Рьвязенди виденцяма

Ульсь пинге, тондейть мярьгондсть мазы Аннась,
Розь пулфокс эста ронгце ульсь сюлмаф.
А тяни пелезь ваномазонк ванат,
Мес шама киськце сърмоса китькстаф.
И сёралце, няк, ламода шувалгодсь,
Сувасы сонь ши ётазь шаржу тюссь.
А молемстот эрь аськолкскяце сталгодсь,
Сяс отькорьшице визделгодсь и тусь.
Вдь роди нинге ёфси аф кунара
Тон алянь кудса учеть – сайхть кудат,
А вов ни унок ваннинякс тон арать,
Аф тячи-ванды «неже» пес кундат.
Кудъётконь тевс коль кярьмотькшнят лияста,
А, видеть азомс, лангсот ащи пирьфсь,
Аф кенордазь эрь шицень вятят саста,
Хуш оцюшкац кядь вийцень лафчемсь-кирсь.
И сельмованфце ношками валомня,
И унокть лаца келькф тейть маннай ямсь.
Шить учи эсот вальмя алдонь скомнясь,
Веть арьсемань эрьхкс вайсят зарянь стямс.
А шобдава, козк вальмя глянцень пачка
Шинясь кияксу ёрдай сюролдат,
Шкайть Шачфтыенцты эняльдят эсь пачкат
И ликонянцты комат-сюконят:
Шумбраши аньцек кядьстонза и анат,
Да пачфнельхть иттне кеняртьфти кулят…
Тон тейне тячемс лядоть мазы Аннакс,
Инь кельговиксокс улеть и улят.