Сать, и пара

Сать, и пара... Куду эрь сувак.
Ётак, озак... Содаса - тон сизеть.
Сембе кальдявть, мезе ульсь, юкстак, -
Мон аф максан наскор лама кизефкс.

Штайте кяттнень, озака шрать ваксс,
Сипть и ярхцак - калаця монь кшизе.
Тячемс мяльсон фкяняселеть-тяксь,
Ашень эрьфте тоньфтомот эсь кизень.

Надиян, шять, оду аф туят?
Тон аф ладят якайкс лиянь мельге.
Монцень лацон сяка аф муят.
Монцень лацон тонь ашедязь кельге.

Поланяй, вай, пара - меки сать.
Мон ни арьсень: оду афи няйхте.
Мезе корхтат? Пильгозон пульзят?
Сяльде тонць тисайть ни алянь тефнень?

Мон аф сёпса - стакаль ся исяксь.
Апак удок ётнесть шобда ветне.
Эсьшкатнень тон эрька ктмордак,
Мондедонга лажатфу иднятнень.

Сать, и пара... Маряк, прать ни ёньц.
Иттне "аляй" валть юкстазь кунара.
Абон эсост кяльготнекшнень монць:
Аляфтома эряфсь сяда пара.

Сать, и пара... ламос учсеськ тянь.
Кяжезевок лангозт курок ётась.
И тят лажна, тят ризнафта сянь,
Мезе колганк ломатть тяни корхтайхть.

Кали арай тялоське тундакс?
Кали тарган тёждяняста вайме?
Мес аф корхтат, аньцек курендат?
Качам шине кудса, алянь вайме.

Сать, и пара... Кенярдень - мрдать.
Эжделите весть хоть кельмоф кяднень.
Кода эздот тялине прда,
Эсезост, няк, шудихть сельмоведне.

Сать, и пара!