Хуш мяльс корява тейне сёксень тюссь...

Хуш мяльс корява тейне сёксень тюссь,
Но мес тяшкава эвфнесамань сёксесь?
Сон вальмалон съняра лопа усксь! –
Мъзярда тумда инголе тов лотксесь.
 
Сон адерляфста дробить кштись од стирькс
И ваймамонга скомнязень лангс озсесь.
А пиземняц шуване сюрет кштирдсь,
Исть кирдев сельмоведнянза – тусть лозьфса.
 
Куватьс учсь эсон – орта лангс лисян,
Сон ёрась каземс тейне мазы лопат.
Тусь…  мельганза кадсь лопаса кяшф ян,
И перьфпяльсь, мярьгат, апак учсек шоподсь.
 
И эсток мазы тюсне оласть, начксть,
Монь седиезон ацавсть карьготьф каваркст.
Ужяльдезь ванонь вальмя глянцень пачк,
И вальмяневок, тейне-арам, авардсть.
 
Тусь сёксесь, тяни курок аф мрдай,
Куд инголен кадсь лопа маронь казненц.
А катозе печуркаса мрнай,
Нать, тялоть маряфтсь – колганза ёфкст азондсь.