Тядянь-алянь бславамат

Катк Ангелняце ванфтанза зиянда
И кяжи ломань каршес сёлги кенкшть,
И васькафнихнень лавгай кургснон панды,
Штоб валсна ваймозт афольхть пезфта кенчт.
 
Катк эряфсот тонь наголь ули стане:
Штоб копорезт аф ёряльхть кяжда кефт,
Кинява-янга, – аськолят куване, –
Илядольхть мельгат аньцек шнамань тефт.
 
Сай пингонь шитне катк аф улихть стакат,
Катк максы тефт Шкайсь – тондейть тиемшкат.
И нолдаф кятть тев тиемста тят яка,
А улест ожа петне илештьфкат.
 
Катк вайме эрьхксот Сетьмось ули азор,
Трвастот мзолфкяце весть аф прай.
И ялгатневок кельголедязь сазоркс,
Суваль эрь инжись пялот кода Райс.
 
Катк пяшкодеви сембось, мезе арьсеть,
Аф якамс тондейть лавкав шава зепт,
Штоб улель мезь лангс рамамс щамс и карьсемс
И моркш ваксста аф стякшнемс пялес пект.
 
Шять аф нарошна сурозт пезы сарда,
Катк Ангелняце ваксозт тихтеклай.
Сон паця песа сельмоветтнень нардай,
И седис сялги сярятьфце юмай.
 
Аф валазе катк ули тонь киняце,
Аф пракшнемс тейть плманжанятнень лангс.
Рьвакс лисят, тонь шачеза идняце,
Вийс коре улель лафтубрясот канкссь.