Апак луфт серма

Аварди-кольгонди ушесь.
Тихольди савор исась.
Ялганьконь койканянц ужесь
Озась и лажнай сестрась.

Стрелкасна часттнень пзьгатакс
Пацянят марняс прдасть.
Сетьме. Аф уды палатась,
Сетьмоф дежурная сестрась.

Варьхмодсь, и почтатъке кандозь:
Сермац газетат, журналхт.
Ризфоньке сяка изь янга.
Тошксеме фкя-фкянди валхт.

Няеськ конверста минь лемонц
Ялганьконь - кулси боецть,
Касфтозе ризфоньконь кемоньксть
Кядьс аф кундави конвертсь.

Кинь жа пяк кельгомга кядец
Мазыста букватнень тяштсь
Кельгомняц, или жа тядяц?
Пади, и тона, и тя.

Стаки сон ашезь са ежес,
Ашель и виец уколть;
Сельмоньконь нарнеськ минь ожас,
Ащеме кашт апак мольхть.

Эрьда жа, эрьда минь панчсаськ
Апак луфт серманц солдатть,

Келесонк морафтсаськ, ванцаськ,
Ули, шять, мяленцты лад!

Киньге изь токафтов суроц,
Етнесь хоть кажнайсь толбачк
Васьфнезь и смерттьке аф шуроксть,
Тянкса жа вийсна изь шач.

Келеса шувоськ минь калмонц,
Максоме мельдень салюъ
Келеса явоськ и сталмонц
Апак луфт сермань ся кудть.

Конанди седиень токазь
Серманьке миньге лийкстасть,
Конаса учсиень щекас
Сельмоветть снавнякс курькстасть. . .