Од тяште лемозт менельса крьвязсь

Од тяште лемозт менельса крьвязсь.
Сиянь сонь валдоц палы кизень вельхксса.
Од Ломань Шкайнясь масторлангу макссь,
Сон сембе кальдявть седистон монь нельгсы…

Тон мзолдат и валдоптсак перьфпяльть,
Тя мзолфкясь тейть конашкава ладяй!
А тячи, панчфкяй, тейне учсеф валть
Мянь моразь морайть васенцеда – «тядяй»!

Каст, ёнияк и пара ломанькс ульхть.
Шкайть лемоц кадок ули ваймозт мала.
Тонь мяльхне катк бславамаснон муйхть
Святой Иоаннонь ару кяденц ала.

 Катк улихть тефне аруфт, кода ляйсь,
Катк ули кице павазти аф перяф…
И мяляфт, цёрай, тондейть Вярдень Шкайсь
Казсь питнидонга питни казне – Эряф!..