Вастовома

А венстемс кедь, а мизолдомс, а кортамс.
Седеенть — коморс, кеденть — штаназепс.
Вакска ютамсто модавийденть сотамс,
Паряк, куш сон мекев а максы потамс,
Мекев — чинть алдо кевпотмаронь вес.

А арсемс одс, а нолдамс, а чаравтомс
Ледстнемань штеренть ютазес. Мекев,
Косо мелеть лиялесть апак савто,
Косо тон вейке ломань явить кавтов
Ды чейпотмова ютавтык кепе.

А максомс пря, а лавшомомс, а лексемс.
Те ульнесь орма, ды муезель менькс.
Мезесь чамдозель, велявтокшнось пешксекс, Верьпотий сеськесь
теевекшнесь мекшекс
Ды медень таркас канды медень ченькс.

А венстемс кедь, а мизолдомс, а кортамс.
Седеенть — коморс, кеденть — штаназепс.
Вановтось бутрав, теке позатортат,
Чикорды рунгось, пексты мештеортат —
Тееви ёжовтомо цюркапекс.