Тейне – комсь котува

Эряфть пяльксканц мон ётайне-ласькине,
Тячи кизодон топодсь комсь котува.
Корхтайхть, кись аньцек молити сяськови.
Шкаень лезксфтома кись кали ётави?!.

Тячи рананянц пачк явась онозе,
Мяльхне-варматне перьфкаван ашкоряйхть.
Латцихть-кодайхть синь эряфонь морозень
И крнякс прясон орадыхть-тапаряйхть.

Зрнянь валдсь кудсонк танцтиста эренди,
Матфан, саворня арьсян эсь потмован.
Латцян питне тиф, апак тик тевненди:
Тевдон – пефтома, тейне – комсь котува…

Тёждя кит, тёждя тефт афи вешендян,
Тядянь-алянь лийкстань лямбе пизоста.
Ризфонь даволда ковга аф кяшендян.
Мезе сатонь-прдань тняра кизоста?

Кода маштан, ста шаштан, коль покодян,
Валда мяльхнень мусайне эсь цёрастон.
Симдян-андан, кит ширезон токадихть,
Масторть шнаса и стихса и мороса.

Монь мзярс нинге аяш эсь кудозе,
Марлюнь озафтомс перезе-садозе…
Алуветть стака мяльсь туза-шудеза,
Валда мяльхть Пингонь ляйсь тейне кандоза.

Афи сёпондса – улихть и пежене,
Мувихть эсонга корхтафтыхть фталганя.
Шкайсь ужяльдемань, ули и нежезе –
Мала ломанне улихть и ялгане!

Стака мяльть седиботмостон ёрдаса,
Аф утясазь катк ярмакне зепозень.
Тячи ялгане, сяньге мон содаса,
Пара валса кундасазь монь лемозень.

 Кадок кисна срадсть масторонь ошева,
Фкя шра вакс тячи мархтон аф озадот,
Кие кенярди инксон монь, мокшавать,
Кие копордай, кие, шять, озонды.

Кда эрявксты, сайхть-лиихть курокста,
Ризфс аф кадсамазь, пичефкста нельгсамазь.
Хуш и шачендыхть стихоне шуроста,
Эсон сюцихть, а сяка вдь кельгсамазь!

Тячи кизодон топодсь комсь котува,
Кадок корхтафтыхть салава фталганя…
Шкаень лезксфтома кизе аф ётави.
Шкайсь ужяльдемань – улихть монь ялгане.