Вов тейть и цюкорхт-копшат

Марувонь Аннась Ожна велень аф фкя цёрань седи солафтсь. Тячи фкять, ванды омбоцеть мархта рахси-пеетькшни. И кажнайти надияфнесь рьвакс лисемс. Аф стак цюланцтост марнек вальмя сельмосна колсефт.
— Саты, стирькай, — мярьгсь тядяц. — Аш месть эрь илядня кудоньконь каршес цёрат пуропнемс. Тяса аф клуб. Пинге ни тейть рьвакс лисемс.
— Рьвакс, рьвакс…— полаксась тядянц эса Анна. — Бта цёратне ки лангса валяндайхть.
— Да эрь илядня вальмалонк вяшкондихть...
— Вяшкондихть, да аф сят. Аш Ожна велеса коряван женихт. Фкять ёнец лафча, омбоцеть пиленза оцюфт. Рахсемон кармайхть, мярьгихть: Марувонь Аннати цебярь мирдевок ашезь мув.
— Аф серень, аф ронгонь ширде Шкайсь ашензе обжа, а прясот нинге варма. Пиленза оцюфт, ёнец лафча. Ломанць цебярь улеза, ёненте ладявост. А аляце кодамоль рьвяямстонк! Шалхкоц якстеряпс лаца, сонць шуваняль, кода олгоня.
— Алязе-тя алязе.
— Виде, эсь кичкорце аф няеви. А мес Капризонь Микольсь аф мирде. Сянь перьфкат сяда шарфтк. Аф шарыбря, тевонь кельги. Вакссонза вачеда аф лядат, цюкорда кармай аннемот.
Аню кулхцондозе тядянц, лиссь рьвакс Миколенди. Недялявок марса ашесть кенере эрямс, од мирдсь андозе кельгоманц «цюкорда».
Анювонь крёснавац тердезень шачема шинь илазонза. Пиравасть цебярьста: симсть-ярхцасть, кштисть-морасть. Шобдава стясь Аню, сельмокабанза сенепт.
Велень аватне эсь ётковаст: тя, кле, Капризсь пикссезе, лиянди аш кинди.
— Лата пряста прань, — васькафнесь Аню. А сонцень сельмоведенза шудихть. Нату ялганцты панжезе ваймонц. Тя, кле, сон, мирдезе, каясь.
— Мезенкса, ялганяй? — кизефтезе Нату. — Да лац-ряц эрямска марса ашеде кенере?
— Монць муворусь, монць... Саме пиравама вастста. Кафцьке комблявняфтама. Мирдезе велясь васта лангс и ушедсь трактор лаца крнама, а сяльде кати-месть ушедсь пешкоткшнема:
— Кадомак, мярьгонь, нолдайть кяднень, пови вдь, пови.
Мон ворьгодень ваксстонза диванти. Ащемаль шеернякс, афолемаль кашторда. А мон ктордонь. А сон тага:
— Пови вдь, пови...
И тяфта веньберьф. Удомбачк кати-кинь мархта воявась. А тоса матодовонь. Маряса, кие-бди монь щёка ланга—цят, диван лангста эстокиге комотень.
— Ах, аеркс! Мезенкса пикссамак?! Мезень кальдяв тиень?
А сон келептезень сельмонзон, корожкс лангозон ваны:
— Простямак, Анюта, шяйтаттне веньберьф эсон пикссесть.
— Шяйтаттнень мархта воявать, а повсь тейне. Ашесть кирдев сельмоведне, ушедонь авардема. А сон нолдазе прянц, ушедсь прянь паронфтома: «Монцьке аф шарьхкодьса, кода тя лиссь».
— Тяфтамть мархта пелькс эрямс. Тяни мокшенданзонды воля макссь, оду удомбачк пеель кядезонза сяви. Тага простяфтсы прянц. Пади, докторнянди няфтемаль?
Тяда меле Миколь удомбачк корхнесь сидеста. Но Аню старандась аф матодовомс, фалу кирдсь вакссонза мезе-бди прянь араламс. То шуфтонь петькольня, то тапама вастть алу путнесь. Монцьке, кле, докторняфтома, ацентьфтсайне шяйтаттнень.
         Весть стясь Миколь ушу, Аню кодак керсы касом ланга тапамаса, алясь боком и велясь. Аню сяшкава эводсь, мянь кяпе и штадоня веньгучкать ласьксь велень медсестрать инкса. Ся сась, ванозе и корхтай:
— Тят лажна, Анюта, кармай эряма. Тяфта теенза и эряви, штоба оду кядензон афолезень ноля. А то онцтонза шяйтатт пяк няи. Тяда меле, шять, лоткай ононь няендемда.
Каприз Микольсь - ломанць грамотнаель, техникумса тонафнесь. Но колхозса покодемс мялец ёфси ашель. Сувась кода-бди велень хозяйствань управленияв Коля щенянц варжама. Ся и прважазе оцюняснонды. Пади, кле, муй коряват кодамовок тев. Тевоньке тяса аф пулю, аф назёму, эрямс можна. Шкуркин оцюнясь од цёрать примазе пяк лац. И тевга мусь. Сявозе работама статистикань отделу. Тевсь аф стака. Няфтьсак, кле, лац пряцень, сяда цебярь тев макстама.
         Од цёрась управленияса трудендась аф куватьс. Фкя планёркаста Шкуркин ушедсь кизефнема работниконзон кядьста, кие мезе исяк тись. Фкясь колхозу якась, омбоцесь министерствав каготт аноклась.
— А тон мезьса кеняртьфтьсамасть, Варакин? — кизефтезе Миколень.
— Мезе исяк шиньберьф тиеть?
         Шнафтомс пря аш мезьса. Миколь "тк", "мк", азомс аш мезе. Лангсонза ушедсть рахсема.
— Варакин, ялгатнень мяльсна содамс, кодама тефт исяк тиеть-якафтоть,
— нинге весть кизефтезе Шкуркин.
— А мон, Варлам Абрамыч, шеерхт кунцень, — отвечась Миколь. — Работамс тейне шоряйхть. Аньцек сяван кядезон кагод, а синь тов-сей ласькондихть. Сембе нерванень сивозь.
— И лама кундать?
— Мянь комсь ветие.
         Ялганза тяни ни оцю вайгяльхть рахасть. Да кие-бди мярьгсь: «Тянкса аф грех премиявок максомс».
         Миколь кяжиясь ялганзон лангс и азозе сембе видеть, мезевок ашезь карма кяшендема:
— А нинге, Варлам Абрамович, «сяпинянкса» лавкав ласькондень.
— И ламоксть ласькондеть, Варакин?
— Ветешкаксть... Васенда инженерхненди кафтошка сюлека кандонь, тоса...
— Панде, панде... Шарьхкодень. Вов кода, значит, трудендатада, велень хозяйствать эса кепоттяда.
         Тя корхтамада меле Капризонь Микольть кучезь прянь тряма «Аньцек инголи» колхозу. Аш месть, кле, управленияса шеерхт кунцемс да лавкав ласькондемс.
         Колхозонь предсь, Василий Иванович, путозе учань фермав азорнякс. Ломаньда тоса трудендась аф лама. Сонць, кафтошка эряфкшу аванят. И, конешна, сембе тевса сафтысь Курмань Васясь. Ся и тишень ускись, и учань печкись-ваткайсь.
Фермась оцюволь. Учада эсонза ламоль. Тердезе весть предсь и корхтай:
— Варлам Абрамович ванды ошу моли, оцю ломань мархта васьфти. Кода гостенецфтома. Печк шашлыконди кафта учанят. Лацкас урядайть, цебярьста ашкодыть. Ату вдь тоса аф миннет ялгатне, меки мрдафтсазь.
— М ярти анокламат, Василий Иванович?
— Тячиенди эрявихть.
— Эняльдемаце ули пяшкотьф.
— Содасайне ня баярнятнень, — мярьгсь Миколенди Курмань Васясь.
— Теест сяда куя учанят эрявихть. Аде уратфнень эзда кафтоня ваткатама, вона кодама куятольхть ямбархне.
— Тон месть, Вася?! А кда киньге кулофттама, кафцьконь тюрьмав пякстасамазь.
— Тят пеле, кивок аф кулы. Баярняда «эряфкшу» ломатть аш. Мзяра тяфтама учада порьсть, мезевок мархтост ашезь лисе, тазат алятне.
— А кда предсь содай тянь квалма?
— Аф содай. Минь кафта эрек учанят печктяма: фкянять тейть, омбоценять тейне.
— А аватненди?
— Потмоснон макссаськ варжамс. Лац вдь корхтан, Миколай Миколаевич.
— Лац, лац, Вася.
         Весть тяфта тисть, омбоцеда, колмоцеда. Кудса холодильниксна пяшксет сивольда: и рястайхть, и пидихть эрь шиня. Рьваснонга лад мялезост.
Варлам Абрамовичень лангс баярня ялганза ширем сельмот кармасть ванома. Фкясь шашлыкта меле недяля ушу ласькондсь. Омбоцесь сивольдовок лоткась ярхцамда. А мзярда андозь учань сивольда министрть полафтыенц Аким Акимовичень, Миколень аф пара тевнянза лиссть лангу. Баярнясь кафтошка недяля рязондсь больницяса аф аньцек сонць, но и сембе семьяц.
         Василий Иванович панезе Миколень учань фермаста. А тоса сонцьке тусь. Варлам Абрамович ашезе простя председательть.
Тяни Варакин тага лядсь тевфтома, «сяпинять» мархта ялгакстомсь. Анювоц сюци-сюци эсонза. А Миколень фкя пилеванза сувай, омбоцева лиси.
— Сяда тов тяфта эрямс аш кода, — мярьгсь Аню мирденцты. — Кда Москуву добувама аф туят, ськамот эряк.
         Од алясь кочказе васенцеть. Марувонь Анюсь недяля срхкафнесь эсонза оцю ошу добувама. Марнек Ожна велеть ётазе, шумос ярмаконя кеподсь. Кие вете сятт макссь, кие тёжянь. Вдь эряви васень пингть мезе-бди симомс-ярхцамс, эряма вастонкса пандомс. Пидесь-панць мархтонза, щапт аноклась. Парязе баняса. Кие содасы, кле, тоса мзярда удалай штамс.
А тоса прважазе автобусса шабрань станцияв. И мезе арьсетяда, пачкодсь Миколь Москуву? Аш, конешна. Аньцек валгсь автобусста, ушедсь вешендема «сяпиня». Копорясь ярмаконь аф ужяльдезь. Ши симондсь, кафта, колма. То вокзалса валяндай, то шуфтонятнень ала коваряй. А Анювоц учи, надияй. Аля ваймоц Москуву добувама туф, зепе ярмак уски. Ся мзярда симозень ярмакнень, маштсь ярхцамбялец, сась куду. Щамонза рдазуфт, кяденза сязентьфт, шамац киськоряф. Аню кодак аньцек няезе, эстокиге седиенцты кундась:
— Тон коста? Мезе мархтот?
— Москуста... Кали аф няйсак! — отвечась Миколь.
— Вай, Шкабаваскяй... Кали Москуву ни пачкотькшнеть?
— Пачкотькшнень... пачкотькшнень. Мон добувань, а тяни архт добувама тон.
— А мезьса шумоньконь пандсаськ? Мзяра мархтот анцень. Мзяра лавкав шумуфтама. Мярьгонь Марож Нюрати, сай Миколезе Москуста, пандсаськ.
— Пандсаськ мзярдовок.
— Мзярдовок?! Да вдь синь учема аф кармайхть, вешсазь-анасазь шумоснон.
— Афольхть макса...
Аню аварьгодсь.
         Омбоце шиня вятезе Милканянц Олдакс велень базару мимс. И лофцуволь, и сятяволь жуватанясна. Мзяра пинге эсост трясь.
         Вов тейть, Мару Анна, и цюкорхт-копшат. Вов тейть и тевонь кельги мирде.