Вандолкай

Эрясь-аштесь валдо-ожо Лампа. Сундерьгадома лангаяк, зярс а кирвазтились, сон неявсь валдокс. Лампа пек вечкилизе эсь тевензэ — максомс валдо, секс аноколь паломс ветькак, читькак.
Весть кизна, чивалгома шкасто, панжадо вальмава кудос ливтясь Нимилявне, ды видьстэ палыця Лампанень. Зярдо пачкодсь малас, нусманя вайгельсэ мерсь:
— Мон арсинь, чипай валдонзо валы, а тесэ мень-бути лампине палы. Ды теяк ансяк мадстемазонзо.
Лампа апаргадсь. «Те сон мекс монь эйстэ истя корты?» — арсесь эськанзо. Марямга мерсь:
— Тон мекс истя згилят лангсон? Мезень кисэ?
— Мон а згилян, — мерсь Нимилявне, — мон апаргадынь. Васолдо неяват свал палыця лембе чипаекс, маласо лият. Весе эрямот плаштинеде ашти: лепштик — мадят...
— Те кона ёндо варштамс! Чоподасо сехте вишкине толкельнесь толпандякс маряви, — псилгадсь Лампа.
— Каик чумом, мариндерить покордавкс, — чова вайгельсэ мерсь Нимилявне. — Валот, нама, видеть. Ансяк чипаесь покш, валдо, лембе. Сон... валсояк а ёвтави кодамо паро. Сон весенень максы эрямо, шумбрачи. Сонзэ весе учить, сонензэ кецнить...
— Монгак лездан азоравам туртов — чоподава валдомтан кудонзо, монь вийсэ сон ловны, сёрмады, коды, викшни, — прась валонзо трокс вандолкаесь.
— Те паро — кандомс лезэ, — мерсь Нимилявне ды капшазевсь вальманть ёнов, мекев оляв.
— Тон ков?! — серьгедсь Лампа.
— Чипаентень, валдонтень! — марясь уш васолдо.
Нимилявнень туемадо мейле Лампа нусмакадсь. Тень эйстэ валдозояк лепамсь. Кувать истя ульнесь. Весть, зярдо стольлангсто челькень нардамсто азоравась путызе сонзэ вальмалангс, эзь цидярдо, венстизе прянзо ушов. Вельть покшоль мелезэ неемс чипаенть, сонзэ валдонть. Венстемс венстизе, ды бажамонь пачк эзизе маряяк, кода сяворсь вальмало касыця шукшторовонь куракшонть потс. Прамсто абажуронь пинкскензэ менчевсть, валдо-ожо тюсозо челькиясь. «Ней уш киненьгак а эряван, эрямом эрявсь, — мелявтозевсь вандолкаесь. — Кинень эряви мерьказь ды рудазов лампась?..» Тесэ марясы: кие-бути эйсэнзэ кепеди. Витнизе-петнизе, нардызе лангстонзо челькенть, путызе стольлангс, пулопесэнзэ сянгиненть ёвкстызе розеткас ды лепштизе плаштинензэ. Лампа кенярксовсто кивчкадсь ды валдосонзо пештизе кудонть. «Монень тесэяк аберянь, — арсезевсь сон. — Кадык мон аволь истямо покшан, кодамо чипаесь, кадык а истямо валдоян, ялатеке теян эрявикс, лезэв тев».
Видеяк, тевтнень онкстнить аволь покшчисэ — лезэвчисэ.