Зонтик ды панамка

Эрясь-аштесь Зонтик. Лиятнеде а явовиця, вишкинестэ пурнавиця. Тюсозо сэнель. Эрямосонзо весемесь ульнесь вадря, вейкеде башка. Сон лиснесь ульцяв ансяк пиземе шкане, секскак арсесь, буто перть-пельксэсь свал начко, менеленть тюсозояк валдокс а эрси.
«Вай, кодамо нусманя эрямом? – коратсь эсь пачканзо, кирмицявозь а покшке сюворксокс. – Вай, кодашка тошначим!»
– Мезть секе тев стакасто укснят? – весть кевкстизе Зонтикенть сыре Шляпась, конась аштесь теке жо шкапсонть, ансяк седе вере лавцянть лангсо.
– Мезес, тонь койсэ, кецнемс? – таго стакасто укстась Зонтикесь. – Перть-пельга ансяк пиземеть валыть… Начко…
– Вай, пайстомне! – седеймарясь тензэ Шляпась.– Алкукскак, тон вадря погодаяк эзить некшне! Ушов эйсэть ливтнить ансяк пиземе алга! Пайстомо, кода мелявтан кисэть!
– Тошна тень! – таго укстась Зонтикесь.
Шляпась зярыя шка арсесь, мейле мери:
– Варчаса лездамс теть. Кунсолок, мезе мерян! Несак се сумканть? Сы недлячистэ тон, а неемга, кеверть эйзэнзэ. Чарькодик?
– Чарькодия, – мерсь Зонтикесь. – Мейле мезе?
– Мейле? – мизодозь мерсь Шляпась. – Мейле тонсь несак…
Сыре Шляпанть превспутомазо Зонтикентень овсе эзь чарькодеве, ансяк недлячистэ тейсь истя, кода тензэ мерсь Шляпась. Апак маря, апак нее, сон кеверсь валдо сэнь покш сумкантень, конань бокасо ульнесь рисовазь трокс путозь матросонь картузсо кенярксов церабаень чачо.
Сумкась васня чаволь. Мейле эйзэнзэ нерьгсть эрьва мезть, ды ков-бути саизь. Зонтикесь понгсь сехте алов. Сонзэ лангс   прась кодамо-бути эчке книга. Книгась апак лотксе мотордсь, бажась велявтомс ды муемс эстензэ ен тарка, ансяк те тевесь тензэ кодаяк эзь тееве. Зонтикенть вакссо мадезь аштесь   кельме лимонадто пештязь сулика. Суликась кежейстэ булькаесь ды мелезэль валомс весе ведензэ лиятнень лангс.
Пупиця сурсемесь пезнавтынзе пеензэ Зонтикенть пря кочомс ды истя мельспаросо чикордсь эйсэст, натой кавто пейтнень синдинзе.
Окойники кувака ки лангось прядовсь. Зонтикесь чарькодизе, сумканть козонь-бути путызь. Мейле панжизь, мезе-бути эйстэнзэ сайсть ды пекстызь одс.
Перть-пельга каштмолезевсь. Зонтикенть туртов те ульнесь седеяк берянь. Сумкась мезде-бути кармась эжеме. Зонтикентень а мейсэ кармась лексемс. Апак учне сумкась таго панжовсь ды те шкане Зонтикесь прась ушов.
Сон овсе эзь чарькоде, мекс лангозонзо весе тетькизь сельмест, прок тамаша лангс, теке неить васенцеде? Пейдсть-тейсть, ды панжизь…
Зонтикесь дивамодонть вайкстась ды эль эзь пра масторов. Сон истямо валдо чи онстонзояк эзь некшне. Перть-пельга весемесь ульнесь пек мазый! Валдо-сэнь менель, пси чипай, сэнь моря, ожо чувар ды сядот истят жо зонтикть, кодамо сон, ансяк сермавт ды эрьва кодамо тюсонь. Теде весемеденть Зонтикенть кармась чарамо прязо. Чарась, чарась, чарась…
Вана аламодо сась ежос, варштась тей-тов ды аволь пек васоло, мерема, овсе вакссонзо, несь валдо сермав шляпине. Кодамо-бути лия енов а молиця, перьканзо сюлмсезь ламо сурепулот. Истямо шляпа Зонтикесь теде икеле эзь некшне.
– Тон кият? – кевкстизе Зонтикесь шляпиненть.
– Мон? – дивазевсь шляпинесь. – Панамка.
– Па-нам-ка…– слогонь слог евтызе Зонтикесь, ды эзь сода, мезде кортамс седе тов.
– А мон тонь содатан. Тон – Зонтик! – мерсь Панамкась. – Ансяк а чарькодян, ней жо пиземе арась? А тонь кондямо зонтиктне пляжов а якить.
– Мон… Мон… – Зонтикесь эзь сода мезе меремс, секскак келезэ понгонесь. – Мон сынь тонть лангс варштамо! – окойники мусь валт Зонтикесь.
– Монь лангс? – дивазевсь Панамкась. – Мезекс те теть эряви?
– Вельть тон мазыят! – мерсь Зонтикесь.
– Гм, – мизолдозевсь Панамкась ды мерсь виздезь. – Тонгак монь мельс туить.
– Жаль! – стакасто укстась Зонтикесь.
– Мезесь жаль? – кевкстизе Панамкась.
– Курок чокшне ды сави миненек явовомс.
– Алкукскак, – истя жо укстась Панамкась – Тон эште сат тей?
– А содан, – мерсь Зонтикесь. – Мон жо аволь пляжга якицян. Пиземе арась.
– Мейле мезе?
Те шкастонть Зонтикенть пурнызь ды сон таго понгсь содавикс сумкантень. Ансяк ней сехте верель. Судозояк тарнось ушосо, сельмензэяк несть мезе тееви перьканзо.
Ялатеке ежозо берянель. Сон арсесь мазый шляпинеденть-Панамкадонть. Чумондсь эсь прянзо, мекс эзь кенере тензэ меремс «Вастомазонок!». Те шкастонть Зонтикесь варштась вить енов ды… Истяшка кеняркс! Овсе маласо кодазь кептернесэ аштесь сон – Панамкась!
– Шкась а менстяма! – арсезевсь Зонтикесь. Ды эзизе менстя.   Велявтсь, венстизе Панамкантень эсензэ кеме кедензэ ды мерсь:
– Кундак седе куроксто!
Панамкась васня тандадсь, мейле сась ежос, пелезь кундась Зонтикенть кедьс ды сорнозь, ютась Зонтикенть енов…
…Се шкастонть саезь шкапсонть сынь кавонест. Ней Зонтикесь овсе а тошнакали   певтеме пиземетнень эйстэ. Сон соды, кудосо учи эйсэнзэ Панамкась, конась пек моли чипаенть енов. Панамканть неезь, Зонтикенть сеске лембелгады ежозо ды кенярдозеви седеезэ.
Вере лавцянть лангсо сыре шляпась ваны лангозост ды каштмоли, ансяк кой-зярдо кувакасто укстни, паряк, ледстни сень, мезесь уш умок ютась.