Цирькундо ды мородонзо

Цирькунонть аволь весе неизь, ды маризе, паряк, эрьвась. «Цирь-цирь, цирь-цирь!» – гайги яла чокшнэ велень кудосо каштомонть удало эли ошонь кудонь подъездсэ.
Кортыть, келя, икеле цирькунонть арасель эсензэ морозо. Чачсь сон, ёвтнить, истя...
Арсесь цирькунось урьвакстомо ды одирьва кочкась эсензэ кондямо чатьмониця. Одирьвась понгсь кольняй обуця марто.
– Морат монень моро, – корты цирькунонтень, – сестэ лисян тонь экшс.
Цирькунось арси: «Кода мон моран, бути вайгелем арась?» Арсесь-тейсь рамась истямо бизнэмка-велямка: чары ды бизны.
Бизны бизнэмкасонть цирькунось, одирьвазо яла а сы. Ливтясь малазонзо промо.
– Тонеть мезе, цирькун? – кевкстни.
– Одирьвам тердян. Моро седян, – мерсь каршонзо.
– Мекс эно бизнат? – кевкстни промось. – Те минек морось.
Арсесь-тейсь цирькунось ды рамась тутушка-бийнемка. Пуви цирькунось – тутушкась бийни. Одирьвась таго арась. Ливтясь малазонзо сеське.
– Цирькун, тонеть мезе? – кевкстни.
– Моро седян – одирьвам тердян, – пшкадсь каршонзо цирькунось.
– Мекс эно бийнят – минек, сеськетнень, талновтат-мелявтовтат?
Рамась сестэ цирькунось кайга. Рамизе, сонсь седямо а машты.
«Жик-жик, жик-жик!» – эсь койсэнзэ седи-налкси цирькунось, одирьвась яла прянзо а невти.
– Тон истя мезе теят? – кевкстни цирькунонть тастась (кузнечик).
– Моро седян – одирьва тердян. Сон кодаяк а сы, – корты цирькунось.
– Кода сон сы, – мери тастась, – тонь морось минекенть ёнов моли.
– Ней монень мезе теема? – укстась цирькунось.
– А тон варчик кедьёнксот лиякс саемс, – путы превс тастась. – Кайганть ве сёлмозот сялгик, седямо налонть – омбоцентень. Одирьвань вешнемскак седе вадря ули, вант, мороткак лиякстоми.
Кунсолызе цирькунось тастанть, теизе весементь истя, кода тона кармавтсь. Лыкавтынзе сёлминензэ, кайгась тень пингстэ: «Цирь-цирь!» Кецясь цирькунось ды адя цирнеме:
– Цирь-цирь! Цирь-цирь!
Абунгадсть промотне, талакадсть карвотне, либоргадсть нимилявтнэ:
– Те кие истя седи?!
Весе пурнавсть од моронь кунсоломо. Чатьмониця одирьваськак малазост сась. Цирькунось яла седи ды седи:
– Цирь-цирь! Цирь-цирь!
– Вана, – мерсь цирькунонтень одирьвазо, – ней тонь эсеть морот ули, ней молян тонь экшес.
Сеяк виде: эрямосо эрьванть эсензэ морозо улезэ.
Вень перть цирькунось моросонзо кенярдовтсь одирьванзо. Валскень пелев сизесь, арсесь кайганть паргинес путомс, ансяк тона ве сёлмозонзо педясь, седямо налось – омбоцентень. Истя сон кандтнияк сонзэ эсензэ лангсо. Истяк седияк: «Цирь-цирь! Цирь-цирь!»
Паряк алкукскак тевесь ульнесь истя.