Вана истямо ёвтнема
Мария мон сонзэ умок. Мария ды сеске меринь эстень: сёрмадса конёв лангс. Кадык эри седе кувать.
Егор лелянь марто лисинек таргамо. Тельня, зярдо чокшнесь пексты вальматнень чоподасо ды кельмевти пертьпель-
ксэнть рунгонзо, пек вадря таргамс ушосо. Лыткакс сорнозь, нолдат качамонть коштонтень ды теке пелькстат мартонзо: «Тон монь якшамосо, мон тонь — лембесэ. Варштасынек, кие кинь».
— Истякак теке илев аштят, ды ялатеке таргат! — ушодсь сёвномон Егор лелям.
— Тонадовсь. Мезе теят, — нурькинестэ меринь мон.
— Ды те мезеяк, — кортазевсь лелям ды варштась верев, чопода-сэнь менелентень. — Аволь свал шумбрачисэ ды сталмосо тевесь. Сильверэнь содылик?
— Арась, васенцеде марян…
— Ды кода васенцеде? — аламодо талакадсь лелям. — Алопесэ эрясь, вейке пильгезэ арасель. Кулось ват а умок.
— Аздаса, леляй, куш ледемак. Мон бути кизна тесэ седе сеедьстэ эрсян. Ламонь аздасынь.
— Кхе! Куш ледемак, мерят? — мизолкстомо згилязь, кевкстсь Егор лелям. — Ужо, ёвтнян теть вейке ледемадо, кунсолок.
Мон кирвазтия омбоце сигаретанть ды ушодынь кунсоломо. Лелям — апак капша ёвтнеме:
— Минь мартонзо вейсэ тонавтнинек. Вадря цёрабайнесь ульнесь, пейдиця, весенень свал лездась…
— Лемезэ эно кода? — эзинь цидярдо мон.
— Мишка. Миша Вармайкин, — монь а тарказост эцезь валтнэнь лангс апак кежиявто, мерсь лелям. — Цёрынетнень эйстэ ульнесь сехте коське, алкине. Пейдинек лангсонзо: вармине, мертяно, пувазеви, ливтязь туят! «Тынсь илядо туе!» — пейдсь сон каршонок. Коськана, ды азё понгт тензэ — аздат ков прят кекшемс. Кодашка вий потсонзо ульнесь! Эдь суронь эчкесэ, — невтизе суронзо Егор лелям, — ды кода тюрсь! Кавто-колмо цёрат правтомс — те тензэ теке карвине лепштямс. Сон теня беш, бороцицякс ульнесь. Республикань келес киненьгак эзь изнявкшно. Кемат, сы пелькстамос — тосо васенце тарканть кис конёвонтень икелевгак сонзэ лемезэ сёрмадозь. Эх, кода сон бороцясь! — лелям кепедизе вайгелензэ. — Кедензэ — кшнинь уськеть, кундатанзат — а тей а тов, ковгак а молят. Ды истямо ёроков, эряза ульнесь, теке ёндол! Маштсь бороцямо, мезеяк а мерят. Пазось, нама, теньсэ казизе.
Школанть прядынек, весе мирём — ПТУ-в. Мишкаяк мартонок. Мейле — армияв. Сась, кармась важодеме чугункань ки лангсо. Вагонга якась, вансь, весень-аволь улить билетэст. Бороцямонтькак эзизе кадно — яла ардтнесь эрьва кодамо пелькстамотнес.
Шкатне сестэ ульнесть аволь пек парт. Поездсэ важодицянтень эрявсь улемс а пелиця ломанекс. Ламо татарт сестэ ардтнесть. Аволь ансяк ардоманть кисэ эзть пандо, стоп-кранонтькак ноцковтнесть, косо ульнесь мелест лоткамс, зярдо-зярдо мик ломантькак грабасть. Ансяк Мишканень варчак а пандомс ардоманть кисэ! Ламотнень сон «тонавтынзе эрямо». Пельсть эйстэнзэ — теке толдо. Ськамонзо ветешка ломанть мерькиль. Кармасть татартнэ сонзэ кундсеме, кежть пандыксэльть. Ды эзь кундаво кодаяк — чийнесь Мишка эрязасто.
Весть татартнэнь истя кежест кирвазсть — Мишка сестэ та-кинь поездстэ ёртызе, — састь тензэ видьстэ кудос колоньгеменьшканест. Мишка кувать апак арсе цопадизе тетянзо обрезэнть, ёвкстызе карксамозонзо ды — вальмава. Напустясь модамарень пирев, ды ки соды кода ды мекс обрезэсь ледсь. Паряк, сонсь Мишка токизе, паряк, кшнись лавшомгадсь. Ледсь ды понгсь Мишканень пильгес. Верь потсо, меельце вийтнень пурназь, Мишка ялатеке оргодсь татартнэде. Зярыя чить та-косо кекшнесь эйстэст. Окойники сась больницяв. Тосо теке лакиведьсэ валызь — гангрена. Пильгензэ керизь кумажа видьга, — Егор лелям чатьмонезевсь ды, улема, оймсемань таркас ушодсь таргамо.
— Седе тов мезе? — эзинь кирдеве мон.
— Мезе, мезе… — сэтьместэ кортазевсь лелям. — Содави, кода комсь иесэ пильгевтеме кадовомс… Кортыть, Мишка керязь пильгензэ саизе больницясто мартонзо ды понгавтызе кудопряс. Колмоксть, келя, повиксэль. Ды мон а тенень, а тонанень а кеман... Мейле важодсь элеваторсо ванстыцякс. Симеме кармась. Усксызь, эрси, слепа иредезь кудов, сон ёртсы чувтонь пильгензэ, вейкесэнть кирнявтни-кирнявтни, пры ды ушоды — зярдо авардеме, зярдо ракамо. Велень ломантне лемдизь сонзэ Сильверэкс. Эзь урьвакстовояк Мишка. Яла симсь ды симсь. Вана кулось а умок, калминек… — нолдызе прянзо Егор лелям.
— Эрямо… — стакасто лекстинь мон.
— Аволь эдь эсензэ кисэ татартнэнь марто тюрсь, сонзэ истяк кияк аволизе тока… Вадря, алкуксонь ломанекс ульнесь Мишка. Ансяк симемантень прась — тесэ уш кияк а чумо. Адя, некак, соватано, пачк кельминь, — апак учо мендинзе валонзо лелям.
— Адя, — меринь мон, ды минь совинек лембе кудонтень.
Вана истямо мон маринь ёвтнема. Ды ней, тынсь нетядо, конёв лангскак сёрмадыя. Кувать арсинь, кода сонзэ лемдемс. Ансяк видестэ ды мазыйстэ ёвтнеманть лемдемга васняяк эряви парсте содамс, мезде сон ды кодамо. Мезде? Содави, Мишкань эрямокидензэ. Ансяк кодамо — нусманя, сельведень таргиця, тонавтыця, арсевтиця, — мон аздан. Тынсь, бути ули меленк, ладинк — кодамо. Монь койсэ, сон истямо, кодамо ули. Секс лемдезьгак прянь апак яжа.
Егор лелянь марто лисинек таргамо. Тельня, зярдо чокшнесь пексты вальматнень чоподасо ды кельмевти пертьпель-
ксэнть рунгонзо, пек вадря таргамс ушосо. Лыткакс сорнозь, нолдат качамонть коштонтень ды теке пелькстат мартонзо: «Тон монь якшамосо, мон тонь — лембесэ. Варштасынек, кие кинь».
— Истякак теке илев аштят, ды ялатеке таргат! — ушодсь сёвномон Егор лелям.
— Тонадовсь. Мезе теят, — нурькинестэ меринь мон.
— Ды те мезеяк, — кортазевсь лелям ды варштась верев, чопода-сэнь менелентень. — Аволь свал шумбрачисэ ды сталмосо тевесь. Сильверэнь содылик?
— Арась, васенцеде марян…
— Ды кода васенцеде? — аламодо талакадсь лелям. — Алопесэ эрясь, вейке пильгезэ арасель. Кулось ват а умок.
— Аздаса, леляй, куш ледемак. Мон бути кизна тесэ седе сеедьстэ эрсян. Ламонь аздасынь.
— Кхе! Куш ледемак, мерят? — мизолкстомо згилязь, кевкстсь Егор лелям. — Ужо, ёвтнян теть вейке ледемадо, кунсолок.
Мон кирвазтия омбоце сигаретанть ды ушодынь кунсоломо. Лелям — апак капша ёвтнеме:
— Минь мартонзо вейсэ тонавтнинек. Вадря цёрабайнесь ульнесь, пейдиця, весенень свал лездась…
— Лемезэ эно кода? — эзинь цидярдо мон.
— Мишка. Миша Вармайкин, — монь а тарказост эцезь валтнэнь лангс апак кежиявто, мерсь лелям. — Цёрынетнень эйстэ ульнесь сехте коське, алкине. Пейдинек лангсонзо: вармине, мертяно, пувазеви, ливтязь туят! «Тынсь илядо туе!» — пейдсь сон каршонок. Коськана, ды азё понгт тензэ — аздат ков прят кекшемс. Кодашка вий потсонзо ульнесь! Эдь суронь эчкесэ, — невтизе суронзо Егор лелям, — ды кода тюрсь! Кавто-колмо цёрат правтомс — те тензэ теке карвине лепштямс. Сон теня беш, бороцицякс ульнесь. Республикань келес киненьгак эзь изнявкшно. Кемат, сы пелькстамос — тосо васенце тарканть кис конёвонтень икелевгак сонзэ лемезэ сёрмадозь. Эх, кода сон бороцясь! — лелям кепедизе вайгелензэ. — Кедензэ — кшнинь уськеть, кундатанзат — а тей а тов, ковгак а молят. Ды истямо ёроков, эряза ульнесь, теке ёндол! Маштсь бороцямо, мезеяк а мерят. Пазось, нама, теньсэ казизе.
Школанть прядынек, весе мирём — ПТУ-в. Мишкаяк мартонок. Мейле — армияв. Сась, кармась важодеме чугункань ки лангсо. Вагонга якась, вансь, весень-аволь улить билетэст. Бороцямонтькак эзизе кадно — яла ардтнесь эрьва кодамо пелькстамотнес.
Шкатне сестэ ульнесть аволь пек парт. Поездсэ важодицянтень эрявсь улемс а пелиця ломанекс. Ламо татарт сестэ ардтнесть. Аволь ансяк ардоманть кисэ эзть пандо, стоп-кранонтькак ноцковтнесть, косо ульнесь мелест лоткамс, зярдо-зярдо мик ломантькак грабасть. Ансяк Мишканень варчак а пандомс ардоманть кисэ! Ламотнень сон «тонавтынзе эрямо». Пельсть эйстэнзэ — теке толдо. Ськамонзо ветешка ломанть мерькиль. Кармасть татартнэ сонзэ кундсеме, кежть пандыксэльть. Ды эзь кундаво кодаяк — чийнесь Мишка эрязасто.
Весть татартнэнь истя кежест кирвазсть — Мишка сестэ та-кинь поездстэ ёртызе, — састь тензэ видьстэ кудос колоньгеменьшканест. Мишка кувать апак арсе цопадизе тетянзо обрезэнть, ёвкстызе карксамозонзо ды — вальмава. Напустясь модамарень пирев, ды ки соды кода ды мекс обрезэсь ледсь. Паряк, сонсь Мишка токизе, паряк, кшнись лавшомгадсь. Ледсь ды понгсь Мишканень пильгес. Верь потсо, меельце вийтнень пурназь, Мишка ялатеке оргодсь татартнэде. Зярыя чить та-косо кекшнесь эйстэст. Окойники сась больницяв. Тосо теке лакиведьсэ валызь — гангрена. Пильгензэ керизь кумажа видьга, — Егор лелям чатьмонезевсь ды, улема, оймсемань таркас ушодсь таргамо.
— Седе тов мезе? — эзинь кирдеве мон.
— Мезе, мезе… — сэтьместэ кортазевсь лелям. — Содави, кода комсь иесэ пильгевтеме кадовомс… Кортыть, Мишка керязь пильгензэ саизе больницясто мартонзо ды понгавтызе кудопряс. Колмоксть, келя, повиксэль. Ды мон а тенень, а тонанень а кеман... Мейле важодсь элеваторсо ванстыцякс. Симеме кармась. Усксызь, эрси, слепа иредезь кудов, сон ёртсы чувтонь пильгензэ, вейкесэнть кирнявтни-кирнявтни, пры ды ушоды — зярдо авардеме, зярдо ракамо. Велень ломантне лемдизь сонзэ Сильверэкс. Эзь урьвакстовояк Мишка. Яла симсь ды симсь. Вана кулось а умок, калминек… — нолдызе прянзо Егор лелям.
— Эрямо… — стакасто лекстинь мон.
— Аволь эдь эсензэ кисэ татартнэнь марто тюрсь, сонзэ истяк кияк аволизе тока… Вадря, алкуксонь ломанекс ульнесь Мишка. Ансяк симемантень прась — тесэ уш кияк а чумо. Адя, некак, соватано, пачк кельминь, — апак учо мендинзе валонзо лелям.
— Адя, — меринь мон, ды минь совинек лембе кудонтень.
Вана истямо мон маринь ёвтнема. Ды ней, тынсь нетядо, конёв лангскак сёрмадыя. Кувать арсинь, кода сонзэ лемдемс. Ансяк видестэ ды мазыйстэ ёвтнеманть лемдемга васняяк эряви парсте содамс, мезде сон ды кодамо. Мезде? Содави, Мишкань эрямокидензэ. Ансяк кодамо — нусманя, сельведень таргиця, тонавтыця, арсевтиця, — мон аздан. Тынсь, бути ули меленк, ладинк — кодамо. Монь койсэ, сон истямо, кодамо ули. Секс лемдезьгак прянь апак яжа.
Автор: Виталий Картышкин