Сембось, мезть няйсак...

Сембось, мезть няйсак — тя вдь аф виде,
Тон онозот повоть, сяс ёфси тят пеле.
Вов тон лият и вярде модати ванат,
Но каттядязь вийхне тонь, и тон праят...

Веляфста ащат тон копорцень лангса
И няйсак, кати-кие озась тонь ваксозт.
Лезды тейть стямс и мархтот корхтай.
Мезе тят кизефте — семботь сон содай.

Няфти, ков молема тейть сяда тов,
Тона пандть шири, коса няеви лов.
«Тят кема ломанти, кинь мялец шавомс, —
Мярьги тейть, — эздонза эряви ласькомс».

Но аф кенерят тумс корхтайть ваксста,
Таргасы пееленц, туй мельгат ласькозь.
«Тят веронда мезтивок — куломати, вети...»
А сонць кундатанза тонь — и клдомаце веры.

И вов сргозят тон кельмаза ливозьса,
Вальмяцень ала суви-аварди пинеце.
Онце ётай, но аф каттанза пелемась,
Пелькс оду матодовомась, ононь няемась.

Содасак тяни и шарьхкодьсак тонць,
Няфтекшнесь мезе веньгучкань онць:
Аф кармат верондама тон кинди-повсь,
Пеельсь аф верыяй эста, аф архтови ловсь.