Афкуксонь кельгома
Марявсь ни сёксеть ваймопожфоц, а сон сувась и шинь лямбе сюролданякс валдоптозе марнек классть.
– Тя минь од тонафниеньке, Катя Пулова, – азозе шабатненди Наталья Петровна. – Надиян, карматада мархтонза ладяма и лездома. Ламотне люкштядезь пряснон и лямбоста варжакстсть однять лангс. Аньцек Климкина Тонясь мес-бди пувордазе няренц:
– Лездома? Ся мезьса стане? Задачанзон, што ли, инксонза карматама тиендема? – кулевиста корхтась вакссонза озада Ленанди. Катя марязе семботь, сяс цютькя колавсь мялец. Сон аф учи киньге ширде лезкс, а задачань тиеманкса и ёфси аф пичеди. Наталья Петровнавок марязе Тонянь корхтаманц, сяс эстокиге азозе:
– Мон ваныне Пуловать дневниконц, тоса аньцек ветет, сяс тонафнемаса, шять, сонць кармай теенть лездома.
Тоня комафтозе прянц. Вдь тяда инголе сон лувондовсь класса инь цебярь тонафникс и сембе шнамань валхне кайгсть аньцек лемозонза. А тяни… Кати-кодама Катя сась. Но тя нинге аф тякось, мезсь пичефтезе Тонянь. Однять озафтозь Косолапов Алёшать ваксс, конань Климкинась кельгозе нинге васенце класста сявомок. Виде, Алёша ялгафнесь мархтонза аньцек эста, мзярда Тоня макссезе сёрмадомс кудонь заданиять. Кафтошкаксть кинос тернезе, но тя ульсь нинге меля, мзярда якасть кемонце классу. А тядде нинге школастонга марса ашесть сашенда, хуш и эряйхть фкя ульцяса.
Класса содасть Тонянь и Алёшань колга, сяс курокста семботь пачфтезь Катяндивок. Тонянь мала ялгац Света васенце шинякиге переменаста азозе, кле, синь ётксост афкуксонь кельгома, сяс кда кармай шарома Алёшань перьф, таргай лангозонза оцю кяж.
– Тя пяк пара, кда кафта ломаттне кельгихть фкя-фкянь, – корхтась Катя. – А монь мяльсонга ашель кати-кинди тя тевса шорямс.
Урокта меле од ломаттне срадсть кудга. Катя мольсь аф ськамонза. Куцема песа сонь учезь од ялганза. Киньгувалма стирнятне пара мяльса азондсть Катянди учительхнень, школань эряфснон колга. А илять Рая терде-зень сембонь Москуса тиф фотографиянзон ванома.
Кудса Катянь васьфтезе тядяц: – Ну, кода ётась васенце шись школаса? Кода примадязь?
– Сембось лац, тядяй, ялгатка ни мунь,– отвечась стирнясь и ётась лия комнатав. Тядяц приметазе: што стирец мрдась аф прокс весяласта, но арьсесь сяда тов мезевок аф кизефнемс, эвондай мялец – сонцьке азондсы.
Илять Катя ульсь Рая Овечкинать ширеса: стирнятнень мархта симсть чайда, ванондозь Раянь Москувонь фотографиянзон.
– А кода тейть Алёша? Кенереде мархтонза корхнемс? – пшкядсь Рая и сонць эстокиге поладозе: – Пара цёрась, спортивнай секцияс якай, призовой вастт сатни, можна мярьгомс, школаньконь гордостец.
– Молодец! – мярьгсь Катя и сяда тов мезевок лия ашезь аза.
Тя веня стирнясь ламос изь матодов, коль арьсесь, кода туй тевоц од школаса. Кирдезе мяльса Алёшаньге. Синь ванфсна васедсть нинге эста, мзярда Катя виздезь ащесь Наталья Петровнань ваксса. И кафцьконь потмоса бта кати-мезе крьвязсь. Серес оцю равжа сельме цёрась туфоль класса ламоц стирнятнень мяльс. Но сембе содазь – ули вии каршек ащисна.
– Аф, тя мяльхне эрявихть пряста ёрдамс, – арьсесь Катя. Алёша кельгсы Тонянь, а теенза цёрать седиса васта аш и аф кармай улема.Тяка мяльть мархта и матодовсь.
Ковгярьксса кемонце сентябрсь. Шись эждсь аф сяшкава лямбоста, но сембе сяка, ульцясь маниель. Катя аньцек сргозсь, юпадсь вастстонза и варжакстсь вальмава. Вармась сей-тов лийфнезень тополень тюжяза лопатнень и синь, бта ёмла парашюткат, валгондсть модать лангс.
– Пинге срхкамс школав, – весяласта мярьгсь эстеенза Катя и ушедсь наряжама. Сон ламос сеенькшнезень ваномать инголе кувака акшаза шяярензон, а сяльде кодазень эчке пулос.
Школав молемста стирнясь няезе Тонянь, но тонац мархтонза афи шумбракстсь. Аськолясь киге бта оцю подиумга. Нюрьхкяня юбканяса, сери кочкяря туфляса, мярьгат, афкуксонь модель. Шамаска Тоня удалаф, но Катянь эса ульсь стама цятконя, конань валдонц няевсь сядонга ичкози. Шалхконянц перьф пизьгоналхт, щёкапрянза якстернят. Ялганза венемкшнесть теенза, сяс мес стирсь ару ваймоль, а Тонянь эзда яфодсь кати-мезень кельмоса.
Аф лама ни ляткшнесь школав. Ичкозде няевсть Катянь ялганзовок. Сон ёразень учемс стирнятнень, но тяса лангозонза врьгятсь Андронофнень овчаркасна. Тяда инголе пинесь киньге тяфта ашезе эвфне. Врьгятсь, улема, сяс, мес Катянь няйсы васенцеда. Стирнясь пяк эводсь, нльне ашезь шерьхков вастстонза. Пинесь стаки увась и комотнесь перьфканза. Кати мезе улель, кда аф Алёша. Сон ласьксь мяк ичкозде и лемса пшкядсь пинети: – Полкан, Полкан, сувак куду! – И тонац сетьмось. Катя марнек трнатсь. Шамаванза ожнакс кеворсть сельмоведенза. Алёша сявозе сонь портфеленц, венептсь кядьруцяня и няфтсь Андронофнень кудснон инголе ащи скомнять лангс. Озак, кле, и тят пеле – Полканць оду аф сай, а азоронзонды тячикиге азса: катк кирдьсазь пинеснон сотфста.
Катя нардазень сельмоведензон, азсь аралаенцты спасиба и стясь скомнять лангста. Школаста марявсь ни пайгонять циннямац. Ушедсь васенце уроксь, физикась.
– Тят лажна, – мярьгсь Алёша, – Геннадий Сергеевич поздаманкса аф сюцесамазь, азсаськ мезьса тевсь и сембе.
Шиньберьф Катя ащесь колаф мяльхть. Эводемада башка мезеньге квалма ашезь арьсев. Переменаста ваксозонза малаткшнесть ялганза, ёрасть сонь весялгофтомс и аньцек ськамонза Тоня кеняртькшнесь зиянти.
Алёша парта ваксса ащемста сяка тев варжакснесь Катянь лангс. Сонь мялецоль
мархтонза корхнемс, кизефнемс, но виздсь. Аньцек урокта меле пуроптозе марнек смелшинц и азсь мяль прважамс Катянь куду.
– Аф, аф эряви, – мярьгсь стирнясь и ёрась сяда курок лисемс класста. Но Алёша перязе кинц.
– А кода Полканть вакска ётат? Андронофне нинге работама вастста ашесть са, сяс пинесна тянемс ульцява якай, – пшкядсь сон.
Катя арьсезевсь. Пинеть эзда сон афкукс пельсь, но мезе кармайхть корхтама колганза ялганза, кда няйсазь Алёшань мархта?
– Тихтяма тяфта, – бойкаста азозе Катя, – ётафтсамак пинеть вакска, а сяда тов туян ськамон.
Алёша люкштядезе прянц и од ломаттне марса лиссть школаста. Пинесь ашезь няев, сяс Катя аф пелезь ётась Андронофнень кудснон ингольга.
– Спасиба тейть, Алёша, тон афкуксонь ялгат, – пялес рахсезь пшкядсь прважаенцты. – Сяда тов туян ськамон.
– Ну, пока, – отвечась Алёша и тяйня проулканява тусь эсь ульцязонза.
Омбоце шиня школав молемтса Катя учезе Овечкина Раять. Стирнять кядьса георгинонь оцю пусмоль. Путсаськ, кле, панчфнень учителень шрать лангс. Васенце уроксь Наталья Петровнань, сон кенярди.
Мзярда сувасть классу, эстокиге няезь вальмять ваксса корхни Тонянь и мала ялганц Светань. Тонянь сельмонза авартьфтольхть.
– Аф мезьге кальдяв лиссь? – кизефтезень Рая Овечкинась.
Света, мярьгат, тяконь и учсь: – Кизефнят, мезе лиссь? А кали тон аф содасак? Классонк эвондасть Ромео и Джульетта. Тинь няендеде тяфтамот. Кафта шит школасонк, а кенерсь ни ворьфтемс цёрать стиренц шалхкалда.
Рая шарьхкодсь, кинь колга моли корхтамась, сяс арьсесь араламс Катянь.
– Ся кие стане кинь ворьфтсь? – кизефтезе Светань.
– А то аф содасак. Ялгацень мархта Алёша тяни кяденьбецек якайхть.
– Да сон аньцек пинеть вакска ётафтомань, – кенерсь азомс Катя, кода лангозонза тага цярахманкс пяярсть апрякамань валхне. Тя пингть пайгонясь тердезень классу лядыкс тонафнихнень. Сувась Алёшавок.
– Привет! – пшкядсь сон Катянди партать ваксс озамста.
– Привет! – отвечась стирнясь аф мяль вельде.
Уроконьберьф шабратне фкя-фкянь
мархта ашесть корхта. Алёша шарьхкодсь, Катянь мес-бди колаф мялец и сяда пара ули сонь аф токсемс.
Переменаста озась Тонянь ваксс и кода фалу аназе сёрмадомс алгебраста кудонь заданиять. Тоня васенцеда теенза атказась. И кода атказась?! Тяда инголе стирсь корхнель мархонза ляпоняста, сонць апак кизефтть макссезе тетраденц, а тячи кяжень пандозь врьгятсь лангозонза.
Катк, кле, Джульеттаце лезды, а тейне оду тят малаткшне. Алёша киренчазень лафтувонзон и, апак шарьхкотть мезьса тевсь, тусь стирть маласта.
– Джульеттаце! А кие ся Джульеттась? – макссесь эстеенза кизефкс. Но сяльде шарьхкодсь, кинь колга мольсь корхтамась.
Анамс кудонь заданиять Катянь кядьста Алёша виздсь. Вдь сон тонафенемаса сонцьке сафтсы, аньцек вов эрь шинь тренировканза лама пингта занцихть.
Но тячиень шида меле Алёша арьсесь полафтомс. Вень-вень тонафнезень алгебрать, физикать, химиять. Сон макссь эстеенза вал, оду аф визделготкшнемс стирнятнень инголе. А сяда пяк мялецоль няфтемс пря цебярь ширде Катянди. Мзярда получазе васенце вететь, сондедонза павазу ломань марнек масторть лангса ашель. Озась партать ваксс, варжакстсь Катянь лангс. Сельмостонза няйсь лямбе толня, стирнясь пеедсь. Катя лотксесь Алёшань мархта корхтамдонга, а тячи мяк люпштазе партать алга кяденц. Тя шиста синь ушедсь ладяма и фкя-фкянди лезнема.
Тялонь каникулада инголе Алёша тердезе Катянь вирьге якама-шяяма. Перьфпяльсь марнек акшель, сетьмоста прашендсь ловнясь, и од ломаттне марязь пряснон кода ёфксса. Катя лоткась и нажядсь эчке пичети. Шамац крфась. Сельмонза пеедсть.
– Эйндать? – кизефтезе Алёша.
– Кядне цютькяня, – сетьмоста азозе Катя.
Алёша маладсь стирняти, сявозень курмозезонза кядензон и кармась эжнемост. А сонцень потмосонза юрназь юрнась кати-мезень тол. И тя толсь сямольде ашезь эшентьфнев аф кельмотненди, аф пизепненди-варматненди. Ков ши, сон сядонга псилготкшнесь. Тя ульсь афкуксонь кельгома…
– Тя минь од тонафниеньке, Катя Пулова, – азозе шабатненди Наталья Петровна. – Надиян, карматада мархтонза ладяма и лездома. Ламотне люкштядезь пряснон и лямбоста варжакстсть однять лангс. Аньцек Климкина Тонясь мес-бди пувордазе няренц:
– Лездома? Ся мезьса стане? Задачанзон, што ли, инксонза карматама тиендема? – кулевиста корхтась вакссонза озада Ленанди. Катя марязе семботь, сяс цютькя колавсь мялец. Сон аф учи киньге ширде лезкс, а задачань тиеманкса и ёфси аф пичеди. Наталья Петровнавок марязе Тонянь корхтаманц, сяс эстокиге азозе:
– Мон ваныне Пуловать дневниконц, тоса аньцек ветет, сяс тонафнемаса, шять, сонць кармай теенть лездома.
Тоня комафтозе прянц. Вдь тяда инголе сон лувондовсь класса инь цебярь тонафникс и сембе шнамань валхне кайгсть аньцек лемозонза. А тяни… Кати-кодама Катя сась. Но тя нинге аф тякось, мезсь пичефтезе Тонянь. Однять озафтозь Косолапов Алёшать ваксс, конань Климкинась кельгозе нинге васенце класста сявомок. Виде, Алёша ялгафнесь мархтонза аньцек эста, мзярда Тоня макссезе сёрмадомс кудонь заданиять. Кафтошкаксть кинос тернезе, но тя ульсь нинге меля, мзярда якасть кемонце классу. А тядде нинге школастонга марса ашесть сашенда, хуш и эряйхть фкя ульцяса.
Класса содасть Тонянь и Алёшань колга, сяс курокста семботь пачфтезь Катяндивок. Тонянь мала ялгац Света васенце шинякиге переменаста азозе, кле, синь ётксост афкуксонь кельгома, сяс кда кармай шарома Алёшань перьф, таргай лангозонза оцю кяж.
– Тя пяк пара, кда кафта ломаттне кельгихть фкя-фкянь, – корхтась Катя. – А монь мяльсонга ашель кати-кинди тя тевса шорямс.
Урокта меле од ломаттне срадсть кудга. Катя мольсь аф ськамонза. Куцема песа сонь учезь од ялганза. Киньгувалма стирнятне пара мяльса азондсть Катянди учительхнень, школань эряфснон колга. А илять Рая терде-зень сембонь Москуса тиф фотографиянзон ванома.
Кудса Катянь васьфтезе тядяц: – Ну, кода ётась васенце шись школаса? Кода примадязь?
– Сембось лац, тядяй, ялгатка ни мунь,– отвечась стирнясь и ётась лия комнатав. Тядяц приметазе: што стирец мрдась аф прокс весяласта, но арьсесь сяда тов мезевок аф кизефнемс, эвондай мялец – сонцьке азондсы.
Илять Катя ульсь Рая Овечкинать ширеса: стирнятнень мархта симсть чайда, ванондозь Раянь Москувонь фотографиянзон.
– А кода тейть Алёша? Кенереде мархтонза корхнемс? – пшкядсь Рая и сонць эстокиге поладозе: – Пара цёрась, спортивнай секцияс якай, призовой вастт сатни, можна мярьгомс, школаньконь гордостец.
– Молодец! – мярьгсь Катя и сяда тов мезевок лия ашезь аза.
Тя веня стирнясь ламос изь матодов, коль арьсесь, кода туй тевоц од школаса. Кирдезе мяльса Алёшаньге. Синь ванфсна васедсть нинге эста, мзярда Катя виздезь ащесь Наталья Петровнань ваксса. И кафцьконь потмоса бта кати-мезе крьвязсь. Серес оцю равжа сельме цёрась туфоль класса ламоц стирнятнень мяльс. Но сембе содазь – ули вии каршек ащисна.
– Аф, тя мяльхне эрявихть пряста ёрдамс, – арьсесь Катя. Алёша кельгсы Тонянь, а теенза цёрать седиса васта аш и аф кармай улема.Тяка мяльть мархта и матодовсь.
Ковгярьксса кемонце сентябрсь. Шись эждсь аф сяшкава лямбоста, но сембе сяка, ульцясь маниель. Катя аньцек сргозсь, юпадсь вастстонза и варжакстсь вальмава. Вармась сей-тов лийфнезень тополень тюжяза лопатнень и синь, бта ёмла парашюткат, валгондсть модать лангс.
– Пинге срхкамс школав, – весяласта мярьгсь эстеенза Катя и ушедсь наряжама. Сон ламос сеенькшнезень ваномать инголе кувака акшаза шяярензон, а сяльде кодазень эчке пулос.
Школав молемста стирнясь няезе Тонянь, но тонац мархтонза афи шумбракстсь. Аськолясь киге бта оцю подиумга. Нюрьхкяня юбканяса, сери кочкяря туфляса, мярьгат, афкуксонь модель. Шамаска Тоня удалаф, но Катянь эса ульсь стама цятконя, конань валдонц няевсь сядонга ичкози. Шалхконянц перьф пизьгоналхт, щёкапрянза якстернят. Ялганза венемкшнесть теенза, сяс мес стирсь ару ваймоль, а Тонянь эзда яфодсь кати-мезень кельмоса.
Аф лама ни ляткшнесь школав. Ичкозде няевсть Катянь ялганзовок. Сон ёразень учемс стирнятнень, но тяса лангозонза врьгятсь Андронофнень овчаркасна. Тяда инголе пинесь киньге тяфта ашезе эвфне. Врьгятсь, улема, сяс, мес Катянь няйсы васенцеда. Стирнясь пяк эводсь, нльне ашезь шерьхков вастстонза. Пинесь стаки увась и комотнесь перьфканза. Кати мезе улель, кда аф Алёша. Сон ласьксь мяк ичкозде и лемса пшкядсь пинети: – Полкан, Полкан, сувак куду! – И тонац сетьмось. Катя марнек трнатсь. Шамаванза ожнакс кеворсть сельмоведенза. Алёша сявозе сонь портфеленц, венептсь кядьруцяня и няфтсь Андронофнень кудснон инголе ащи скомнять лангс. Озак, кле, и тят пеле – Полканць оду аф сай, а азоронзонды тячикиге азса: катк кирдьсазь пинеснон сотфста.
Катя нардазень сельмоведензон, азсь аралаенцты спасиба и стясь скомнять лангста. Школаста марявсь ни пайгонять циннямац. Ушедсь васенце уроксь, физикась.
– Тят лажна, – мярьгсь Алёша, – Геннадий Сергеевич поздаманкса аф сюцесамазь, азсаськ мезьса тевсь и сембе.
Шиньберьф Катя ащесь колаф мяльхть. Эводемада башка мезеньге квалма ашезь арьсев. Переменаста ваксозонза малаткшнесть ялганза, ёрасть сонь весялгофтомс и аньцек ськамонза Тоня кеняртькшнесь зиянти.
Алёша парта ваксса ащемста сяка тев варжакснесь Катянь лангс. Сонь мялецоль
мархтонза корхнемс, кизефнемс, но виздсь. Аньцек урокта меле пуроптозе марнек смелшинц и азсь мяль прважамс Катянь куду.
– Аф, аф эряви, – мярьгсь стирнясь и ёрась сяда курок лисемс класста. Но Алёша перязе кинц.
– А кода Полканть вакска ётат? Андронофне нинге работама вастста ашесть са, сяс пинесна тянемс ульцява якай, – пшкядсь сон.
Катя арьсезевсь. Пинеть эзда сон афкукс пельсь, но мезе кармайхть корхтама колганза ялганза, кда няйсазь Алёшань мархта?
– Тихтяма тяфта, – бойкаста азозе Катя, – ётафтсамак пинеть вакска, а сяда тов туян ськамон.
Алёша люкштядезе прянц и од ломаттне марса лиссть школаста. Пинесь ашезь няев, сяс Катя аф пелезь ётась Андронофнень кудснон ингольга.
– Спасиба тейть, Алёша, тон афкуксонь ялгат, – пялес рахсезь пшкядсь прважаенцты. – Сяда тов туян ськамон.
– Ну, пока, – отвечась Алёша и тяйня проулканява тусь эсь ульцязонза.
Омбоце шиня школав молемтса Катя учезе Овечкина Раять. Стирнять кядьса георгинонь оцю пусмоль. Путсаськ, кле, панчфнень учителень шрать лангс. Васенце уроксь Наталья Петровнань, сон кенярди.
Мзярда сувасть классу, эстокиге няезь вальмять ваксса корхни Тонянь и мала ялганц Светань. Тонянь сельмонза авартьфтольхть.
– Аф мезьге кальдяв лиссь? – кизефтезень Рая Овечкинась.
Света, мярьгат, тяконь и учсь: – Кизефнят, мезе лиссь? А кали тон аф содасак? Классонк эвондасть Ромео и Джульетта. Тинь няендеде тяфтамот. Кафта шит школасонк, а кенерсь ни ворьфтемс цёрать стиренц шалхкалда.
Рая шарьхкодсь, кинь колга моли корхтамась, сяс арьсесь араламс Катянь.
– Ся кие стане кинь ворьфтсь? – кизефтезе Светань.
– А то аф содасак. Ялгацень мархта Алёша тяни кяденьбецек якайхть.
– Да сон аньцек пинеть вакска ётафтомань, – кенерсь азомс Катя, кода лангозонза тага цярахманкс пяярсть апрякамань валхне. Тя пингть пайгонясь тердезень классу лядыкс тонафнихнень. Сувась Алёшавок.
– Привет! – пшкядсь сон Катянди партать ваксс озамста.
– Привет! – отвечась стирнясь аф мяль вельде.
Уроконьберьф шабратне фкя-фкянь
мархта ашесть корхта. Алёша шарьхкодсь, Катянь мес-бди колаф мялец и сяда пара ули сонь аф токсемс.
Переменаста озась Тонянь ваксс и кода фалу аназе сёрмадомс алгебраста кудонь заданиять. Тоня васенцеда теенза атказась. И кода атказась?! Тяда инголе стирсь корхнель мархонза ляпоняста, сонць апак кизефтть макссезе тетраденц, а тячи кяжень пандозь врьгятсь лангозонза.
Катк, кле, Джульеттаце лезды, а тейне оду тят малаткшне. Алёша киренчазень лафтувонзон и, апак шарьхкотть мезьса тевсь, тусь стирть маласта.
– Джульеттаце! А кие ся Джульеттась? – макссесь эстеенза кизефкс. Но сяльде шарьхкодсь, кинь колга мольсь корхтамась.
Анамс кудонь заданиять Катянь кядьста Алёша виздсь. Вдь сон тонафенемаса сонцьке сафтсы, аньцек вов эрь шинь тренировканза лама пингта занцихть.
Но тячиень шида меле Алёша арьсесь полафтомс. Вень-вень тонафнезень алгебрать, физикать, химиять. Сон макссь эстеенза вал, оду аф визделготкшнемс стирнятнень инголе. А сяда пяк мялецоль няфтемс пря цебярь ширде Катянди. Мзярда получазе васенце вететь, сондедонза павазу ломань марнек масторть лангса ашель. Озась партать ваксс, варжакстсь Катянь лангс. Сельмостонза няйсь лямбе толня, стирнясь пеедсь. Катя лотксесь Алёшань мархта корхтамдонга, а тячи мяк люпштазе партать алга кяденц. Тя шиста синь ушедсь ладяма и фкя-фкянди лезнема.
Тялонь каникулада инголе Алёша тердезе Катянь вирьге якама-шяяма. Перьфпяльсь марнек акшель, сетьмоста прашендсь ловнясь, и од ломаттне марязь пряснон кода ёфксса. Катя лоткась и нажядсь эчке пичети. Шамац крфась. Сельмонза пеедсть.
– Эйндать? – кизефтезе Алёша.
– Кядне цютькяня, – сетьмоста азозе Катя.
Алёша маладсь стирняти, сявозень курмозезонза кядензон и кармась эжнемост. А сонцень потмосонза юрназь юрнась кати-мезень тол. И тя толсь сямольде ашезь эшентьфнев аф кельмотненди, аф пизепненди-варматненди. Ков ши, сон сядонга псилготкшнесь. Тя ульсь афкуксонь кельгома…
Жанр: Рассказ
Автор: Вера Брындина