Зяро шкань перть монь сельмень ульнесть начкт...

Зяро шкань перть монь сельмень
ульнесть начкт...
Пертьпельксэсь - сундерькс, тол пувамс
а кинень,
Мон учинь: тон сувов сундерьксэнь пачк
Венстят сельведень нардамс тень пацине.

Зяро шкань перть монь ойменть керясь сал...
Панжадо вальмас пувась коське варма.
Мон учинь: тон ёвтат идиця вал,
Ды мон таго, таго э р я м о карман.

Зяро шкань перть мон кемемам пултынь...
Сон куловкс палсь, седеем кадовсь чаво...
Ды ансяк ней прок куловсто вельминь,
Зярдо чарькодинь: вечксамак, эряван.