Инжи
Налкихне:
Кузьма атя
Наста баба
Миколь
Тялонь шобдава. Кузьма атя мархта Наста баба озафт шра ваксс, инголест пачат. Кудонголе маряви калдорф.
К у з ь м а а т я. Ся кинь шта тага шяйтаттне кандсть? Ульцяса сельме-шама аф няят.
Панжеви кенкшсь, сувай шабра велень раднясна Миколь.
М и к о л ь. Шубратада, азорхт! (Валхтсы прястонза лову вазенц и шукадьсы кенкш лангс).
Н а с т а б а б а. Шумбранят, тонцьке, Миколь. Ётак сяда куроконе, озак, эшть, а то, ванан, кяттневок эрькстасть.
М и к о л ь. Аф аньцек кядне, монцьке марнек эрькстань. Цють пачкодень. Сняра ловда марась, афи молеват. Фкя пильгозень таргаса, омбоцесь ваяй. Прянь сязи давол срхкась.
К у з ь м а а т я (цють кулевиста). Пара азор тяфтамне пиненцка аф нолдасы. А тонь,улема, кудста панедязь.
М и к о л ь. Мезе корхтат, Кузьма? Ашихтень маря?
К у з ь м а а т я. Пяк пара, мярьгонь, што сать.
М и к о л ь. А-а, монцьке пяк лажадонь. Арьсень-тиень, мярьгонь, молян варжасайне раднянень.
Н а с т а б а б а. Эрь, Миколь, фатяк снярс пача бока, а мон цюланцта позаня сувафтан.
М и к о л ь. Позась пара, но тейне эйндаф лангс эсь паньфкясь сяда ладяль. Кода лекарства ваделезе потмозень. (Козкстади.)Вай, улема, сярятькстонь.
Н а с т а б а б а. Эста вешса прдафкскязень. Сярядемась аф пара. А тон, Миколь, ярхцак, ярхцак пачада, тят визде.
Наста лиси цюлану.
М и к о л ь. Ярхцань ни, танцтихть. Кафта мяк сивонь.
К у з ь м а а т я. Сивоть аф кафта, – вете, но сяка ярхцак.(Стяй шра ваксста, сонць моторды.) Маряк, ковшка ашезь анне, топодемаське аф сявсы…
Наста баба повбяльсонза сувафты сулеканя, каяй инжити пяле стопканя.
М и к о л ь. Вай, конашкава пара, што повонь пялонт. Тинь – монь сембода мала радняне. Сюкпря, мес тяшкава лямбоста васьфтемасть.
К у з ь м а а т я (шарфтсы копоренц). Лямбоста. Кода ина… Содалеськ саят, голландканьконь кафксть уштолеськ. Эсь кядьстон бабась сяпинять шиненцка аф никсафнесы, а тянди, пожалняста! Мувсь раднясь!
М и к о л ь. Мезе корхтат, Кузьма? Пилене аф пяк кулихть.
К у з ь м а а т я (цють кулевиста.) Шта-кшнемс сиденяста эрявихть пилетне. (Кайгиста.) Мярьгонь, пяк пара, мес улихть тяфтама радняньке.
М и к о л ь. Видеце, видеце. Монга пяк павазуван. Пяк ни кельктядязь, стак афолень са тяшка васта. Простямасть, мес инголькиге латта ашень аза.
К у з ь м а а т я (шалхкалонза). А кда азолеть мезе? Тувоньконь, што ли, печколеме да шяняфкст лемозт пиделеме? Вага ни честьце пяк оцю!
М и к о л ь. Содаса, оцю честь тейне путтада, но ламос аф ащан, погодась кальдяв, шоподемс куду пачкодема. Эрь, Наста,
нюрьхтяк сулекаста нинге аф ламня, кда аф ужяль. Кузьма сяка аф кельгсы.
Н а с т а б а б а (каяй аф ламня). Шять, чайня лакафтан? Пелян сярятькстат. Симат-тият и срхкат валомне.
М и к о л ь. Эрь ина, лакафтт. А мон снярс вайман.
К у з ь м а а т я. Ваймак, ваймак, а то сизеть.
Миколь кувалгоды эзембряв.
Н а с т а б а б а. Вай, да тон месть калгода эземти мадоть? Лапотть диванть лангс.
Кузьма атя (кяждонза цють кулевиста). Или пянаклангс куцть, тоса сядонга пара.
Миколь (кульсы Кузьмань). Пянаклангс? Вай, радняняне, вай, кодама цебярьхтяда ломаттне. Куцян, эждьсайне пакарнень. Аньцек аф ламос, шоподемс куду пачкодема.
Миколь куци пянаклангс и аф лама пингта меле крназеви. Уды част, кафта… Азорхне кашт аф молихть. Малады обедама пингсь. Наста таргай пянакудста лям. Танцти шиньфкясь срады кудть келес.
Кузьма атя (бабанцты). Тят калдорфта, а то сргози, сави нинге лямда андомс. Эста афи паневи.
Н а с т а б а б а. Да кода стане, вдь радня. Вачеда што ли куду прважасак. (Малады цюгунти и прафтсы кядьстонза кеченянц.)
Кузьма атя (цятади клокса моркшти). Мярьгонь тейть, тят калдорфта.
Сргози Миколь.
М и к о л ь. Вай, матодовонь аф ламос. Аф мезевок лиссь? Бта калдорф марянь.
К у з ь м а а т я. Удок, мезьге ашезь лисе. Ся катоньке труба пряста комотсь.
М и к о л ь. Кудсонт танцти шиньфкя маряви. Наста, ся аф шапама капстань лям пидеть?
Н а с т а б а б а. Пидень. Валк, тоньге каванятядязь.
М и к о л ь. Лямнясь пара! Лямнять кельгса! Кунара ни ашень ярхцсе пянакудса пидефта.
Наста баба каяй сембонди лям. Озайхть шра ваксс. Миколь варжаксты сулекать лангс.
Н а с т а б а б а. Эрь, Миколь, чайда ашеть симе, матодовоть. Копородак ина лядыкскять, ярхцат-тият лямда и срхкат. (Комафтсы сулекать.)
Миколь топодемс ярхцай, варжаксты вальмава.
М и к о л ь. Вай, ульцяса даволсь сядонга вишкомсь, тяфтамне афи пачкодян. Учан аф ламняс, пади сетьми. А снярс вайман. Аф кяжиятада, кда меки пянаклангс куцян? Пси кефне, кле, копорень сярятьфть пчкафтыхть, а мон кунара ни муцсян пря.
Н а с т а б а б а. Да кодама кяж. Ваймак, Миколь, эжентть.
Миколь мады пянаклангс и тага матодови. Ушесь шоподи. Азорхне крьвястихть тол.
К у з ь м а а т я. Стяфтомаль инжись. Пяле веста, што ли, куду туй? Колма вайгяльбет вдь молема.
Н а с т а б а б а. Вай, да вдь ульцяса ни ёфси шобда. Ков прважасаськ венц лангс? А кда паксява молемста врьгасне сязендьсазь? Тонць маряйть, аф кунара ферматнень маласта кафта няйсть.
К у з ь м а а т я. Сама кицка ашель, мезень вишке тевоц тяса? Стяфтк и катк туй.
Н а с т а б а б а. Вай, да кода стане? Инжихть кудста аф панцихть. Катк уды, а шобдава прважасаськ.
Миколь сргози аньцек шобдава. Валги пянаклангста, щасы фуфайканц и лиси ульцяв. Аф лама пингта меле сувай.
М и к о л ь. Исяк матодовонь, а тинь ашемасть стяфта. Мярьгонь вдь, тейне ранане куду пачкодема.
Кузьма атя (салава). Сяс и эряскодоть.
М и к о л ь. А тячи сняра ловда марась. И даволське коданга аф лоткай. Видеть азыть, Кузьма, тяфтамне пара азор кудста пиненцка аф нолдасы. Арьсян, моньге аф паньцамасть.
Азорхне абондозь ваныхть инжить лангс. Сон вдь тиендсь пря, бта кальдявста кули.
Н а с т а б а б а. Кодама панема, ащек мзярс мяльце. Кие раднят панци?
К у з ь м а а т я. А лятфтака, Наста, кодама раднятама Миколь мархта? Сон вдь тонь ширдет?
Наста баба путсы нярезонза кяденц, арьсезеви.
Н а с т а б а б а. Тядязе азонкшнезе, кле, шабра велеса ульсь Вася щеняц, сянь ульсь цёрац, лемонц аф мяляфтса: кати Пётр, кати Илья. Сон тушендсь эряма Ростов шири. Кафтоль цёранза, конат мрдасть эряма тя аймаку. Миколь, улема, эздост фкясь, лац-ряц афи содаса.
К у з ь м а а т я. Миколь, кода аляцень лемоцоль?
М и к о л ь. Степан. Мон Николай Степанычан.
К у з ь м а а т я. А сон Ростов ширеса эрясь?
М и к о л ь. Мзярдонга аш. Сембе эряфонц эсь велесонк ётафтозе.
К у з ь м а а т я. А брадце хуш ули?
М и к о л ь. Аш, мон ськамонан. Тиндедонт башка радняневок аш.
К у з ь м а а т я (кяжиста ваны рьванц лангс). Эста кодама ина раднятама?
Н а с т а б а б а (киренчасыне лафтувонзон). Аф содаса.
М и к о л ь. А кинь мезень тевоц, кодама раднятама? Аф васенцеда вдь няйсамасть. Мон теенть най честь путнян, сашендан варжамонт. Эряви тейнек лацкас радняндамс. Лацкас и куватьскас! Сяс, кда, аф паньцамасть, ащан нинге кафтошка ши, ванат, и мусаськ-кочкасаськ юроньконь.
К у з ь м а а т я. Эрь, спасиба, честень путомда.
Миколь инжиендай сисем шит, но раднянь юрсна стаки аф мувихть. Тумстонза азсы, кле, кармай сашендома сиденяста. Эста и лацкас содайхть фкя-фкянь. Кальдяв, аф содамс раднятнень.
Кузьма атя
Наста баба
Миколь
Тялонь шобдава. Кузьма атя мархта Наста баба озафт шра ваксс, инголест пачат. Кудонголе маряви калдорф.
К у з ь м а а т я. Ся кинь шта тага шяйтаттне кандсть? Ульцяса сельме-шама аф няят.
Панжеви кенкшсь, сувай шабра велень раднясна Миколь.
М и к о л ь. Шубратада, азорхт! (Валхтсы прястонза лову вазенц и шукадьсы кенкш лангс).
Н а с т а б а б а. Шумбранят, тонцьке, Миколь. Ётак сяда куроконе, озак, эшть, а то, ванан, кяттневок эрькстасть.
М и к о л ь. Аф аньцек кядне, монцьке марнек эрькстань. Цють пачкодень. Сняра ловда марась, афи молеват. Фкя пильгозень таргаса, омбоцесь ваяй. Прянь сязи давол срхкась.
К у з ь м а а т я (цють кулевиста). Пара азор тяфтамне пиненцка аф нолдасы. А тонь,улема, кудста панедязь.
М и к о л ь. Мезе корхтат, Кузьма? Ашихтень маря?
К у з ь м а а т я. Пяк пара, мярьгонь, што сать.
М и к о л ь. А-а, монцьке пяк лажадонь. Арьсень-тиень, мярьгонь, молян варжасайне раднянень.
Н а с т а б а б а. Эрь, Миколь, фатяк снярс пача бока, а мон цюланцта позаня сувафтан.
М и к о л ь. Позась пара, но тейне эйндаф лангс эсь паньфкясь сяда ладяль. Кода лекарства ваделезе потмозень. (Козкстади.)Вай, улема, сярятькстонь.
Н а с т а б а б а. Эста вешса прдафкскязень. Сярядемась аф пара. А тон, Миколь, ярхцак, ярхцак пачада, тят визде.
Наста лиси цюлану.
М и к о л ь. Ярхцань ни, танцтихть. Кафта мяк сивонь.
К у з ь м а а т я. Сивоть аф кафта, – вете, но сяка ярхцак.(Стяй шра ваксста, сонць моторды.) Маряк, ковшка ашезь анне, топодемаське аф сявсы…
Наста баба повбяльсонза сувафты сулеканя, каяй инжити пяле стопканя.
М и к о л ь. Вай, конашкава пара, што повонь пялонт. Тинь – монь сембода мала радняне. Сюкпря, мес тяшкава лямбоста васьфтемасть.
К у з ь м а а т я (шарфтсы копоренц). Лямбоста. Кода ина… Содалеськ саят, голландканьконь кафксть уштолеськ. Эсь кядьстон бабась сяпинять шиненцка аф никсафнесы, а тянди, пожалняста! Мувсь раднясь!
М и к о л ь. Мезе корхтат, Кузьма? Пилене аф пяк кулихть.
К у з ь м а а т я (цють кулевиста.) Шта-кшнемс сиденяста эрявихть пилетне. (Кайгиста.) Мярьгонь, пяк пара, мес улихть тяфтама радняньке.
М и к о л ь. Видеце, видеце. Монга пяк павазуван. Пяк ни кельктядязь, стак афолень са тяшка васта. Простямасть, мес инголькиге латта ашень аза.
К у з ь м а а т я (шалхкалонза). А кда азолеть мезе? Тувоньконь, што ли, печколеме да шяняфкст лемозт пиделеме? Вага ни честьце пяк оцю!
М и к о л ь. Содаса, оцю честь тейне путтада, но ламос аф ащан, погодась кальдяв, шоподемс куду пачкодема. Эрь, Наста,
нюрьхтяк сулекаста нинге аф ламня, кда аф ужяль. Кузьма сяка аф кельгсы.
Н а с т а б а б а (каяй аф ламня). Шять, чайня лакафтан? Пелян сярятькстат. Симат-тият и срхкат валомне.
М и к о л ь. Эрь ина, лакафтт. А мон снярс вайман.
К у з ь м а а т я. Ваймак, ваймак, а то сизеть.
Миколь кувалгоды эзембряв.
Н а с т а б а б а. Вай, да тон месть калгода эземти мадоть? Лапотть диванть лангс.
Кузьма атя (кяждонза цють кулевиста). Или пянаклангс куцть, тоса сядонга пара.
Миколь (кульсы Кузьмань). Пянаклангс? Вай, радняняне, вай, кодама цебярьхтяда ломаттне. Куцян, эждьсайне пакарнень. Аньцек аф ламос, шоподемс куду пачкодема.
Миколь куци пянаклангс и аф лама пингта меле крназеви. Уды част, кафта… Азорхне кашт аф молихть. Малады обедама пингсь. Наста таргай пянакудста лям. Танцти шиньфкясь срады кудть келес.
Кузьма атя (бабанцты). Тят калдорфта, а то сргози, сави нинге лямда андомс. Эста афи паневи.
Н а с т а б а б а. Да кода стане, вдь радня. Вачеда што ли куду прважасак. (Малады цюгунти и прафтсы кядьстонза кеченянц.)
Кузьма атя (цятади клокса моркшти). Мярьгонь тейть, тят калдорфта.
Сргози Миколь.
М и к о л ь. Вай, матодовонь аф ламос. Аф мезевок лиссь? Бта калдорф марянь.
К у з ь м а а т я. Удок, мезьге ашезь лисе. Ся катоньке труба пряста комотсь.
М и к о л ь. Кудсонт танцти шиньфкя маряви. Наста, ся аф шапама капстань лям пидеть?
Н а с т а б а б а. Пидень. Валк, тоньге каванятядязь.
М и к о л ь. Лямнясь пара! Лямнять кельгса! Кунара ни ашень ярхцсе пянакудса пидефта.
Наста баба каяй сембонди лям. Озайхть шра ваксс. Миколь варжаксты сулекать лангс.
Н а с т а б а б а. Эрь, Миколь, чайда ашеть симе, матодовоть. Копородак ина лядыкскять, ярхцат-тият лямда и срхкат. (Комафтсы сулекать.)
Миколь топодемс ярхцай, варжаксты вальмава.
М и к о л ь. Вай, ульцяса даволсь сядонга вишкомсь, тяфтамне афи пачкодян. Учан аф ламняс, пади сетьми. А снярс вайман. Аф кяжиятада, кда меки пянаклангс куцян? Пси кефне, кле, копорень сярятьфть пчкафтыхть, а мон кунара ни муцсян пря.
Н а с т а б а б а. Да кодама кяж. Ваймак, Миколь, эжентть.
Миколь мады пянаклангс и тага матодови. Ушесь шоподи. Азорхне крьвястихть тол.
К у з ь м а а т я. Стяфтомаль инжись. Пяле веста, што ли, куду туй? Колма вайгяльбет вдь молема.
Н а с т а б а б а. Вай, да вдь ульцяса ни ёфси шобда. Ков прважасаськ венц лангс? А кда паксява молемста врьгасне сязендьсазь? Тонць маряйть, аф кунара ферматнень маласта кафта няйсть.
К у з ь м а а т я. Сама кицка ашель, мезень вишке тевоц тяса? Стяфтк и катк туй.
Н а с т а б а б а. Вай, да кода стане? Инжихть кудста аф панцихть. Катк уды, а шобдава прважасаськ.
Миколь сргози аньцек шобдава. Валги пянаклангста, щасы фуфайканц и лиси ульцяв. Аф лама пингта меле сувай.
М и к о л ь. Исяк матодовонь, а тинь ашемасть стяфта. Мярьгонь вдь, тейне ранане куду пачкодема.
Кузьма атя (салава). Сяс и эряскодоть.
М и к о л ь. А тячи сняра ловда марась. И даволське коданга аф лоткай. Видеть азыть, Кузьма, тяфтамне пара азор кудста пиненцка аф нолдасы. Арьсян, моньге аф паньцамасть.
Азорхне абондозь ваныхть инжить лангс. Сон вдь тиендсь пря, бта кальдявста кули.
Н а с т а б а б а. Кодама панема, ащек мзярс мяльце. Кие раднят панци?
К у з ь м а а т я. А лятфтака, Наста, кодама раднятама Миколь мархта? Сон вдь тонь ширдет?
Наста баба путсы нярезонза кяденц, арьсезеви.
Н а с т а б а б а. Тядязе азонкшнезе, кле, шабра велеса ульсь Вася щеняц, сянь ульсь цёрац, лемонц аф мяляфтса: кати Пётр, кати Илья. Сон тушендсь эряма Ростов шири. Кафтоль цёранза, конат мрдасть эряма тя аймаку. Миколь, улема, эздост фкясь, лац-ряц афи содаса.
К у з ь м а а т я. Миколь, кода аляцень лемоцоль?
М и к о л ь. Степан. Мон Николай Степанычан.
К у з ь м а а т я. А сон Ростов ширеса эрясь?
М и к о л ь. Мзярдонга аш. Сембе эряфонц эсь велесонк ётафтозе.
К у з ь м а а т я. А брадце хуш ули?
М и к о л ь. Аш, мон ськамонан. Тиндедонт башка радняневок аш.
К у з ь м а а т я (кяжиста ваны рьванц лангс). Эста кодама ина раднятама?
Н а с т а б а б а (киренчасыне лафтувонзон). Аф содаса.
М и к о л ь. А кинь мезень тевоц, кодама раднятама? Аф васенцеда вдь няйсамасть. Мон теенть най честь путнян, сашендан варжамонт. Эряви тейнек лацкас радняндамс. Лацкас и куватьскас! Сяс, кда, аф паньцамасть, ащан нинге кафтошка ши, ванат, и мусаськ-кочкасаськ юроньконь.
К у з ь м а а т я. Эрь, спасиба, честень путомда.
Миколь инжиендай сисем шит, но раднянь юрсна стаки аф мувихть. Тумстонза азсы, кле, кармай сашендома сиденяста. Эста и лацкас содайхть фкя-фкянь. Кальдяв, аф содамс раднятнень.
Жанр: Сценка
Автор: Вера Брындина