Мес тон арать малакс?

Мес тон арать малакс,
Мялезон пяк туть,
Кафта тополь ала,
Акша вальмя куд?

Кие тяфтамсь тоса
Акша гуленясь,
Кона ёндол толса
Ваймозень крьвястсь?

Лувондса коль сёрматфть:
«Медицинскяй пункт».
Тяста мон — од церась —
И урмазень мунь.

Ранакиге стяян,
Ки трвав лисян,
Арьсян, пади, няян
Тя кудть гуленянц.

Ськамонза сон якай
Тяза тячить самс.
Седиезе лакай,
Ёрай виденцямс.

А мзярс изь няев
Акша гуленясь,
Пичефкс тиендсь теень
Шаволды кинясь.

Вакскан ётнихть ломатть,
Валозевок аш…
Вдруг монь прязе комась,
Эрьгязевок маштсь:

Акшелды халатса
Од стирнясь тихтядсь!..
Мувор шаба лаца
Новольдень мон кятть.

Тага аф пшкядян,
Валнят аф муян,
Мяштень эжди кяднянц
Виздезь аф кундан.

Ламоксть, ламоксть нинге
Арсень кить трвас.
Павазу сась пинге —
Стирсь монь тяфта васьфтсь:

«Мес аш удомаце,
Куфксни цёра, азк.
Кодама урмаце,
Шять, пчкафтса тязк?..

Ётай веня монцьке
Содань куфкснема,
Сельмот ашень конце,
Тяка жа «урмась»

Седи алон коцай,
Ваймозень плхтай…
Эрьси тяфта одста

Аф минь мархтонк най…
Арсек сиденяста
Тя кинязень лангс,
Пади, вага тяста
Муме ваймонь канкст…»
Ашень азов сяка
Фкявок вал лац-ряц…
Ськамонза коль якай
Тя кудть гуленяц.
Мяль кирнян мон прясон:
Кода улема?
Эрьда тинге азость,
Мезе тиема.