Мялямонь мрдафты

Ветеранонь совету кочкавсть ингольдень баярнятне. Кле-мле, пингтост лама. А сон коса-бди ётафтома.

— Аф, аф стапт тяни баярнятне, — мярьгсь Клюшкин ялгась. — Прянь вятема аф маштыхть, эсь валснонды аф азорхт, арьсихть аньцек эсь зепснон колга. Минь, ялгат, аф тяфтаптолеме.

— Аре ни пара, — какардозе Клюшкинонь Кавин ялгась. — Миньге ётксонк ульсть и лиянь лангс мутендайхть, и салавань тевонь тиихть.

— Кали, Семён Николаевич, ульсть? — кизефнесь дивандазь Клюшкин.

— Ату тон аф содасак, фкя пингова вдь трудендаме.

— Аф, аф мяляфтан мезевок, Семён Николаевич.

— Ну эста кулхцонтт, мрдафтса мялямцень, лятфтасайне «паронь арьсихнень» лемснон.

Кавин вадердазень шаржу шяярензон, тись сурьёзнай шама.

— Ну-ка, лятфтака, сире клдом, мзяра киза исполкомонь председателькс покодеть?

— Комозьшка киза ули.

— Тя пингста мзяра лангозт анонимка сёрмадсть?

— Лама, пяк лама. Сембе афи лятфтавихть.

— И вдь кит анонимкань тяшнихне.

— И кит, Семён Николаевич? Мон лац-ряц афи содасайне.

— Саты дураконякс тиендемс. Содасайть, конешна, но каршезост мезевок ашеть тиев. Оцю нармоттельхть. Синь кядьсост властсель. Тонга, конешна, оцюволеть баярнясь, но…

— Кой-мезе кулендень пара ломаттнень эзда. Но эста ни поездозе туфоль.

Кавин ушедсь лятфнема. Тяни тя рахафты история, а эста ой да вай. Эрь анонимкась пяле эряфцень сяви, куйкс эсот потяй.

Партиянь районнай комитетса мольсь пуромкс. Васенце секретарсь, Кабайкин ялгась, пуроптозень инь мала ломанензон: бюронь члеттнень, замонзон, отделонь вятихнень. Шинь повесткаса фкя кизефкс — Клюшкинонь лангс обкому сёрматф анонимкась. Эзонза сёрматф, што Клюшкин — стама-тяфтама, куштаф вайме ломань. Аф машты кадратнень мархта работама, ёрясыне кафта пяли лима-сюна валонзон. Арьси аньцек эсь прянц и зепонц колга. А Кабайкин, кода васенце секретарь, алясь золод, сафтсы эрь тевса. Аньцек Клюшкинонь мельге ваны пяк кальдявста, кржа веши кядьстонза, кржа сюцесы, сяс и исполкомонь председательсь лисенди кедьстонза. Сон эряви овстамс, путомс вастс.

— Виденцяда, инекуйхть, кие валозе ошксса Клюшкин ялганьконь, — пешкодсь васенце секретарсь. — Тя анонимкать лия ломатть ашезь сёрмада. Лиятненди сон афи сёрмадови. Эсонза лятфтаф факттнень содасазь ся ломаттне, конатнень мархта озсетяма фкя шра ваксс ярхцама, конатненди панчсесаськ ваймоньконь, азонкшнесаськ секретоньконь. Стане вдь, Фитилькин ялгась?

— Тон месть, Иван Викторович, — абондсь омбоце секретарсь.—Монь лангозон, што ли арьсят? Да мон, да мон Фёдор Сергеевичень инкса ваймозень максса.

— Мезенкса тяшкава крьвязеть? Мон тонь кизефтихтень, Фитилькин, мезе арьсят тя анонимкать колга. Кулхцонттядязь, азк эсь мяльцень.

— И азса. Сонь тяштезе пяк кальдяв ломань. И ёфси аш ётксонк вастоц. Содандярялине, монць сязелине прянц. Тячи Клюшкин, ванды мон… Тя аф ломанькс, тя аф алякс.

— Коста содасак, Фитилькин, што аля сёрмадозе. Пади, ава кодамовок. Райкомса, исполкомса вов мзяра эздост. Кие-бди, пади, сельмоди Клюшкинонь лангс или аф тёждяста тарксесы ваймонц. Аф аля, а орёл.

— Мон коста содаса, аля, ава сёрмадозе. Кие ашезе сёрмада, тевсь аф рахсемань. Кинь мяльс туй, мзярда ошксса валонттядязь. Тя аф ломань, а аеркс. И кда содалине кие, кядьге оду афолень венепте, фкя шра ваксс ваксозонза афолень оза.

— Шарьхкодедязь, Фитилькин. А кода и мезе арьси колмоце секретарсь, Курилкин.

— Моньге мялезе тяфтама, Иван Викторович. Кильтьфтяма фкя крандазс, усктама эсонза фкя лаца. Но улихть ётксонк ломатть, конатнень ломанькска аф шарфтови кяльце лемдемс. Тяфтамть ваксс монга афолень оза и кядьге афолень венепте.

Корхтамась мольсь куватьс. Ломаттне корхтасть виденцякшнесть. А меле эсь валонц азозе Кабайкин ялгась.

— Мезе ба афолеме корхне тя пуромксса, кагодсь сёрматф, обкому максома ответ. Клюшкин — алясь, конешна, цебярь. Но партиянь районнай комитетти сявома сон кеме контроль алу, сяда сиденяста кизефнема кядьстонза прянь вятемац, тиф тевонзон инкса. Кие тянкса, кеподесть кядентень.

— Сави ни кеподемс, лиякс аш кода, — мярьгсь Фитилькин.

Пингонь ётазь содавсь, што тя анонимкать партиянь обкому арьсезь васенце секретарсь Кабайкин и Клюшкинонь заместителец Каверкин. А синь лемстост тяштезе Каверкинонь рьвац, Маня, рузонь кялень цебярьста содайсь. Мзярда содазь Фитилькин мархта Курилкин, пяк каендасть. Кинди ёразь кядьснон аф венептемс, кинь мархта ёрасть фкя шра ваксс аф озамс. А тиезь тянь сянкса, штоба Клюшкин салдорксонц менельса афолезе канне, Кабайкинда оцюкс афолезе лува эсь прянц, вастонц мельге афоль ванонда.

— И тон тянь ашить сода? — кизефтезе Кавин Клюшкинонь.

— Содайне, — отвечась тонац. — И аф аньцек тянь.

Весть сась ошста журналист. Видеста азомс, тердезе сонь Кабайкин. Клюшкинонди и корхтай:

— Алять мялец сёрмадомс исполкомть работанц колга. Васьфтьк лацкас, каваняк, штоба цебярь материал тяштель. Содасайть вдь кодапт журналисттне. Ашстовок мезе мяльсна тиихть, а кда муйхть туфталнят, аф моли ярмакокс титядязь.

— Шарьхкодень, Иван Викторович, старандама карман.

Журналистть Клюшкин видекс васьфтезе пяк цебярьста. Симдезе-андозе, банясовок парязе. Аньцек ни аванят мархтонза паряма ашезь вяте. А, пади, и вятнесь. Тумстонза конаксь ашкорязе-ктморязе Клюшкинонь. Кле, мзярдовок парцень аф юкстаса. Аф сидеста васьфнян тяфтама цебярь ломань мархта.

Кафта шида меле Клюшкин панжезе газетать и цють боком ашезь веля. Кода аньцек ашезе пахеря баярнять колмочесень ашкоряец-ктморяец. Клюшкин — Кабайкинонди.

— Тя, дяряй, аля, кияксонь штама левоштам, Иван Викторович. И симдине, и андыне, и баняса паряйне. Максонь машинавок ошу меки ускомонза. И на тейть, аксордась шамазон. Тяни аф штаван, аф нардаван.

— Эх, Клюшкин, Клюшкин. И симдить, и андыть, и ошу ускфтыть. А вов похмельянц алять ашить правонда. Стясь шобдава, салдорксоц пачк лазови. А сяряди пряса, шарьхкотьф, кодама статья сёрмады.

— Нинге пряцка тейне пчкафтомаль, ошу шобдава, што ли, сюлека мархта ардомаль.

— Мес ардомаль? Мархтонза максомаль.

— Кафта сур ёткса пяльхке шалхкалонза эцемаль, аф пряц пчкафтомаль.

Клюшкин шарьхкодсь, што Кабайкин рахси лангсонза, аф арай ширезонза, аньцек кичкоряй-мичкоряй, апрякай-сюды эсонза.

— Эстовок баярнятне пархтольхть, — ашезь сетьмосе Кавин. — И митядязь-раматядязь, и лапатядязь-цяпатядязь. А повсост кев кирдихть.

— Видеце, Семён Николаевич. Кальдяв ломатть ульсть и кармайхть улема. Но цебярь ломаньда сяка сяда лама. И минь синь инксост.