Вечкиця ни

Кавто аватне, Олёнат-Насят, вастовсть васенцеде тунда. Мирдест туртов явсть мода умат модарькань озавтомс — тесэ теевстькак содавиксэкс. Кавонест понгсть келевть-кортакшовт, лавгизь весе куляст те ютко шкастонть, паряк, натой велькска. Эно кадык, авась текень кис чачни — марязденть ёвтнемс, ёвтнезенть превс сёлгомс…
Вана сась сёксесь. Модарькатне теньгак, тонаньгак чачсть парт, ламо. Васняяк, мирдтне састь — чувомань тевесь сынст. Аватне зярс пряст эзть невтне.
Чикуншкас Олёнань мирдезэ уманзо чувизе пес, натой кундась модарькань пурнамо. Насянсесь цяк-цяк пенть сезизе. Тевезэ стакасто мольсь: койменть лангсо зярсыя тапи-лыки, ансяк мейле модарька нетьксэнть велявтсы. Цёрась сонсь аволь берякшкетнеде, лавтовонзо келейть, кувалмозо сэрей, лангс ваномс, васенцеденть виевекс неяви.
Зярдо Олёна сась мирдензэ ваксс, тона колмо кескавт кенерсь пештямо покш модарькасо. Авась натой пукшонзо лоштинзе мельспародонть.
— Эх-ха, андямо дык андямо тон! Колмо цёрань тев теить! Чувик уманть, оно зяро модарькат пурныть, — шны Олёна мирдензэ. — Сень, оно, неяви, кедтне лиясто касыть. Сон, некак, тондеть икеле уставась чувомо, сонсь кодаяк пелевидьс а пачкоди — сялдозь кортась авась, прясо невтсь вакссост карыцянть пелев.
Мирде мельспаросо. Эно кода, бути нись эйсэть шны! Авань кавто кедтне седеяк капшавтызь тевенть, курок весемесь прядозель, кадовкшнось ансяк модарькатнень пачтямс таркас. Те шкастонть Насяяк сась мирденстэнь лездамо. Васняяк авась чошковтсь Олёнань ваксс, эрь, кода авантень апак корта ютама лия
ава вакска. Калдордсть зярсыя, кортамотне ульнесть эрьва  мезде. Зярдо  чарькодсть — шка явомс, Нася кевкстсь:
— Кода монсесь важоди? Ванса, мекс-бути кадовсь тонсенть эйстэ?
Олёна лови истя: кельпрясто празесь питневтеме, секскак лавсадсь:
— Видьстэ меремс, нузялдозь кары. Оно вант, монь Илька седе мейле уставась чувомо, неят, прядызе, натой зярыя кескавт ськамонзо кочкась, ней вана
прядынек.
       Маряви, Нася токавсь, эно кода лиякс мерят — сельмс мирдеть сялдыть,
секскак сон арсизе пурдамс кортамонть, теке мезеяк эзь маря, сэтьместэ мерсь:
— Ков седе капшазь, адя истяяк моли. Сон монь эдь сыре, ведьгемень кавто ва-ва топодить тензэ.
— Зяро-о? — сяткот верьгедсть Олёнань сельмсэ. — Монсентень ведьгемень сисем топодсть — оно кода чии, соки, теке трактор.
— Ага, тонсесь, неяви, апак томбсе… Монь пиштяканть маныть кедезэ сивекшнесь, — теке мирдензэ прява вадяшазь, кортась Нася.
Арась, авась истяк эзизе максо лиянень спойдамс-сялдомс эрямосо нежензэ, лисни, вечксы атянзо.