Гуленя

Лии, лии гуленясь, уле нармоннясь,
Паця алонза вжнай лямбе варманясь.
Коза лии гуленясь, ков кинц кодасы?
Тянц аф арьси гуленясь, тянц аф содасы.

Пацят келептсь гуленясь, виенц марязе,
Эряфть вольнайнять таньфонц варжазе.
Мялец валда гуленять, валда – грехфтома,
Кудоц гуле-гуленять – менельсь пефтома.

Ванфса келькси гуленясь зарянь сёралхнень,
Пацяпенясонзот сонь акша коволхне.
Да аф эвфнихть гуленять давол варматне,
Ялганякат гулети вольнай нармоттне…

Лиендсь, лиендсь гуленясь, вярьге, вярнява,
Сизесь, сизесь уленясь, ваймамс эряволь.
- Тердихть эсот, гуленя, паксять сёронза,
Тоса морасыне тейть вармась моронзон.

Андыхть эсот, гуленя, кенерьф пизелхне,
Ару ведняда симттядязь тонь пизепне.
Топольсь учи эсот, тараткат венепни,
Ронгцень штасазь, гуленя, ляйхне сенепне…

  Да аф кули гуленясь, афи кашторды,
Ризфу арьсематне сонь пиксыхть-ашкодыхть:
Дивакс гулети аф ляйхне, аф сёротне,
Мялец кулемс сон ломанень моротнень.

Аньцек кардай гуленять тряйняц-аляняц,
Явси-олькси вельхкссонза гулеть тядяняц:
- Тята эряскода тон мянемс менельста,
Тята эряскода тумс валдста-сенемста.

Тята валгонда, идняй, ошти веннети,
Тоса каршезот зиянць кятть ни венепни.
Тята арьсе, гуленя, цебярьхть ломаттне,
Эздост ветеста юмафттядязь колмотне…

Пиди цяткне – кельгопанчфт сокор сельмосост,
Сёлкф ужяльдеманди кенкшсь кельме седисост.
Ёрдаф панжемась крхка шобда томбати,
Кие сатсы, кие инксонза комоти?..

Сякокс седиц гуленять налхкси-кинголды,
Зрнянь толхне, кода тяштть, ошса пиндолдыхть.
Ашезь кардав гуленясь анокс содайти,
Валгсь, вай, сюдоф уленясь грешнай модати…