Тячемс мяляфтса, Тядяй...

Тячемс мяляфтса, Тядяй,
                        ся кунардонь иляднять,
Кода пялонк сувафтонь
                        тейть аф содаф стирня;
Комор потмосон кирдень
                        эвотьф нармоннякс кяднянц…
Кеворсь каршезонк эльстот
                        акша сюрень крня.
 
Кати эводеть, Тядяй,
                        кати кенярдеть эста? –
Кядьруцяняцень эшксса
                        коськф търватне търнасть;
Пади, сельмоведь эрьхксот
                        арась павазцти тесна,
Сон сия ожнань уськокс
                                  курьгодсь, щёкават прась.
 
Шарфтоть шкайнятнень шири,
                        сюконять, каять крёскя,
Кельгозь паламасть кафцьконь,
                        пряньконь мяштезт люпштайть.
Летьке сельмотне эста
                        пялевес ашесть коське,
Валхт бъславамань тошкать,
                        лемонц азонкшнить Шкайть.
 
Сотовсть шкайгиньке фкя-фкас, –
                        улень поваднай мирдекс, –
Вятнеськ кядьбеда павазть,
                        ульсть и явомс туфталхт.
Тон ърьвяняцень ширенц
                        наголь аралать-кирдеть,
Лямбе седисот ванфнеть
                        кяжень аценьфти валхт.
 
Эряфсь эсь тевонц содась,
                        ётасть кизот и тялот…
Монга пуроптонь пиза,
                        «аляй» мярьгине шачсть.
Тячи, Тядяняй-Тядяй,
                        виденцяма сань «пялот»,
Калма марняцень вельхксса
                        ризфти сельмоне начксть.
 
Пильге пезот стяфтф крёзстот
                        палан тонь ликоняцень,
Крёскянь каязь пряпезот,
                        Тядяй, тейть сюконян.
Явсезь эняльдян: Тядяй,
                       простяк пежу идняцень –
Тейне парце изь пандов,
                        сянкса мон муворан.
 
Тяни вестеньге, Тядяй,
                        кенкшцень тейне аф панчсак;
Мезень кальдяв ульсь ётксонк,
                        сянь кунара юкстайть.
Калма  марняцень, Тядяй,
                        тячи мазептьса панчфса.
Кода идькс пингстон прязень,
                        мяштезт панчфнень люпштайть.