Грехонь простяфты

Моли Очижинь постсь. Сявань Марясь юмафтозе покоенц. Эрь шиня сюци аля ваймонц эса:

— Ломаттнень мирдьсна алят тык алят. Молихть добувама, мярьгат, ярмакнень кяльснон содайхть, кяскавса куду усксазь. Молихть церькаву, пряснонга аф кеподьсазь, озондыхть Шкайти. Сясы тевсновок молихть. А монь, монь… мирде трёпказень аш ковга вастоц. Сик шовсесы шиньберьф диванть телевизор инголе.

— Ся алятнень рьвасновок ого-ого… Сембоса сафтсазь. Маштыхть добуваф ярмаконять вастс путома. Аф тонь лацот.

— Вай, вай… Мувсь тонафтысь, апрякайсь. И мезе аф стане тиень, аф тоза путонь.

— Мондедон лац содасак.

— Ах, лима-сюна! Ах, ал мархта, баба! Муть мезьса монь сингордамс.

Ули Сявань Марять лафча шиняц. Пяк кельгсы лавкатнень эзда, базарга якаманц. Сельмоц няи, пилец кули. Ронгоц-пондоц най мархтонза. Ярмакфтомонга фалу кизефни:

— Пачём панар? Пачём понкс?

Базаронь аделамс шаракофнесыне пряснон мишендихнень, а рамамс мезьге аф рамай. Кой-кона мишендихне, няемок Сявань Марять, копорьснонга шарфтсазь.

Кда авать шачи ярмаконяц, тоса лиендезь лиенди базарга. Сонь кодямонза павазу ломань аш.

Весть рамась эстеенза тялонь пальта. Рамамстонза шаракофтозе прянц мишендить. Ся и корхтай:

— Сявк пальтать куду. Аф туй мялезот — сай базарть полафтсаськ.

Сявань Марясь котошкаксть полафнезе рамаф щамонц. Тялоське ни ётась. Меколи ни кандсь, озафтозе седиенц.

Тяфтак бта щамсь ничаво. Аньцек кержи лафтубряц колмошка сантиметрада сяда сери видить коряс. Сявань Марясь стрянендась, но тиемс ашель мезе. Мишендись вов ни колмошка базар Сярхка вели китьке юкстазе. Вов и якай лима-сюнокс таргафокс. Кие аф няйсы, «кит-кит-кит» лангсонза. Аля ваймоцка низелдозь варжаксни лангозонза.

Мекольдень пингть Сявань Марясь кельгсы Миколенц, кода пинесь байдекть. Старандай лишнайксть аф сюцемс, аф сялондомс. Надияфтсь аф стопка, а мянь сюлека «кяжиня» шра лангс путомс. Но тя кяжи симомбяльть Миколь мамасы аньцек эста, кда моли «домаханц» мархта церькаву озондома, грехонь простяфтома. Мекольдень службаса бачкась корхтась сянь квалма, конашкава оцю грехсот рьвятне мирдьснон инкса. А штоба грехтост улель сяда кржа, эрявихть тушендомс аля ваймосна церькаву.

Сявань Маряське анзясь, анзясь, вятезе Миколенц церькаву. Грехонь простяфтома нолдазе инголи.

Бачкась кизефнесы:

— Пост ванат?

— Аф, бачка, — отвечась Миколь.

— А мес? Ванан, алясь шумбрат-тазат. Няк, кодапт мокшендатне, аньцек кефт мархтост лазондомс.

— Мокшендане видекс оцюфт. А монць аф шумбран, аф ладян постонь ваныенди.

— И мезьце сяряди, цебярь ломань?

— Алон чуран, бачка.

— Туфталсь «сурьёзнай», конешна, постонь аф ваномс.

Маря «кит-кит-кит» фталонза. Васькафни поланяц. Но тоса шарьхкодезе, коса и местема сась. Кудса колмошкаксть ни тюхадель алять шамас, а тяса ащи, комафтф пряц. Хуш и порьсыне пеензон, но тиемс аш мезе.

Бачкась кизефни сяда тов.

— «Сяпинять» варчсесак? Стак шива али постста?

— Постста… Мекольдень пингть аф варчсеса. Монцень титине-митине аш, а «домахазе» аф нюрьхни. Коське куркт ётафнеса постть.

—Тя и пара.

— Мезень пароц. «Сяпинясь» вдь аф сиволь, кой-коста стопканясь — кафтсь афоль шоря.

— Да тонь, няк, аля, сярятьфце ули. Алот чурат. Алост чурайхненди пяляз ведьта аф мярьгондеви симомс.

— Тянь тонць арьсить али кивок азозе?

— Докторнятне арьсезь.

— А… а… Вдна, тонга чурат алот?

— Панде, тяфта кати ков мархтот пачкоттяма. Кодамот грехне?

— Монь аш грехоне.

— Тоса местема ина сать церькаву?

— Видеть азомс али васькафнемс?

— Тяса сембе азонкшнесазь аньцек видеть.

— Ну кулхцонтт тоса. Монць тяфтак афолень са. Сифтем прязе вятемань. Аре, корхтай, Миколашка, грехонь простяфтома. А церькавда меле мянь сюлека путан шра лангс. Вов и сань. А грехоне монь кодамовок аш.

— Архт, арьсек аф ламос. Эрь ломанть грехонза улихть. Арьсят, нажядят.

Пинге ётазь Миколь тага нажядсь бачкати.

— Ну, арьсеть?

— Арьсень, но аш грехоне бачка.

— Кода аш? Мярьктяма, сюлека лангс сать церькаву. Тя, дяряй, аф грех?

— Грех. Но тя грехсь Марязень. Сон вятемань церькаву.

— Пара. Рьвяцень мархта спорсят, сялонкшнят?

— Сялонкшнян. И мокшенданеньге кой-коста лафчепнесайне.

— Няйсак кода. Ату мярьгат грехоне аш. Каендат?

— Каендай катк рьвязе. А тейне аш мезенкса каендамс.

— Ся кода стане? Рьвяцень пикссесак, мархтонза сялондат. А тя пяк оцю грех.

— Сонць вешендьсы, сонць васенцекс ушеды кедьста лисендема. Тейне тумс аш ков, сави отвечамс.

— Ну вов мезе, аля. Тячи аф простясайне грехнень. Кудса лац-ряц арьсек. Саят оду.

Кенерсь бачкась шарфтомс копоренц, нажядсь Маряц. Тись весяла шама, мярьгат, фталонза ашезь и кулхцонкшне.

— Ну мезе, каендать, нолдазень бачкась грехнень?

— Тейне аш мезенкса каендамс. Каендак тон. Тонафты нинге эсон, стамонц-тяфтамонц. Мувсь учительсь. Весть васькафтовонь, оду аф саян.

— Оду сюлекатьке путса шра лангс, а тячи коське куркт ащек.

— Ах, саразонь ёнь, стамцень-тяфтамцень. Да кинди эрявсь тонь ошкс ведце. Тонць локнендак эздонза, пади, ёният. А мон тоньфтомотка муян копордамбяль.

Миртть-рьват лиссть церькавста. Сявань Марясь тусь фкя шири, аля ваймоц — омба шири.

— Тон ков, Миколь?! Кали юкстайть, коса кудсь?

— Ашине юкста. Куду кенерян. А васенда — кургсь начфтома.

— Архт, архт… Пади, кивок путняфты. Муят ужяльдихть. Монь сюлеказе пяк питниста тейть стяй.