Мезенди тейть арамс одкс? Штоба тага школав якамс? Урокненди эрь 
шиня анокламс? 
М и х е й. И школав якалень, и тонафнелень…
В о л о д я (салаваня, штоба афолезе куле атяц). Эрязе эряфонц, а ётть изь кочка. 
Кодама шаба эсь воля школав якай? (Кайгиста.) И мзярда тият тяфтама байдеконя?
М и х е й. Аф лама лядсь. Мон тиендень ни байдеконят, конат пяшкотькшнезь кой-
кона мяльнень. А вов стама, кона меки одкстоптолемань, аф тиеви.
В о л о д я. А стама, кона тиелемань пенсионеркс? 
М и х е й. Стама тёждя тиемс, аньцек сон ломаттненди аф эряви.
В о л о д я. Тейне эряви!.. (Моли атянц ваксс.) Тонафтомак стама байдеконянь 
тиема.
М и х е й. Тейтьке сон аф эряви. А тиемац аф стака. Пянакудть ала эздост ветешка, 
тоза ёрдайне, пади, пенгянь крьвястемс яраштыхть.
В о л о д я (моли, сявсы фкя байдеконять, ванондсы аф верондазь). И тя 
байдеконясь лезды арамс пенсионеркс?..
М и х е й. Лезды, аньцек инзедемс лацкас эряви. Тяк сявонде, цёра, кядезот, ёрдак.
В о л о д я (путсы меки пянакудть алу байдеконять). Васькафнесамак, улема. 
Тяфтама байдеконят аф улендихть.
М и х е й. Улендихть, аф улендихть, а пингсь иляденди малаткшни. Пинге траксти 
тишеня максомс, ошкссь лихтемс. (Стяй,  шукадьсыне брюканзон лангста инкснень, 
лиси.)
В о л о д я. Тага сявсы фкя байдеконять пянакудть алда. Улема, васькафни атязе. 
Волшебнай байдеконят улендихть аньцек ёфксса. (Озай атянц вастс, ушеды 
байдеконять клянцек пяльксса инзетькшнемонза.) Аф нолгадан: стане инзедьса – 
пиндолдома  кармай. (Пингонь ётазь моли вальмять ваксс, ванондсы валдть каршеса 
тифонц.) Тяфтама указкац нльне учителеньконь аш. Кда атянякс аф тисамань, казьса 
тейнза. Пади, кизефнема аф кармай, а, пади, вете путы… (Вадерясы байдеконять, 
эняльдезь, тошказь корхтай.)
Байдек, байдек, идемак,
Сире атякс тиемак!

Сценаса светсь аф ламос мады. Мзярда оду крьвязи, Володянь вастса вальмять ваксса 
ащи сакалу ёмла атяня.

В о л о д я (шукасы прянц). Мезе тя ульсь? Бта ёндол кфчядсь. Бта мода  варяс  
сувсень.

Сувай Михей.

М и х е й. Шумбратада!
В о л о д я (пеедезь). Шумбрат, брат Кондрат! Бта ламос ашеме няенде, мон 
лажадомс ашень кенере.
М и х е й (дивандазь). Кият тон? А коса Володя?
В о л о д я. Тон мезе? Лата пряста прать? Эсь унокцень аф содасак?
М и х е й (малады, сембе ширде ванондсы Володянь). Мезе мархтот лиссь? Мезе 
тиеть?
В о л о д я. Мезьге ашень тие. Байдеконяцень инзедине.
М и х е й. Вай, шава пря! Ваномати варжакстт, мезе тиеть эсь мархтот.
В о л о д я. Мезьге ашень тие (ётай ваномать инголи). Ура!!! Атянякс арань! Тяни 
школав аф карман якама! Аф эряви урокненди анокламс!
М и х е й. Вай, шава пря! Тяни мезе аляценди азан?
В о л о д я. Тяни мон тонафтомонза карман! Эрька, коса шнац, няеви вастс 
повфтаса. Штоба аф шта сюцель, пильге сур лангса инголен якаль.

Сувай Володянь аляц.

П е т р а. Шумбраши пенсионерхненди и школьникненди! (Кенкш лангса, ушеды 
каяфнема кямонзон Володянди.) А тон, нолапарь, мезенди сакалхнень повфтайть?
В о л о д я (прянь шнафтозь). Ашине повфта, синць кассть! Тяни мон сире атян.
П е т р а. Кода кассть? Тейть аньцек кемонь кизот.
В о л о д я. Тяни кемонь кизоса пенсионеран.
П е т р а (дивандазь). Афкукс сакалхне кассть? Эрька, нотфтасайне.

Моли Володянь ваксс, кундасы сакалда, нотфтасыне.

В о л о дя. Вай, месендят? Сяряди!
П е т р а. Штоба афоль сяряде, нарайть.
В о л о д я. Аф маштан.
П е т р а. Тонафнема кармат.
В о л о д я. Тя нинге изь сатне. Ужели сире атятненди эряви тонафнемс?
П е т р а. А урокнень аноклайть, пенсионер?
В о л о д я (прянь шнафтозь). Мезенди урокне? Тяни пенсионеран. Карман атязень 
мархта  ваймосема.
П е т р а. Мон няфтян ваймосема! (Ушеды шнанц валхтомонза.) Нарак сяда курок 
и озак книгатнень ваксс. А то шнадон кафта. Фкясь стенати повфтаф, омбоцесь 
перьфсон. Ужяльдемот аф карман. Мзярс тядяце санаторияса, эздот тиян пенсионер-
отличник.
В  о л о д я (атянцты). Сон шавос валонзон аф ёрясыне, аде тонафтомак нарама. 
Сяльде уроконень тисайне. Ашезь лезда байдексь. Ашезь лисе тевозе. Месендемс 
тяни?

Володя атянц мархта ётайхть тона куду, Петра шашфтсыне цёранц книганзон, озай 
ярхцама.

З а н а в е с.

ОМБОЦЕ КАРТИНАСЬ

Велень школа. Моли урок. Сувай сакалу Володя.

В о л о д я. Шумбратада! Мария Ивановна, мярьгат сувамс? 
М а р и я  И в а н о в н а (абондозь ваны сувайть лангс). Шумбрат… Сувак… Тонат 
Володя, или аф?..
В о л о д я. Монан.
М а р и я  И в а н о в н а. А мезенди сакалхнень повфтайть?
В о л о д я. Ашине повфне, синць кассть.
М а р и я  И в а н о в н а. Кода кассть?
В а с е н ц е  ш к о л ь н и к с ь. Тя сяс, мес шаманц ашезе штакшне
.
Сембе школьникне рахайхть.

М а р и я  И в а н о в н а. Сетьмода шабат! А тон, Володя, ётак эсь вастозот. 
Поладсаськ урокть… Кие тячи азондсы Михаил Безбородовонь “Вирь” 
стихотворениянц?
В а с е н ц е  ш к о л ь н и к с ь. Кизефтьк сире атянять! Сон семботь содасы!

Тага сембе школьникне рахайхть.

М а р и я  И в а н о в н а. Сетьмода, шабат. Аф эряви пеетькшнемс палас повф 
ялгантень лангса. (Володянди.) Афкукс, мезе лиссь мархтот? Мес сакалце кассь?
В о л о д я. Визькс азондомска... Тиень волшебнай байдеконя, ёрань сяда курок 
сиредемс, арамс пенсионеркс. А лиссь лиякс… Сакалне кассть, а сембось лядсь станяк.
В а с е н ц е  ш к о л ь н и к с ь. А лиссь нола пенсионер!..

Сембе рахайхть.

О м б о ц е  ш к о л ь н и к с ь. Тяни Вовань тевоц туй. Урокса кизефнемонза аф 
кармайхть.
В а с е н ц е  ш к о л ь н и к с ь. Портфеленцка школаста и школав карматама  
каннемонза.
О м б о ц е  ш к о л ь н и к с ь. Пяк ни стака. Сон фалу “кафтта” пяшксе.

Сембе рахайхть.

М а р и я  И в а н о в н а. Сетьмода! (Володянди.) Кодама байдеконя? Мес 
васькафнят. И мес ашеть нара? Вдь сембе алятне и атятне эрь шиня нарсесазь 
сакалснон.
В а с е н ц е  ш к о л ь н и к с ь. Сон аф шта нарамс, шаманцка штамс нолгады. 
В о л о д я. Ёфси ашень нолгада… Мон нараса, сон тага касы. Исяк атязень мархта 
нараськ, шобдавас тага кассть сакалне. Шобдава нарань – школав самозон кассть. Афи 
содаса месендемс?
М а р и я  И в а н о в н а. А коса волшебнай байдеконяце?
В о л о д я. Меки пянакудалу ёрдайне.
М а р и я  И в а н о в н а. Эста якак сакал мархта.
В а с е н ц е  ш к о л ь н и к с ь (сельмонь каязь). Павазсь Вованди сонць сась. Тяни 
урокса кизефнемонза аф кармайхть. Миньцонк фалу ужяльнесазь сиренятнень.
В о л о д я (кяжиста). А мон ёфси аф сирян, аньцек сакалозе кассь. И урокти 
аноклань. Мария Ивановна, азондса стихотворениять?
М а р и я  И в а н о в н а. Азонтк, Володя.
В о л о д я (стяй, ётай школьнай доскать ваксс, ушеды азондома). М.Безбородов. 
“Вирь”.
Кизонда, вирняй,
Пиже лопаняй.
Пси мани шиня,
Шида кяшиняй…
М а р и я  И в а н о в н а. Молодец, Володя! Озак, тячи васенцеда вете путан. 
В а с е н ц е  ш к о л ь н и к с ь (сельмонь каязь). Тяни сакалу Володяньке 
отличникокс арай, олимпиадав тердьсазь.
О м б о ц е  ш к о л ь н и к с ь. Лоткай касомда сакалоц и тага нолгадома кармай.
В о л о д я. Аф карман. Мон сембе урокненди аноклань и фалу карман 
аноклакшнема. И хуш сакалозе лоткай касомда, сембе сяка карман лац тонафнема.
                      
З а н а в е с.                    

КОЛМОЦЕ КАРТИНАСЬ

Володя сувай эсь кудозост. Михей лакси байдеконя.

М и х е й. Сать, сакалу унок?
В о л о д я (аф весяласта). Сань…
М и х е й. Мезе? Тага “кафтот” кандоть?
В о л о д я. Аш… Тячи аньцек “ветет”.
М и х е й.  Молодец, брат-Кондрат. Эряви весялготкшнемс, а тон шалхкцень 
нолдайть. Мес?
В о л о д я. Сембе пеетькшнихть лангсон, сембе ёрайхть сакалнень нотфтамс…
М и х е й (арьсезь). Тяфта, улема, моньге лангсон кармайхть пеетькшнема, мзярда 
меки однякс аран. А вдь волшебнай байдеконясь анок. (Володянди.) А тонь мяльце 
меки цёранякс арамс?
В о л о д я. Пяк мялезе… Аньцек аф содаса, кода машфтомс мялень мольфти 
сакалхнень.
М и х е й (ёжуста пеедезь). А тонафнема лац кармат?
В о л о д я. И тонафнема карман, и кудъётконь тевса лездан. Нолашизень паньца, 
аньцек сакалне лоткальхть касомда.
М и х е й. Мон лездан… Аньцек, кда валхнень юкстасайть, меки атянякс арат.
В о л о д я. Аф юкстасайне, аньцек лезтт. Лезтт, атяй, сембоса карман 
кулхцондомот.
М и х е й. Эста киртьк тя байдеконять. Сон волшебнай. Мзярда синдьсак, меки 
цёранякс арат. Ёрань монць однякс улемс, да пелян, пеетькшнема лангсон кармайхть. 
В о л о д я (трнаты кядьса сявсы байдеконять). И месендемс мархтонза?
М и х е й. Азк мяльцень и синтьк.
В о л о д я. Байдек, байдек, идемак,
                    Меки однякс тиемак. (Синдьсы байдеконять).

Сценась шобдалгоды. Мзярда меки валдоми, Володя ащи кудть кучкаса. 
Сакалонза прасть. Ласьки ваномати.

В о л о д я. Ура!!! Мон сакалфтоман! (Ласьки атянцты, ашкордасы кргада.) Атяй, 
азк мезе тиемс!
М и х е й. Листь аф ламос ульцяв, пряцень эшентьфтьк. Сяльде саят, урокнень 
тисайть. А тоса,  кда аф нолгадат, листяма траксть андома. Тон куцят лата пряв, 
тишеня ёрдат. Мон сиренян, стака куцсемс. Лездат?
В о л о д я. Лездан! Мон аф ламос лисян, ялганенди пря няфтян. Тяни монга 
сакалфтоман! Ура! (Щасы куртканц, вазенц, ласькозь лиси кудста.)

З а н а в е с.