Тәрәз төбе...

Тәрәз төбе...
Әни гәҗит тоткан.
Анда минем шигырь. Һәм рәсем –
Улы карап тора.
Ә шигырьне
Укый алмый әни, күрәсең.

Укый алмый әни.
Шигырьләрем
Язылмаган ана телендә.
Һәрбер сүзем монда өнсез кош күк,
Һәрбер сүзем – сулган гөл генә...

Ул улының ни язганын белми.
Тәкъдир миңа ниләр язганын.
Чамалыйдыр: Җан авазын минем
Аңа җиткерәлмәү газабын.

Дәшми-тынмый дисбе тарта әни,
Күз алдынан үтә гомере.
Мин төшенмәм инде бу доганы,
Ул укымас минем шигырьне.