Умарь

Минек умаринась паро,
Умарензэ — теке медь!
Эрьва ие эйстэст зняро —
Ванозь, сявадыть сельметь.
Минь явтано эрьва кинень —
Парось велявты мекев.
Ансяк тедеде, ялгинень,
Лиссь вана истямо тев:
Вейкине умарне мазый
Минек умаринась макссь.
Пек учинек, зярдо касы.
Исяк кенерсь сон ды прась.
Содан мон: умаресь тантей.
Сэвемс сонзэ — шожда вельть.
Ансяк салава мерян тенк:
Сась монень лията мель.
Исяк ульнинь Танянь кедьсэ:
Чайде каванимим сон.
Мейле кстыйс якинек вейсэ...
Некак, вечкса Танянь мон.
Кандса умаренть сонензэ.
Сэвсы, мери: «Седейвитькс!»
Мон весементь максса тензэ, —
Ялатеке сайса никс.