Макар атянь кевоц

1
Кевть сянь няине кунара,
Армияса вчек служань…
Полконеконь вастоц пароль:
Порат, лашмот и лугат.
А сияне ляйге шудесь,
Ляйть сянь лемоцоль — Исеть.
Берякова сери нюдихть,
Цильфснон комболфнезень ведсь.
Миньге строямазь весть ротнайсь,
Азондсь тяфтама приказ:
«Сави ведень пачка етамс»,
Коза молемс — васта азсь.
Ошть котельнянзонды анасть
Пенгат — стама уштомбяль.
Тевти улеме минь анокт —
Кис срхкаме пара мяльхть.

2
Вагот пенгятневок. Марафт.
Пенгянь капат, кода пантт.
Пинень кавкснемавок марявсь, —
Тяса эряйхть, улема.
Пенгя мархнень фталда няевсь —
Кеворди волнат исетсь.
Тяйня яння таргавсь ляи,
Тоза баба моли ведьс.
Маладсь мушка сакал атя,
Копорьсонза ружияц.
— Кати азорхт тяса, кати?.. —
Сиресь корхтась — тарнась пряц. —
Мон аф пенгат тяса ванан,

Пенгя мархне нят аф монь.
Тейне аф эрявихть анокт, —
Ся аф виренне законць.
Ванан: ломатть састь, да однят,
Да солдатонь щамса щафт.
Ва и арьсень: молемс содамс,
Кит и местема сей сафт…
Вирьса няемс ломань — праздник,
Инжикс сашендыне аш.
Сявок нинге сави азомс, —
Атясь сяда малав шаштсь: —
Моньге церане военнайхть,
Армияса лейтенантт. —
Аньцек сермат кучсихть тейне.
А монць синцень коль учсян.
Эрь… Да тявок тейне пара:
Вальмалон солдатт Шкайсь кандсь. —
Атяньке кисетонц таргась,
И крьвястезе трубканц: —
Арядова, церат, пялон,
Бта отпусконь илас.
Моньге — сиреть — петьсасть мяльнень:
Бта эсь служайне састь.

Атять бабацка примамазь
Эсекс, мзолды трват.
(Пеедиста ломанць мазы,
Маряк, кемонень-крда).
Калдорфтсь шаванят и куцюфт,
Нардась пиндолды стакатт,
Атять тяза-тоза кучсесь,
Тянь да тонань, кле, кантт.
Афкукс, кода тядянь пяле
Поза шовса шадсь илась.
Азор атять — пара мялец,
Мярьгат, церанза мрдасть.
3
Тязк ни шра ваксса тейнек
Атять мархта корхнемс савсь.
— Мокшат? Кода савоть сей мянь —
Сянгяря Сибирь кучкав.
— Велеса мон постуф улень,
Ванонь стаданц фкя муллать.
Весть куля муллати кулевсь:
Раскулачендамс кулакть.
Еню татарсь сяда курок
Арьсесь пильгокинзон штамс.
Тейне мярьгсь: «На максан, уроз,
Вашеняня эстейть трямс».
Етась киза — тейне вашесь
Тага вашеняня кандсь.
Мянень, сюдоф урозсь, вачта,
Стявонь кеме пильге лангс.
Тага етасть кафта кизот,
Азомазь кулакокс монь.
И сей няфтезь моньге кизень…
Ся кунароль, етась онкс.
Тяза вов Исеть трвати
Мокшетне — минь — саме сей…
Лиендсть чавкатне и грацне,
Комболфтсь ведензон Исетсь.
Тунь разведкас вирьгучкати,
Муйне тона оцю кевть…
Тяфта сей судьбазе пачкодсь,
И кевть маласа мунь тев.
— А рьвяцень, азонтк, кода
Васьфтить эряфонь кибрязт?
Ванан, корязтка сон од вдь…
— Эрьке, Оля, тонць тянь азк.
Бабась куфкснесь, вайме таргась,
Сонга озась скомнять пес,
Ожасонза шаманц нардась,
Азондсь. Лотксесь весть аф весть:
«Мельган предколхозась якась,
Но мон ашень моль рьвакс.
Седиец сонь кяжса лакась,
Лангозон сон кагод макссь.
Сяльде кельме кабинетса
Мольфнесть пефтома допрост.
Ежес сафнемазь эй ведьса,
Мяштьстон сязезь нльне крезть».
Атясь кулхцондсь, сей-тов ванондсь,
И сонць шукиезе прянц:
«Сволочнень ба синцень тянкса
Кельме томбас пряснон лангс!»
Сяльде тага — тифтень кружка,
Тага тифтень печф куяр.
Атясь вадердазе мушконц
И мондейне тага шарфтсь:
— Эрь, а тяни, пади, ванцаськ
Менель серьса кев-скалать…
Тя монь мялямозень ванфтсы,
Мезе серматф кевти, ватт!..
Мзяра век ни кевсь тя тяса?!
Сонь шнизь пизепне резь-резь!
Афи кири, афи касы,
Хоть и летьке модас пезф.
Ули, аш ли летописец…
Коза тяшнеф кевть судьбац?
Тянь аф азсазь ковське, шиське,
Тя историяти лядсь.
Якстерь кевти букват шупонтфт:
«Тя — Макаронь кевоц» — валхт.
Аш куштафкя, аяш нупонь,
Ару, кодане хрусталь.
Прашендыхть и солсихть лофне.
Эряфсь моли… Стама тевсь…
Паньф мокшалять колга ефксокс
Кармай ащема тя кевсь.