Салавань кельгома

Грачёжень Алдась аф кунара калмазе кельгома поланц. Колмогемоньда лама киза эрясть кельгозня-ладязня. Авать ашесть кенерькшне коськомда сельмоведенза. Ськамот эрямась — «упаси, бох». А иттне ошсот. Фкясь гайфти, кле, тядяй, киртть, омбоцесь телефон пачк ужяльдьсы. А сай весь, тошнась фатясы: хуш сельмоня конель. Кода Микольфтома эрямс - кати?
         Фкя шобдаваня стясь Алда, лиссь ушу. Перяфкссонза ломанень сереса букваса сёрматф: «Зайка, мон тонь келькте!» И кафцьке пяльге рисавафт седихть.
— Осподикай, кие тяфта ёньда лиссь? Миколезе аньцек перязе куломдонза инголе. И на тейть, пяцказь, гастязь, — лаподезень кафцьке кядензон Алда.
Каршек кудса эрясть кафта од стирьхть. Алясна тусь лия аванди, касфтозень синь тядясна ськамонза.
— Тя синь «жанихснон» китнезевсть кядьсна, — арьсесь Алда. — Молякан, пеняцян.
Тядясна, Ташта веленянь Машась, каршек эряй авать васьфтезе пеедезь.
— Месть якат, Алдакай? — кизефтезе авать, кодак ся сувась ширезонза.
— Пеняцяма сань, Маря стирняй. Тяфтаковок седизон аф пара, а тяса сембе перяфксозень гастязь.
— Няине, няине, — азозе пеедезь Маша, — кальдявста кие-бди тись.
— Тонь кудсот эряйхть од стирьхть и, кода мон арьсян, тя мельгаст пани цёрасна тянь тиезь. Оду-аш кинди.
— Мес тяфта арьсят, Алдакай? Кядьта вдь ашить кунда?
— Видеце, кундамс ашине кунда, но кинди ина эрявкстсь монь перяфксозе тяфта вадендемс?
— Кода - кинди? Монга ськамон эрян, тонга тяни удават. Кись седизонк панжада. Пади, улихть стамотка, конатнень миньге солафтоськ седиснон. Ашезь сата смелшисна азомс, вов и тяштезь.
Грачёжень Алдать ашесть кирдев сельмоведенза.
— Ну, аердамайть, Маша. Кода кяльце шарфтовсь тянь азомс. Миколезень ловажацка нинге ашезь кельме, а тон пяльдят месть-повсь.
         Алда аф азовомшка кяжиясь. Ожу, арьсесь, рахсефттядязь лангсон. Кяженьбачк авась гайфтсь полицияв. Сон авань ёньцонза арьсесь, што полициясь эстокиге кармай вешендема обжаенц эса. Но сась участковайсь и ушедсь ёнензон штама. Тыры-пыры. Тонцьке, кле, од стирькс улеть и женихне, пади, аф тяфтамот ёрясть. Цёратне отт, версна сангаст лаказь лакай. А прясост варма. Повихть кядезонк, сялдазснон пувордасаськ. А мзярс ашеськ кунда - тят тяшне заявления.
Алда яфодезе кяденц, атказась участковайть лезксонц эзда.
         Омбоце шиня архтозе перяфкеонц сонць. Арьсесь, тянь мархта сембось и аделави.
         Но пинге ётазь перяфксть тага пяцказь. Сёрматфсь лияль: «Алда, ши валда - келькте». Сёрматфть песа колма сединят.
— Кие тя тяшкава кельги, а пря аф няфти? — кизефнесть ломаттне фкя-фкянь.
— Миколенди тяфта афоль арьсефтев, — рахсесть кой-конатне.
           Грачёжень Алдась ёфси юмафтозе вень удоманц. Сембе курняса тиезь рахсема вастокс.      Кие пильгосуронцка афолезе тие, сявок корхтафты эсонза. Мярьгат, авась шуры-мурынь тефт тиендсь или киньге мирденц ворьфтезе.
— Улема, тя Пулькань Иванць, — абонкшнесь удавась. Межанкса сялонкшнеме, вов и панды кяж.
           Ашезь карма Алда киндивок пеняцяма оду. Архтозе тага         весть перяфксонц.
Сонць - и сюцесь, и сюдось, а тевонц тиезе.
— Тянди пе аф ули, мзярс     аф кундаса тешендайть, — арьсесь авась красканц урядамста, — но мон сяка ванфтте.
         Шоподемшовор сявсь кядезонза пешуфта, лямбоняста щась и кармась перяфксть омба боксонза учсема. Ащесь тяфта фкя илядь, омбоцеть... Колмоце илядть кулезе, кие- бди мольсь ширезонза, стакаста тарксезе ваймонц. Алда салаване лиссь перяфксть фталда и кодак ишколдасы аф содафть пешуфтаса каряз ланга. Ся тозк и велясь.
— Ва-а-ай! Ломань шавонь, — ушедсь пешкоткшнема авась.
         Ушеса шобдаль. Кие валяндась модать лангса-ашезе сода. Ласьксть шабранза. Ётксостоль каршесонза эряй Машаське.
— Мезе лиссь? Мес пешкоткшнят? — дивандасть ломаттне.
— Ломань шавонь...
— Да кинь?.. — Пулькань Иванць кармась сардонянь чиркиема. А тоса кайгиста рахазевсь:
— Опа... Вов и повсь перяфксонь гасниське.
— Кие тя, Иван?
— Чамбур атя?!
— Кинь лангс афи арьсят. Сонцень величествац Чамбур атя, — таргазе Грачёжень Алдась. — Шиса хоть, ваймонц тарксесы?
— Тарксесы, тарксесы. Сельмонза, бта атя катонь, шобдасовок пиндолдыхть.
Атять кеподезь пильге лангс.
— Эх, Сандор патяй, Сандор патяй, — аварьгодсь Алда. —Мон тонь путнихтень цебярь ломаненди. А тон монь конашкава обжамайть.
Чамбур атя мст-мст шалхксонза, а меле вайгяльге макссь:
— Ах, Алда, Алда. Мон сань тейть кельгозь. А тон кода васьфтемайть?
— А кода ина эряволеть васьфтемс? Кшиса-салса, што ли?
— Солафтыть, Алда, седиезень. Тундань ловкс солафтыть...
— Кодама эздот «жених», Сандор патяй? Кизодот мзяра?
— Тон монь кизонень тяйть лувонда. Монь ваймозе од цёрань, кельгома веши.
— А монь седизе сяряди Миколень инкса, кодавок аф верондай, што сон аш шиса.
— Алда, надиян, пади, ляпоми седице? Муви тееньге вастоня тоса.
— Ламос сави учсемс, Сандор патяй...
— А мон ковга аф эряскодан...
Ломаттне кайгиста рахазевсть. Мзолгодсь Грачёжень Алдаське.
А Пулькань Иванць и корхтай:
— Красканек-мезнек тяниёк атясь вятема видеста участковайти.
Алда яфодезе кяденц:
— Аф эряви. Минць эсь тевоньконь якафтсаськ.