Тядязти

Сенем менельса сиянь тяшттне – сельмотне,
Кизонь псить эзда ару ведсь – валце.
Катк аф токсихть ваймоцень кяжи кельмотне,
Катк аф сизси цифтордомс валдце.

Пайгонь шавомась церькавса – тонь вайгяльце,
Суски якшамда эжди толсь – кяттне.
Шадоветтне катк штасазь тонь сярятьфцень-маряйцень,
Седиозафксс вятихть сембе яттне.

Козя арзяста питни котфсь – тонь сёрматне,
Ризфса-пичефксса ётаф кись – шаршне.
Ваймонь озафтыхть катк кайгихть тонь моротне,
Шра лангстот позась катк весть аф машни.

Кеме воляце тонь – тя вирьса тумотне,
Срмафкс-сёрматфне – аф удоф ветне.
Катк улихть павазуфт тонь иттне-унокне
И аньцек павазуфт сельмоветтне…