Тюнголькс

Пизёл Петя истямо ломанесь, мезе а кармавтат тензэ — весементь мекевланг тейсы. Паряк, эсензэ мельсэ истя, паряк, сонсь а фатиль тенень. Низэ мезеньгак тееме кармавтсы — пильгензэ теке педить кияксс, сыргиндеряйгак, тевезэ а лиси. Мерема, кучсы ведьс, шкань ютазь мурды — а ведь, а кедьге. «Косот?» — кевкстьсы полась. «Прахось саезэ, кечказстонть менсь, ваясь, омбоцеськак мильтёк тейсь мельганзо…» — каршо мери тона. Кемть-иля — кедьгетне арасть.
Та-кода лететсь тензэ молемс Чаунзав, нись тензэ: «Эрь, кирдть ярмакт. Ва курок тикшень ледема шкась сы, минек паро пелюманок арась, рамак».
Арсетядо, мезе тейсь азорось? Лытынзе эсь тевензэ, ледсь мелезэнзэ нинзэ кармавтомась, ансяк мезе эрявсь тензэ, Петянень кодаяк эзь ледстяво. Чульть-чальть, зэхель варминень кондякс лимкадсь превганзо: маряви, пелюмадо кортамось мольсь.  Ансяк вана сонсь кшнистэ ледемапелесь эрявсь эли недесь, те эзь ледстяво. Варштынзе ярмашкетнень: бути рамамс кшнипельксэнть — весемезэ вейкес сатыть, бути недть — ого-го-го, кементнень малава. «Рамангак седе ламодонть…» — койсэнзэ, седе эрявиксэнть кочкизе цёрась. Истя тейськак.
Сась кудов. Олда ваны — поланть лавтовонзо лангсо валакавтозь ологань канст. Нись натой сэставсь.
— Нетнень мезекс рамить? — апаркстомсь азоравась.
Петя каршонзо:
— Тонсь кармавтыть.
— Мон тонеть мезе меринь — од пелюма рамамс, аволь оровт койме недть!.. — пильгсэ ботадизе кияксонть Олда.
— Ужока, тон костояк некшнить — пелюма недтнень микшневельть лавкасо? Сынст бути ансяк вирьстэ керясыть! — пизякадсь Петя.
— Сестэ мезекс рамить койме недтнень? — седеяк сыремсь Олда.
— Мерить рамамс, мон раминь. Мезе, чавонь кедть савлинь — седе шожда улевель?! — пижнемас эль пачкоди Петя.
— Адя эно, мартоткак… — аволдась кедьсэнзэ авась ды лиссь кудыкелев.
Истямокс вана свал велявтыль Петянь ковгак кучомазо.