Рана шобдава тунда

Ванан перьфпяльге, — кеняртькшни седись!
Зарять толоц валом виензай,
Сельмованфозон тюсоц сонь педи,
Трактор паксяса сокай-инзай.
Велхкссон келемкшни менелень сенемсь,
Терди-серьгяди эсон кинясь.
Сенем котф лаца ляйняньке венемсь,
Шиньгучкать штама сай сей шинясь.
Ведец ляйняньконь ару и калу,
Аньцек калонза томбас прдафт.
Пади, ворьгодсть-кяшсть каль юронь алу —
Варжайть тоста синь таргамс-кундамс!
Молян-аськолян шачема крайган,
А лугась кодай пиже ковёр.
Морай нармоттнень вайгяльсна кайги,
Монцьке коряваст ушедонь мор.
Кеняртьф ваймостон паваззе шуди,
Пец вень онозень зарянь толс палсь.
Ляй трваса, няк, моразевсь нюдись:
«Пандя пингть стак юмафнить — сак калс».
Эх, мрдан куду ульмонень инкса,
Кундан кядзяярь эшка сигал…
Тейть сюкпря, Шкайняй, од шицень инкса,
Мес Тон кеняртькшнемс максоть туфтал.