Кичкор Анна

Ётак педа-пес Синюха велеть, а Кичкор Аннать кодяма весяла ломань аф муят. Ветеце алять мархта эряй. Лия авась палянц тяфта сидеста аф полафнесы, кода Аню мирдензон. Ётксост эрь кодаптольхть, кой-конанц лятфтамста — «мст-мст» да пеедезеви нльне сонцьке. Вов и корхтафтыхть эсонза велень аватне фталганза: «ш-ш-ш» да «ш-ш-ш». Но Аню эсь колганза ся корхнематнень лангс аньцек рахси, кле, сельме каяйхть лангозонза сифтем прятне. Сявомс Пизелонь Марфать. Рьвакс лиссь винас навсеф цёранди, кона якась велева и стопкат кочксесь кудга. Марфа сире стирель, рьвакс сявиец пяк ашель. Симнезе-аннезе, а тоса эсь кудозонза эряма нолдазе и кафта шабанят эздонза шачфтсь. Явась алять иретьфоц и корхтай авати, кле, аф пара тяфта, Марфа, тейне апак работак. Мзярс карман фталот ащема? Шабатне касфтомат. И тусь ошу оцю ярмаконь добувама. Тусь и юмась, мярьгат, ведьс ваясь. Комозьда лама киза ётась, а пяльденза тя пингс аш кодамовок куля. Хуш фкя конфетка кучель цёранзонды. Касфтозень аляфтома авась идензон, рьвяяфтозень. Лама мезе савсь няемс теенза. Аньцек ломань ёткса велень кулятнень эзда озсель аф ламода седиец: аф ськамонза сонь тяфтама сюдоф эряфоц. А Сюзял Марясь? Сонга корхтафты, рахси-пеетькшни ломатть... Лиссь Сюзялонцты рьвакс, ковшка, виде, эрясть лац, содайсна ашель. А тоса—мезенди эрявсь мирденцты Наста бабань шава кептерняц? Кептерське ни стамоль, базарса фкя цалковай питнец. Но бабась сашендсь кудозост и гразязе од алять, кле, няедязь, кода сявить. И кда аф мрдафтсы, пеняцяй участковайти. Тяфта и тись. Колма кизот государствати штрафт паннесть. Сембе Синюха велесь рахсесь Сюзял Иванть лангса, лемсонза лоткасть теенза мярьгондемовок. Тячис «кептернякс» лемнесазь. Кали Анна тяда меле рахсеви Марянди? Катк ламоль авать мирдьтонза, но шава кяскавса лапиефт ётксост ашельхть. Сембе удалафтольхть, сонь кельгозь и ярмакснон лангозонза ашезь ужяльде.
         Васенце мирденц мархта эрясть колмошка киза, кельгозе алять Анна ёжефтома. Кельгозе мирдец сонценьге, эрясть ладязь. Зрнянь суркст, пилькст казендсь, ваймосема Сочить эзга, Египетка усксезе. Но мзярда и кодама равжа ката ётась ётковаст — ашезе смека. Кельгомац сокоргофтозе авать ся пингть. Синь явсть. Митя, улема, мусь сяда удалаф Анна.
         Омбоце мирдец плотниколь. Сембе ширде сафнезе алясь. А ярмакнень-кяскавса куду каннелезень. Щазе-карязе Аннанц оцязоравакс, а сонць сёксенек-тялонек якась сяка ливозю фкя фуфайкасонза. Кармась Анна кепсема шалхконц вяри, налхкфтома сельмонзон лия алятнень мархта. Базар шиня кельгозе ломаттнень ёткса якаманц и няфнемс прянц. Весть лоткась медень мишенди алять ваксс. Валня тяста, валня тонань пяльде — тусть фкя-фкянь мяльс, и алясь макссь теенза ярмакфтома пяле литрань банкаса медь. А кудса Анна веньберьф ашезь мушенда васта, ашезь уда. Сельмингольденза ашесть явонда таза ронга алять толцятконя мархта палы сельмонза. Мирдец кудса ашель, шабра велеса ялганзон мархта шапсть срупт. Шобдава сон пякстазе кудонц и тусь од кельгоманц вешендема. Алясь Аннань примазе. Сембось тяса мялезонзоль: алять оцю и валда кудоц вайсесь садонц потмос, нешкоперецоль. Комозьшка мешкуднятнень перьфке ашезь лотксе мешень зойфсь. Срмазе конянц, мзярда илять панезь стадать. Ащесь и ванць, кода алясь куродсь кафта потьцеви траксонзон эса, а тоса якась вазнянзон инкса. Анна трудендаманц ашезе кельге. Мани кизоть лаца курок ётась кельгомасна, и Анна лядсь ськамонза. Алять кудс эрявсь азорава, юрхтонь кирди-ванфты. Ламос горявакшнесь Анна, ламоксть срхксесь Санькань пяли, ёрась кядьстонза вешемс прощеньгя. Аноколь тиендемс сембе кудъётконь тефнень. Но сяка тев кати-мезе кирнесь эсонза. Улема, нолашиц. А тоса кулезе, алясь сувафтсь кудозонза ава. Эста васенцеда аердавсь Анна алятнень эзда, Санькада меле ашель мялец варжакстомска киньге лангс, куштась ваймоц.
         Пингсь пчкафтозе. Удозе сембе удоманц тялонда, кржа коза лисендсь кудста шитьке. А сась тундась—лямбондсь ушесь. Менельста весяласта ванонды шинясь тердсь соньге эсонза ушу ломаттнень ёткс. Маень фкя шиня пякстазе кудонц и срхкась сяка кинзон-янонзон эзга лямбе шири. Ярмаконза ульсть. Тоса и васьфтезе нилеце мирденц. Ускозе Синюха велезонза, тага сядонга абонфтозень велеряйхнень. Тяйне сельме алясь кати узбеколь, кати казахоль. Ингольдень военнай. Аннань коряс сиреняль, но няевсь нинге отькорьста. Сембода пяк авать мяленц петнезе военнай пенсияц. Тяфтак, што ли, кзняфнезень инголенза сельмонзон морять трваса, няфнезень апак визтть сембе удалаф вастонзон? Налимонь (тяфта алять лемоцоль) сяшкава шорязе прянц, што сянь мезецка аф ужялель авати: вятнезе кинотеатратнень эзга, ашесть лисенде ресторанцта. Но мезе лиссь Налимонь мархта велеса, мес тяшкава полафтсь? Ушедсь ярхцсема ськамонза, сонць пидесь-панць. Лоткась Аннанди ярмаконь макссемдовок. Аф корхтавсь Налим, аф кудста паневсь. Велень аватне тага фталганза «ш-ш-ш», кле, повсь Анна, пади, тяни топоди мирдьта... Катк варжасы тяфтама эряфтьке, а то эляк арась! Мзярс можна пеетькшнемс эряфонц лангса?..
         Анна прязонзовок ашезе путне, што васьфти тяшкава смузю аля. Улема, лама киза служамась тяфтамкс сонь тиезе. Мезе ляткшнесь авати?
— аньцек сюдомс сонь эрь ярхцамстонза. Кати сюдомац пачкодсь, кати мезенкса лиянкса—кизода меле Налим мяндевсь крьхцякс, а тоса ёфси васта лангста лоткась стяшендомда. Лафчемсь Аннань седиец, алять аннелезе куцюняста, ярмаконзон лангс рамсель лекарстват, якась мельганза. Арась весть малазонза, а сон ваймонцка ни аф тарксесы.
       Велева тага корхнематне тусть, кле, кода стане лиссь - шумбра алясь фкя кизоста кулось? Воражаенди тят яка - тя Анна мезе-мезе тись мархтонза. Тякокс арьсесь участковайське и—Налимонь ловажанц ускфтозе моргу. Ня валхне салмоксокс пезондсть авать седизонза, но алясь эрявсь калмафтомс. Коса эрясть раднянза, Анна ашезе сода. Тянь колга синь ашесть корхне вестенге. Лезксонкса авась мольсь Шамур Васянди. Цёрась покодсь шофёркс, эрясь ськамонза. Мзярда авась озась ваксозонза кабинав и мярьгсь тяникиге ардомс больницяв, Вася абондсь.
— Сталботь, мархтот кивок лия аф моли? Ловажась кеподема-валхтома, машинати кандома...
— Васёк, кали аф лездат тейне? — чипордазе Анна цёрати сельмонц.
— Шумос аф лядан. Вася ульсь ся ломаттнень эзда, кит больницять эзда пельсть, кода толда. Няи веры пакшкя - ёженц юмафтсы. Мезе ни корхтамс моргть, кулоф ломаттнень колга...
— Мон, Аннушка, лездолень, но каба эстейне лездомс афоль сав.
— Али пелят, аф алят? А мон ни лангозт сельме путонь. Арьсень, калмаса Налимонь, Васёконь кудозон нолдаса мирденди. — Анна шаштсь цёрать ёжес и сери мяштенц токафтозе лафтузонза. Шофёрсь цють руленц ашезе нолда кядьстонза. — Тяни няйса, што алят, — пеедсь авась. — А кулофнень эзда тят пель...
         Кода корхнихть русне: «Не было бы счастья, да несчастье помогло». Анна нолдазе кудозонза ветеце алять. Тя кулять эзда Синюха велеса аватне цють ашесть прашенда ляпе вастснон лангс, а сире стирьхне козк панжезь кургснон, станяк и якайхть панжадонь куркт, меки аф сёлговихть коданга. «Кельгса. Да-да, кельгса», - отвечакшнесь Анна кажнайти, конац эздост ёрась нажядемс малазонза.
         Полафтсь Васёк, сон тяни Василий Иванович велеса. Полафтсь Аннавок, да и пинге полафтомс авати. Корхтайхть, эряйхть павазуста.