Урьвакстома

Федя цёрась аволь одтнэде — кодгемень эль топодить. Меельце пес цидярдсь, ве аваненьгак эзь маняво, ансяк мелят вана сайсь ды урьвакстсь. Никс кочкизе Позынькань Катюшань. Авась — зяро сэрьс, зняро келес. Тона апак венча веженсь тейтерензэ ветизе —авадонзо аламодо седе човине. Телень перть эрясть-чадсть ве кудосо — мезеяк эйстэдест эзь марявкшно. Тонадокшность вейке-вейкенень, теке истя эрявияк.

Я, тундо ёнов Катюша тейтернек-канстнэк сапонекс нолажтсь Федянь кудосто. «Мезе лиссь? Мекс истя?» — якасть кевкстематне кургсто кургс, ломанде ломаньс. Киненьгак тувталось эзь чарькодеве. Савсь кевкстемс эсензэ азоронть.
Федя сёпомо эзь машто, ёвтнизе кода ульнесь:
—  Истя мон ськамонгак эрян. Тынсь арседе: ават-тейтерть умбодыть тантейнестэ валске марто — рунгост сравтсызь таркатнева, учить чикуншкань ярсамонть. Шкань ютазь таго стить, трескить колмо вакансто, сяворить лужалеме чокшнес. Истя тевесь аравтовсь — микшнема кудось монь зепенть вельде планонзо топавтнизе. Ват, ней чувномань-озавтомань шкась сась. Ансяк ледстинь тенст эмежтнеде, мерян, прят-пильгть чавомат пиресэнть, авань кедть эрявить — сынь поцор-поцор пурнызь нуласт-валаст, ды теке неевтест.

Истя вана Федя урьвакстнесь. Паряк, секс кортытькак: вейкень-вейкень содамга пондо сал сэвема.