Мон ардомсто панжан вальма...

Мон ардомсто панжан вальма –
Тиринь мастором икелень.
Килей ведьме кинть кувалма
Таго нусмакавты мелень.

Зярдо пиже эйкакш ульнинь,
Однэльть, ёлганинельть, чевтельть,
Ней сынь каить тусто сулейть,
Сыре килейкс аштить-невтить.

Вана пакся – цецят-цецят! –
Ожо тюссо ракси-якси.
Ванат-ванат, ды а кецят:
Тонь икеле кадозь пакся.

Минек веле песэ – пандо,
Матрась сонзэ умонь сэресь.
Чиреванзо – куракш пандя –
Валгсь паксява виресь велес.

Ков а каясак варштавксот,
Теке мазысь сти икелеть:
Китнень кувалт чиить каршот
Уроз паксят, чаво велеть.