Васедема
Татьяна Михайловна ащесь вокзалонь куцеманятнень лангса и учсь, мзярда малады поездоц. Вете минутатне, конат лияста афи приметавольхть, тячи таргавсть ламодонга ламос. Кда улельхть пацянза, тяникиге лийксталь эсь шачема-касома уженязонза, Келу вели, коса ашель ни пцтай кевейхксые киза. Конашкава лажадсь сон тостонь седиень озафты перьфпяльти! Тяникиге чёпафтоль кудснон фталга шуди ляйняти и сонь ару кельме веднясонза шталезе лама кизонь сизефонц. Аф, аф сялдсы мокшавась ошень эряфтьке, но кали путови сон ряцок велень арушить и сетьмошить ваксс! Конешна аф. Сембе ононза, мяленза-арьсеманза ня шитнень ульсть аньцек шачема вастонц колга. Арьсекшнесь, кода сувай тядянь-алянь куду, кода ашкордасы кргада кунара апак няентть Наста сазоронц, а сяльде шра ваксса кармайхть лятфнемонза аф тёждя, но павазу идькс пингснон. Тя мяльда-арьсемада меле авать сядонга таколгодсь седиец, нльне аф эстокиге приметазе, кода инголенза эвондась кувака сянгяря тюсса поездсь, кона усксы сонь ичкози, шачема масторозонза.
Кафта шит и кафта вет пачкотькшнесь Татьяна Михайловна. Ардсь мазыдонга мазы вастова. Вальмава няевсть кели паксятне, парьхциень лугатне, сери панттне, оцю ляйхне, но седиец мокшавать учсь кати-мезе лия, сельминголенза стаки ащесь ся мазышись, кона няентьфоль ёмласта.
Вов ни арды авась автобусса, сембоц кафтошка вайгяльбе лядсь велезонза. Тага ванонды вальмава и дивандакшни. Сембось инголенза, мярьгат, эвондась васенцеда.
А вов и велецка няфтсь пря.
– Шкабаваскяй! – ашезь кирде и кайгиста азозе Татьяна Михайловна. – Да сон вирть потмос ваяф! Вай, конашкава сембось полафтсь!
И афкукс, полафтсь. Ся вастова, коса инголи ашезь машне комбайнатнень увфсна, тяни касыхть паргана кузнят, а постуфне аф пелезь якафтсазь велень стадать. А панкта, панкта мзяра тоса! Ломаттне кода кептерьснон эса каннихть?
Велетьке шамаликоц тяни ни прокс лия. Аньцек фкя ульцясь, конань ломаттне лемнесазь оцю ульцякс, ацаф асфальтса, а лядыхне валозь валфт сянгяря тишеса. Эзгаст кунара ни аф арнихть тракторхт-машинат, да и ялгавок лишнайксть аш кинди ётамс: шамсь велесь, тушендсть эряенза ошева-куване, ашезь кадонда юрхтснон аньцек сире ломаттне. Варжакстат шава куд лангс и ацергоды седице: пирьфсна палаксуфт, вальмасна шавонфт седяфса, а вдь мзярда-бди эсост лаказь лакась эряфсь. Сяс и няевихть куднятне пичефксуста, мярьгат, лажнайхть азорснон инкса.
Автобусонь лотксема вастса Татьяна Михайловнань васьфтезе сазоронц цёрац Миша, кона фалу тяшнель теенза сёрмат.
Наста баба палканя вельде лиссь ульцяв и нажядсь кудонц инголе перяфкскяти. Сельмонза няйсть кальдявста, сяс аф эстокиге шарьхкодезень ширезонза сайхнень.
– Тядяй, месть ащат, кали сазорцень ашить сода? – марязе Наста баба цёранц вайгяленц и таколдомать эзда марнек трнатозевсь. Татьяна Михайловнаньге тякось музе, нльне валоц ашезь азов. Лаподсь Настаканц кргас и ляпиякшнезь ушедсь авардема. Конашкава ламос сазорхне учсезь тя васедемать, мзяронь колга кафцьконь мяльсноль фкя-фкянди азондомс…
– Эрь, суватама куду, – тердезе Наста баба сазоронц. Но тонац сувамс ашезь эряскода. Татьяна Михайловна каязень тапочканзон и кяпе шятясь нарнять лангс. Сяльде маладсь паргана сире исати и соньге, кода ломанень, ашкордазе.
– Стаки эряй нинге, ашезь коське, а вдь мзяра кизоц ни тя шуфтть, – азозе вакссонза ащихненди. Афкукс исась пяк кунардонне. Нинге войнада инголе сонь озафтозе альнякасна, Фрол. Шабрань кудса эрясь Кузьма атя. Сон ламоксть тяряфнесь керомс исать, но Наста баба ашезе макса тянь тиемс. Тяк токсе, кле, мала ломаненьконь колга лятфнембяльть.
– Тяни исать алоц пцтай аф шамонды. Кизонда, сон аралакшнесамазь псида-опанада, – мярьгсь Наста баба.
– А праздникста тяза пуромкшнетяма раднянь келеса, – поладозе Миша. Татьяна Михайловнань пароль мялезонза тянь кулемс. Сон озась исать ала ащи скомнянять лангс и крхкаста таргазе ваймонц. Вирть ширеста яфодсь ару, медень таньфса кожфкя, конань эзда мокшавать седиса арась сядонга тёждя и сетьме.
Наста бабань рьвяняц тя пингть аноклась шра лангс. Мяк ульцяв марявсь пянакудса пидеф пси лямонь шиненясь, конань эзда инжись ни ашезь атказав.
Иляденди Татьяна Михайловна тусь ляйняв эшеляма. Ведсь лямболь и сяшкава аруволь, мяк няевсть потмаксса уенди калнятне. Ламос ащесь ведьса, а мзярда лиссь, прянц марязе стане, бта оду шачсь. Мокшавать ваймоц пяшксель кенярдемада. Шачема уженянц мархта васедемась казсь теенза афкуксонь эряфонь эрьгя.