Сань Шкаень куду

Шкаень куду сань мон. Шкаень куду.
Тячи оцю сатомань зиян:
Сязевсь ваймоц поланязень. Уды
Эзембряса. Васта аф муян.

Кали сизесь. Матодовсь. Пяк сярядсь.
Ольксян: кда сргозель ни, стяль,
Хуш пяк ламос мархтон ашезь эря,
Тушендсь эздон. Сяка пяк ужяль.

Монць пульзяфан, явсема аф маштан,
Оцю вайгяльхть вельхкссонза урнян.
«Кельгомняй, — ювадян, — валня аста,
Тосонга, шять, мархтот аф улян?»

Шкаень куду Шкайсь монь эсон вяти,
Тов аш кода тяни апак мольхть,
Аньцек сон монь сединязень пети.
Сань. Крьвястень палома штатолхт.

Поланязень инкса сюконяма,
Пялькскязень, кинь учсень шить и веть.
Озондома. Грехтонза ульсь лама.
Сембе афи азондовихть, шять.

Простяйть, Шкайняй, нолдак арукс тяста.
Сонць крёз каямс пинге ашезь му.
Тяконязти макста цебярь васта,
Модац ляпе улеза фалу.

Аньцек тон ни эльбятьксонзон кяшат,
Тевонь кельгить ваймоц виденяль.
Надиян, — шять, теенза ни вешат
Райса ни аф оцю уженя.

Сюконян тейть салонкса и кшинкса,
Кона шра лангсон ули фкакс.
Монцень, иднень, уноконень инкса,
Эняльдян, шумбраши тейнек макст.

Арьсян, шиса поланязе улель,
Нинге эряфсь полафтоль лиякс,
Аньцек Шкайть ни сонцень книгац ули,
Тяштьф, мзяра киза кинди максф.

Шкаень куду, сань мон Шкаень куду,
Шкайфтома мон, ямбарнясь, юман.
Сань. Ужяль ни аньцек тяза сюдофсь,
Коста оцю сатомань зиян.