Зярс эри ават

Аштемстэтькак тон ды сыргат кода
Тиринь масторга ды лиява,
Тень парсте чарькодть ды содазь содак:
Тон Пазонь чанстявт – ули ават.

Зярс эри ават – ули учицят.
Зярс эри ават – ули, ков самс.
Эри сон – ули кисэть озныцят:
Праткак – а зыян, – муят вий стямс.

Зярс эри ават, тон аволь ськамот,
Кеместэ молят, ули нежеть.
Тон аволь уроз, зярс эри ават,
Кедьпеде кирдят эйкакшпингеть.

Зярс эри ават, тонгак эряват
Ды азарсь вийсэ а керяват.
Ульть вечкий эйдекс, зярс эри ават,
Сюконяк Пазнэнь: эри ават!