Гавря попсь

Гавря лама пинге эрясь семьянц мархта ошса. Тевонза мольсть кальдявста. Лама покодема вастта полафтсь, но косовок куватьс ашезь кирде.
Кадозе Гавря ошень квартиранц и ётась Килькш вели эряма. Тяни сон церькавса батюшка. Приходоц аф оцю, но прянь трямс сатни.
Велеса перефтома, жуватафтома тиемс аш мезе. Но Гаврянь и Наста рьванц, кона кенкшка аф тяльги, ёфси ашель мяльсна возсемс модаса, назёмса. Модамарьнятка ашесть путне. Надиясть, бабатне трясазь.
Кода-бди попавась сась Васю бабанди. Сиреняти кафксогемонь киза ни, якай байдеконя вельде. Нинге пере путни, кирди сяванят, сараскат. Наста сиреняти и корхтай:
— Эрь шиня, Васю акай, батюшкась инксот озонды, аф стак тефневок лац молихть. Сарасне алыяйхть, сяватне лофца максыхть. Да и модамарьхневок ломанень пряшкат.
— Спасиба Гаврянди инксон озондоманкса. Шкайсь эстеензовок шумбрашиня максоза.
— А батюшкати инксот озондоманкса модамарьнят аф максат?
— Максомс аш мезе. Цёразе стирезень мархта ошса эряйхть, пересна аш. Сембе надиямасна монь урожаезень лангс.
Кода попавась ашезь старанда, Васю баба теенза ашезь васькафтов. Эсь иденза сяда ужяльхть.
Аф лама пингта мле Чльдинонь Матрёнать кулось стирец. Надиямань и седиень петема тяка вастоняцоль. Матрёнанди лятфнембяленди эздонза лядсть кафта крёскат: фкясь зрняннель, а омбоцесь ёфси уцескяль. Марязе тянь Гавря. Кучезе ширезонза Настанц.
— Грех синь кудса кирнемасна, Матрёнакай. Кандыть батюшкати, сон содасы, мезе мархтост тиема,—мярьгсь попавась.
— А мес грех, Наста? Вдь синь аф салафт, стирнязе вдь тядянцты кадозень!
— Сембе сяка крёсне церькаву кандомат, ату нинге кармат каендакшнема-маендакшнема.
Матрёнань кольсь вень удомацка. А шобдава сась Гаврянди, кандозе аф питни крёскять. Попсь келептезень сельмонзон.
— А коса омбоцесь? — кизефтезе Гавря бабанять.
— Эстейне кадыне, — отвечась Матрёна.
— Эста тяньге меки сявк, аф эряви тейне.
Бабанясь обжафста тусь куду. Пингонь ётазь ласьфтезе и зрнянь крёскять.
Омбоце шиня сась Чльдинонь Матрёнать ошста унокоц. Бабанясь семботь теенза азозе.
Уноконц, мярьгат, лакай ведьса валозь.
— Бабай, тон содасак, мзяра тя крёскять питнец? Ласьк куроконе батюшкать шири. Шять, ашезь кенере нинге козонга тиемс.
Матрёна эстокиге ёндолкс врхтадсь кудстонза и эрязста тусь Гаврянь шири:
— Зрнянь крёскязень инкса сань, батюшка. Сяряди ломанькс арань. Онцтон кальдявста стирезень кармань няендемонза. Казненц вешсы кядьстон. Ков, кле, тиить, кинди максыть.
— Кодамовок крёскя аф мяляфтан. Улема, юмафтыть.
— Кода аф мяляфтсак? Исяк тейть шава прясь кандыне.
— Вов кода батюшкать мархта ушедоть корхтама. Листь кудстон, и юкстак оду кить тяза.
Матрёна аварьгодсь. Шарьхкодсь, што Гавря васькафтозе и меки зрнянь крёсканц аф мрдафтсы. Савсь анамс лезкс «якстерь конятнень» кядьста. Сят мрдафтозь бабанять лятфнембяленц. Гавря тянемс кяжи лангозонза тянкса. Матрёна лоткась церькаву якамда.
Ульсь Килькш велеса и тяфтама случай.
Букань Алдать шачема шиц Очижинь постста. Мзярда топодсь ведьгемонь кизоц, пуропнесь ила. Марязе тянь Гавря, кучезе рьванц Алдань пяли.
Наста сась Букань Алдати и корхтай:
— Кулеськ, Алда, тувоня печкоть, ила водендать постть пингста...
— Тувонявок печконь, илавок тиендень. Кода ина, ведьгемонь вдь топодсь. Монцень эрь илас тернесамазь. Монга арьсень ломаттнень каванямс, праздниконя тиемс.
— А батюшкать кизефнить?
— Аш... А мезе, кизефтемс эряволь?
— Кода ина. Грех, пяк оцю грех тиеть Алда. Тонашиса отвечама тянкса.
— Отвечан, Наста, отвечан.
— Батюшкась мярьгсь, кда максат свежай сивольня, простясы грехцень.
Кулемок тянь, Букань Алдать крьвязсть сельмонза.
— Мезе мярьготь, Наста? Ашихтень шарьхкоде! Попти сиволь эряви? Дяряй батюшканьке пост аф ваны?
— Аф, Алда. Сон сяряди—веть кальдявста уды. А урмафненди пост можна аф ваномс.
— Монга, Наста, веть хуш сельме конелень. Сембонь инкса ризнан. Цёразе армияса служай, стирезе ошса тонафни. Лядихть мялезон и удомазевок юмай. Лисенди, тейневок сивольняда мярьгондеви ярхцамс. Гаврянь мархта минь фкя сярятьфоньке-урманьке.
Наста кяжиясь. А Букань Алдать рахама сявозе.
Сась тундась. Гавря сявсь мода пакшкя, путсь модамарьхть.
Но сонцень попть вестевок ашезь няенде перестонза. Рьвацка, корхтайхть, псиса аф кирди. Сор тишень кочкайхне, колорадскяй унжань кулофтыхне—велень бабатне. Улема, грехонь простяманкса работайхть Гаврянди.