Сокор Алдакать промозонза

Студентокс эрянь Евдокия Наумовна Колдаревать пяле. Кудазоравась сокороль, а сембе тевонзон тиендезень сонць: пидесь-панць, муськсь-шовась, якась ялга мархта больницяв, лавкав. А нинге Алдакась кой-коста ялгафнесь сяпи веднять мархта. Аф шта пяконя, а тяфтак, штоба, кода сонць корхнесь, эряфонц весялгофтомс.
         Монь ялгане нинге ашельхть, ши-шишкань ащекшнень Алдакать пяле, козонга ашень яка. Сон и корхтай тейне:
— Скушна тейть, цёрай. Аф тонць ковга молят, аф тейть кивок сай.
— А кие сай, Алдакай? Мон киньге аф содан ,— мярьгонь.
— А, пади, стирь мархта содафтте? Тя кудса ули цебярь стирь.
— Пароль, — мярьгонь, — Алдакай, содамс стирь мархта.
— Учт аф ламос, — азозе тейне азоравась, сявозе байдеконянц и саворне лиссь квартираста.
         Пинге ётазь афкукс вятсь кати сире стирь, кати мирдьта явф нильгемоньшка кизоса ава.
— Маря лемозе, — венептезе кяденц инжись.
— А монь лемозе Костя, — азыне теенза.
— Костя? Пара лемце. Пара! — И кядьса чупазь «стирсь» озась ваксозон.
Мон шарьхкодень, Алдакась вятсь тейне сокор ава.
— Пароль ба штамс васедеманьке, — видеста азозе авась. — Кяленьке юксовольхть, корхтаманьке ладяволь.
Алдакаське кирдезе ширенц:
— Костя, сяфть сюлеканя.
Маря тев корхтай. Сон стирсь ёню.
— А кие тейне максы сюлеканя? — кизефтине азоравать. — Сере ули, а кизоне шабаннет.
— Улест титихне-митихне. А ласьконди мутама. Макст ярмак Марянди, а сон содасы, кода сатомс, сонь лац няихть сельмонза.
         Мон цють ашень сязе рахама. Ся кода шта стане - сокорть сельмонза няихть? Но венептень Марянди ярмак лопаня. И авась лиезь лиссь квартираста. Пялешка частта меле кандсь «акшеня». Кафта аватне верок алкс нилезь, мезе ульсь сюлекаса. А синць сяка тев шнасть эсон:
— Минцень ломанць, пара жанихсь, аф жаднай.
         Колмошка шида меле пуромсть квартирант ялгане. Фкясь ветеце курсонь студентоль, аф васенце кизось эрясь Алдакать пяле, лац содазень азоравать промозонзон.
— Аф скушналь ськамот? — кизефтемань Петра пеедемга.
— Аф скушналь. Алдакась од стирьге тейне вятнесь, — виденцянь мон.
— Ха-ха-ха, — рахазевсь Петра. — Кинь вятнесь? Аф Сивухань? Или Чакушкань?
— Ктор...ктор - кторгодсь эсь уженязонза озаф азоравась.
— Эх, Наумовна! Мезе аньцек аф тият, аньцек трватнень начфтольхть. Азк, кинь тага од стирькс вятнить?
— Сивухань, Петя. Сивухань.
— Мувсь од стирсь! Кати-мезень шавача. Няйсак шобдаста ульцяста — эводят. — Лама норгсь кядьстот? — кизефтемань Петра.
—П яле литранди.
         Кармаме эряма. Эздонк кить туркс ульсь лавкась. Уцез сивольня, тувонь пакарнят, колбасаня усксесть. Аф стак очередсь эрь шиня мянь ушесоль. А сокорхненди, кальдявста няихненди ярхцамбяль мишендсть очередьфтома.
— Алдакай, пакарнянкса молелеть, лямня пиделеме, — эняльдсь Петра.
— Молелень, Петя. Аньцек кить туркс пелян ётамазень, машинада лама. Аре, вятемак.
Петра рахазевсь:
— А кда од стирезе няйсамань? Мярьги, кодама красавица вятнят? Пикссамазь кафцьконь. Тон Сивухань или Чакушкань кизефтелить. Парснон пандсаськ, синценьге андсаськ пси лямняда.
— Молян, кизефтьсайне. Пади, моли конацка.
         Пинге ётазь Алдакась и Чакушка кандсть сумка тувонь пакарнят. Келесонк пидеме ярхцамбяль, марса сивоськ.
— А тяни пароль киякссь штамс, — мярьгсь Наумовна. — Минць вдь пульть нилендьсаськ.
— Штасаськ, — азоськ фкя вайгяльса. — Тихтяма аруши.
         Алдакань и Чакушкань прважаськ бралгома, катк аф шорсихть. А минць ушедоме кияксонь штама. Пинге ётазь сась азораваньке.
— Примак работаньконь, Наумовна, — весяласта пшкядсь Петра.
Авась комась, ётафтозень суронзон кияксть эзга, апряказь азозе:
— Саты сокор ломанть рахсемс. Дяряй штаф-урядаф киякссь тяфтама?
Алдакать тага прважаськ якама, а минць омбоцеда штаськ кияксть. Сась, тага ётафтозень суронзон киякска.
— Трудендаде, а киякссь сякокс рдазу. Няйсасть сурнень?
Минь кяжияме.
— Наумовна, кодавок мяльце аф ванови. Кда аф мялезт, тонць штак кияксцень, — мярьгсь Петра.
—И штаса, — обжавсь Алдакась.
—Штасак, штасак, — полаксазе Петра. — Мес ина тнярс ашить шта?
Наумовнань тага прважаськ кудста, а минць кярьмодеме кияксонь штама колмоцеда.
Куду азоравась сась иляденди. Валонь апак аст мадсь ваймама.
— Наумовна, а кие работаньконь примасы? — кизефтезе Петра.
— Ха-ха-ха, — рахазевсь Алдакась. — Мон юкстайне ни тевозень.
Ётафтозень суронзон кияксова, мярьгсь:
— Тяни молодецтада, шнатядязь, афкукс трудендаде.
— То-та! Ату колмоксть штафтыть кияксцень. А тонць ся пингть, пади, косовок рахсемасть.
Омбоце шиня, кодак сань тонафнема вастста, Алдакась корхтай:
— Кшизе аделавсь. Афолеть ласьконде лавкав?
— Молян, — мярьгонь.
Кяскавнястонза таргась кафта монетат. Эста кшить питнецоль комсь трёшник. Венептезень тейне.
— Ваныте, аф кафтонь трёшниконь монетатне?
Шарьхкодень, тяфта Алдакась проверясамань. Сокорхне няида лац чупасазь и содасазь ярмакнень.
— Кемонень трёшник таргать, Алдакай, — азыне теенза и тунь кшинкса.
Рамань кши, и Наумовна ярхцась кши мархта лямда. Сяда меле вестевок ашезь кизефне, кодама монета таргась кяскавнястонза.
         Аделсевсь ковсь. Пинге квартиранкса пандомс. Эста тя ульсь комсь цалковай. Петра ялганьке корхтай:
— Тяда эряскода козякофтомс Алдакать. Пандома карматама очередьс коре.
— Ся мес стане? — кизефтине.
— Меле азса.
Омбоце шиня арьсень пандомс квартиранкса. Азораваньке озафоль васта пезонза. Петра корхтай:
— Наумовна, лавкав мазыня усксть. Исяк цёратне сявондсть. Кяжиняцка ули, симомска ляпоня, пряцевок эздонза аф сяряди.
Алдакась - чмок-чмок—трванзон.
— Пароль, Петя, сюлеканя сявомс, да ярмакозе аш. Путода инксон ярмаконя, а пенсия кандыхть—пандса.
— Тяфта тевсь аф туй, ёрат минь сялдазсонк симомс, — арьсесь Петра, а меле иланц инкса ушедсь кизефнема:
— Макар, тонь аш ярмакце?
— Аш.
— А тонь, Сандор?
— Моньге аш.
— Киньге аш. Сави мазыняфтома шись ётафтомс.
— Монь ули комсь цалковаезе, да эстейне эряви. Алдаканди квартиранкса максома, — азыне Петранди.
— О, Наумовна, мувсь ярмак! Шять, ули Шкай! — тись пря кенярдикс Петра.
         Мон венептине авати ярмакозень. Петра цють аф нозордазь нозордазень кядьстонза кемонь цалковайхнень. Алдакась ся кемонь цалковайхнень путсь эсь инксонза, а Петранди бта шумос макссь. И, шарьхкотьк, Макар мархта Сандорга теенза улихть шумуфт.
Кандсть мазыня. Копордазь, ляпомсть. Петра корхтай:
— Мезе тя алянди? Да авативок, кода няйса, козовок ашезь ара. Макск, Наумовна, омбоце кемоннятьке. Пандсаськ... вдь аф най шава зепт якатама.
— Максса... мезе ина мархтонт тиян? — мтордсь Алдакась.
Симовсь ярмаксь. Квартиранттне эрекласть, весялгодсть, кармасть пеетькшнема-рахсема. Наумовна иредсь, ушедсь прянь шнафнема:
— Мон тя кудса азоравась! Мон! — И шавозе мокшендаса мяштенц.
— Миньте корхтатама, Наумовна, тон азоравась, — полаткшнезень валонзон Петра. — Кда мон улелень тяса азорсь, мярнамацень, што ли, кулхцондолень, кунара ни ульцяв панелихтень.
— Мезе? Мезе? Ашихтень куле.
— Мезевок аш. Ванды тейне политинформация тиема, морафтолеть мезевок журналстот.
         Сокорхненди каннесть эчке журнал. Килода лама сталмоц, Ожеговонь валксонц лаца эчкоцоль. Петра максозе журналть Алдаканди. На, кле, луфт.
         Алдакась аньцек шукиезе прянц, мезе-бди салава мтордсь шалхкалонза. Сиреня ни, а прянц васькафтфтозе, копордавсь. А омбоце шиня лац-ряц афи мяляфтсы, кати шумос макссь, кати тяфтак каванязень, кати сонць шумос сявсь ярмак.
— Тяни маматама Наумовнань пенсиястонза, — пеетькшнесь Петра.
Но пенсиянц Алдакась кафта пяли ашезе яфие.
         Квартиранкса пандсь ошень кассав. А эрявсь нинге лездомс аф поводнай цёранцты. То ЛТП-в чапиезь, то тюрьмав. А сокор тядянц кядьста коль вешсь посылкат. И Алдакась, кода, улема, эрь тядясь, кучсесь сидеста и цёранц, и ялганзон лемс.
         Мольсь пингсь. Миньге касоме, ёнияме, лия сельмоса кармаме ванома эряфть лангс. И визькс ульсь тейнек кой-коста, мес аф лац тиендеме. Ужялькс арсесь тейнек сокор Алдаканьке. Сяс, мзярда кармаме трудендама, велестовок сашендоме варжамонза. И, шарьхкотьк, аф шавонь кятть, гостинецькатка каннеме. А эсь паньфкяти, конань усксеськ велеста, Алдакась сядонга пяк кеняртькшнесь.