Велень бука

Чивалгома ёнксонь валдось аламонь-аламонь лепамсь менельсэнть. Верьга уйсть раужо, тусто пельть. Сундерьгадсь. Сёксень меельце ковонь читне нурькинеть, а кенерят велесэ кудоютконь тевтнень ланга ютамс, вансак: чопотетсь. Мадемс сразтнэнь ладсо пек рана, ковгак сави шабра ланга лытамо молемс. Истямо эрямонь коезэ Пизел велесэнть Кузонь Сёмань.
Аволь умок важодемстэ ильтизь пенсияс, эри ськамонзо. Нинстэнь, Нюранень, эзь учово те оймсема шкась, кулось ведьгемень иесэ. Сонзэ марто яла истя а тошнакадыль кудосонть Сёма. Ней а муи эстензэ оймамо тарка. Сеедьстэ тонадсь чокшне ланга яксеме шабранзо туртов — Ильконень.
Субутань чокшне лиссь кудостонзо, варштась-тейсь велень кудотнень лангс, тесэ-тосо кирвазсть толт. Ушосонть а куш а каш. Ансяк бути верепе ёндо кайсететсь кискань онгомань вайгель. Куринкантень, косо эри Сёма, кеветее кудотнестэ кадовсть колмо. Чаво юрттнэсэ, пиретнесэ касыть пиципалакст, кирмалавт ды эрьва кодат куракшт. Сёма мезде-бути арсезевсь ды сыргась шабранстэнь. Кода свал, кудос совамсто кенкш поровтонть малас каинзе кемензэ, ютась икелев ды озась пазаванть каршо. Шабрась мезть-бути котьмась каштомо икеле. Кудосонть качадсь пидемань-панемань тантей чине.
— Трофимыч, аволь пачалксеть панят? — кевкстизе Сёма. — Мон тесэ талайде аштян, ванан лангозот, тон жо а варштаткак...
— Б-а-а! Те тон, Семко? Мон эзитинь маряяк совамсто. Моликсэлинь кисэть, тонсь сыть. Паро арсят тень, шабра, — прянзо невтизе каштомо икельденть ды кортазевсь азорось, судопрясь товов.
— Мезекс эряван теть? — мизолдозь мерсь Сёма. — Исяк вастневинек — чатьмонить.
— Стувтыя ёвтамс теть. Ним туртов топодсь ие, кода тусь тозонь, — невтсь сурсонзо пильгензэ алов Илё. — Эряви кундамс лемензэ эрямонь койтнень коряс. Ды эстенекак седе сеедьстэ вастневемс, зярс эрятано, свал тенек а зярдо. Лиятнень мирдест кулыть шкадо икеле, минек жо козейканок.
— Мезеяк а теят, Илько, кинень зяро максозь эрямс: чачить, — эряви куломс. Шкась сыречине ливтязь-ливти, вармакс. Крысань иесь пек стакаль минек туртов. Велесь пелезэ чамсь. Зяро кулость аволь пек сыретнеяк! Эль кенертяно сынст калмамо. Куринкантень кадовинек минь тонь марто ды Олёна баба. Сеньгак сельмензэ ваныть тона ёнов. Маласо шкастонть сави учомс тенек букань иенть, а содан, мезе ёвты ды максы тенек. Чилисема ёнксонь астрологтнень ёвтамост коряс, иесь, келя, ожо букань. Лиякс меремс, велесэ, мода лангсо важодиця ракшань. Аволь кода крысась. Седе сэтьме, паряк, иеськак карми улеме. Ды сонсь букаськак истямо, ютамонь уставозояк невти обуцянзо: моли састо, апак капша, прязо свал нолдазь алов, прок мездеяк арсекшни. Сонзэ истя жо ловильть «сырнень телецэкс». Сюпавчис кенярдовтыцякс, бажамонь иекс. Истя кортыть: ламо парочи ды лезэ канды сетненень, кить важодить вейсэнь вийсэ велень хозяйствасо ды кинь улить сюросо соксевиця-видневиця модаст, техникаст, эрямо таркаст ды лия парочист. Минь тонь марто сырединек, ялатеке мезеяк седе вадря учотано сы иестэнть.
— Нама, нама! В-а-а, аштевинь! Столенть лангс кодаяк сускомапель а путован букат мартояк. Косто неть азкстнэнь марить? — капшазевсь кудованть якамо азорось. Сеске кандсь кой-мезть ярсамс, бутылка вина. Цяркатнень пештинзе, мерсь: «Ярь, копордасынек ды ледстясынек поланок-раськенек, кинь марто ютась эрямонок. Кадык сынесткак пачкоди тоначисэнть».
— А содан, пачкоди а пачкоди, монень жо чинезэяк эзь пачкоде! — марявсь каштлангстонть сыре атянь вайгель.
— Вай, тетяй! Мон арсинь, удат, пек уш корныть. — пшкадсь Илько. — Чуман, стувтовить монень. Копордат аламошка? Вана минь тесэ...
— Мезе? Мезе? Кортак седе пек, а марян! — пилензэ аравтызе ёнонзо.
— Кандан теть чапамодонть!
— Бути аламошка, копордан весть-кавксть ледстнемань кис. Монь койсэ, цёрам, сехте покш мель эряви явомс эрийтненень-живойтненень. Зярдо ломанесь те светэнть лангсо. Тоначисэнть сынст эсест коест-кирдаст, — сорнозь кедьсэ кундызе цярканть ды пачалксенть. — Аламо кадовсь монень эрямс. Тыненк жо, кода маринь, букань иестэнть арсян шумбрачи ды сюпавчи. Зярс виенк ули, важодеде, букась сонсь истямо. Монь кедь ланга ламо ютасть сындест. Тыненк пек эзь саво вастневемс мартост, мондень одтадо.
— Кода эзь? Савкшнось! — верьга вайгельть рангстась Сёма. — Те шкас мельсэнь ашти скирдашка Ороз букась. Те ракшанть кувать кирдсть тракторонь таркас колхозсонть войнадо мейлеяк. Од ды шумбра алашатнень саекшнизь фронтов: букатне жо топавтсть весе тевтнень. Виев ульнесь велень Ороз букась. Тонгак чей содылик сонзэ, Илько? Эзик стувто?
— Нейгак превсэнь ашти, кода вишка порасто ялгатнень марто тандалинек эйстэнзэ, — ушодсь ёвтнеме Илько. — Буканть свал кирдсть колхозонь кардазсо. Тундосто-сёксес сайнилизь велень скалонь стадас. Племазо пек пароль, секс кирдсть сонзэ. Сонськак пек виевель ды покшоль ракшась. Конязо сюротнень ютксо оно се каштом лазошканть ульнесь. Стадаванть якиль азорокс, скалонь ваныцятнень локшост эйстэяк пек а пелиль. Минь оятнень марто кизна свал яксилинек луга лангов мастумарень, пангонь кочкамо. Сестэ лей чиретне эзть соксевкшне, ракшатне ловонь прамс яксесть тува. Содазь, кодат вишкапоране ульнинек: озицят, набойть, а кунсолыцят. Весть пси чине якатано луга ланга. Панаронок кайсинек лангстонок, чипаесь пидезь-пиди рунготнень. Скалонь стадась маласоль эйстэнек, букась чарась-якась перьканзо. Вейкесь цёрынетнень эйстэ ушодсь аволямо панарсонзо, сеересь: «Ороз бука! Кежей бука!» Се кода неимизь-маримизь ды кода сырги ёнонок... Минь прянь-полдань синдезь ношкстынек эйстэнзэ. Кежень савтницясь ёртызе тюжа панаронзояк ды видьстэ маласо сёлтонтень... Монгак мельганзо, прок ватракш, кирнявтынь ведентень. Ороз стясь чирентень, сельмензэ прок толт палыть. Пильгсэнзэ модат-човарт баксори, сонсь апаро вайгельсэ мувнозь-мавнозь ранги ды ванны минек лангс, текень вант, сови мельганок. Мон чопавтинь ведь алов ды уинь омбоце чирентень.
Кой-кить, прок катка левкст, баксорсо кузсть сыре каль прянтень ды тосто савтнесть буканть кежензэ, пижнесть:
— Ороз бука! Нулав бука!
Букась маринзе ды кода карми чувтонть тостяеме, анок яжамс пельксэнь-пелькс. Эйкакштнэ тандадсть ды митялкот пракшность ведентень прок граць левкст. Ды те аволь весть ульнекшнесь минек марто. Лиясто скалонь ваныцятнеяк буканть ладсо пансесть цёракайтнень локшосост.
— Ороз истя од порасто невтнесь кежензэ-виензэ. Мейле, кортыть, мадсь качамозо, пек а кайсевиль цёрынетнень лангс, — таго ушодсь ледстнеме Сёма. — Судованзо таргасть кшнинь апокшке кирькс ды кармасть пекстнемензэ алашань кардс. Кизна кильдилизь крандазс, тельня — нурдс. Топавтсь эрьва кодат тевть: яксесь вирев пенгс, усксесь тикше, станцияв сюро. Войнань прядовома иестэнть, кизна, авань марто савсь молемс колхозонь правленияв алашань кис.
— Мезекс тенк? — кевкстимизь бригадань прявтось. — Лишме арась, саеде бука.
— Сонзэ эйсэ а усковат пенгть! Весть истя якинь вирев, чаво сынек, — мерсь авам.
— Саинк Орозонь, кудошка улав уски тенк, — кемевтимизь бригадань прявтось.
Пиче вирев кись а маласоль, Ратор леенть томбале. Моли букась пулев кияванть, прок сий. Илейсэнть ушодан панемензэ — лотки. Ашти-ашти зярскак, таго туи кавто ёнов лыказь. Авам корты: «Кадык моли эсь олясонзо, бути ёжонзо коласак, мекев велявты кудов, миненек а кирдеви». Окойники пачкодинек вирентень. Тия-тува пурнынек коське тараднэть. Вачкатано крандазонтень, улавось аламонь-аламонь кепететсь сэрейстэ. А промотне! Пелька пряшкат! Текень вант, пельнесызь-сэвсызь буканть. Се ансяк псиденть ды промотнеде юхаи пулосонзо ды кепси пильгензэ. Мон лопав тарадкесэ пансян идемевстнень пеке алдонзо, лангстонзо. Улавоськак парсте эзь вачкаво, ракшась ардозь тусь вирьстэнть. Минь эль кенеринек озамс улавонтень. Эзинек кенере пачкодеме сэденть видьс, Ороз сеске совась Раторонь ведентень. Ашти тосо, ансяк неявить сюронзо, сельмензэяк конинзе паро ёжодонть. Мон ноцковтнян ождятнесэ, пижнян: «Саты удомс, наян бука! Адя, аксун бука!» Сон теке пезнась лей потмаксонтень, а тей а тов. Монень савсь валгомс улавонть прясто, уемс чирентень ды раздемс тикше берёма. Истя пиже тикше мельга лиссь лейстэнть.
Таго моли кияванть «аол-уол», кавто ёнов чиремкшнезь, прок иредезь ломань. Коське пенгтне весе начксть ды эйстэст тюрьсэ чуди ведь. Чинзэ валгозь пачкодинек кудов.
— Эдь те тамашань тевсэнть буканть арась чумозо, — идемань валт каясь сыре атясь каштлангстонть. — Эряви чумондомс верень потий промотнень. Неть идемевстне эрьва кодамо ракшанть пильге лангсто правтсызь. Оно кодат! Видьстэ мерян: букась важодема тевень вечкиця, обуцястонзо те ёнксонть кодаяк а нардасак. Седикеле, зярдо арасельть тракторт, комбайнат, машинат, букась лездась ломантненень, кепедсь велень хозяйстванть: сокась мода, нусь-пивсэсь сюро ды топавтсь пек ламо лия тевть. Теде мон парсте содан. Ламо тонавтынь важодеме. Аволь весть понгонинь Орознэньгак. Лия шкатнестэ ды нейгак буканть эйстэ ламодо ашти скалонь стаданть раштамось, паролгавтомась. Од иестэнть вадря изнявкст добовить ракшань трямосонть сетне, кить арсить-мелявтыть скалонь племанть вадрялгавтомадонзо. Нейгак ламонь пельде сеедьстэ марят: «Шумбра улезэ велень букась, карми улеме сатышка ловсояк, сывельгак ды лия сюпавчияк». А стяко те ракшась совавтозь Чилисема ёнксонь ковкерьксэнтень, ды сонзэ лезэнзэ содасызь весе масторлангонть келес.