Эрян, кода маштан

Эрян, кода маштан – вандыс кемазь,
Видешити кялян-тапан ян.
Мувор улень аф весть и аф кемоньксть,
Сянкса тяни эсь пря сюдокшнян.
 
Пежедонга пуромсь моньцон киренькс, –
Райнь ортась тейне ули сёлкф.
Инекуйсь вдь монь эзонга кирендсь,
Панцеса ся аерксть – мезень толксь?!
 
Пупорякшнян – каварксу кинязе,
Виде ваймот прядан эрь шинь тефт.
Визьксшида аф комафнеса прязень,
Повжиресон аяш кяжень кефт.
 
Тядязень бславамань Шкайсь кельгомс.
Веленязень кельган, шачем крайть…
Киндиге аф макссайне синь нельгомс,
Седи ваксстон вестьке синь аф прайхть.
 
Ванан ару ванфса ломань сельмос,
Ломань кельгозь аськолян киган.
Весть аф кадса кельгомазень кельмомс,
Кой-кинди, шять, монцьке келькф улян.