Содамоёвкс

Талай сёксень ушось якшамо, начко, чопода. Чинь-чоп суводи пезеря пиземе. Шкань-шкань певери лов. Сон ашодояк ашо, кавшаня, ламо тюссо цитниця. Раужонть ютксо валдось ды ваньксэсь — кеняркс. Ансяк те эзь кецневте вирень килангсо менельс ваныця ведьсельметнень. Сынь нусманяльть ды сеедьстэ укстнильть. Тувталось содавикс: течи-ванды якшавты, ды ведьсельметне вельтявить эень кувосо, тертявить тундос. Ансяк ёвтнеманок аволь сындест.
Ведте пешксе вейке латкиненть чиресэ аштесь Нумолнэ ды мезде-бути арсесь. Сон истя пек яжась удемнензэ, истя кавтолдсь, мик качамо тюс чевте понынензэяк стядо стясть. Сонензэ кодаяк эзь чарькодеве: мекс сеть ловбельгинетне, конат прыть мода лангс, аштить ды цивтёрдыть, лиятне, конат прыть ведьсельмес, ёматыть? Мекс?
Нумолнэ кувать яжась прянзо тень коряс ды эзь редя, мезе моли перьканзо. Стяко. Мельганзо умок уш вансь вачо Верьгиз. Сёрмавось арсесь: «Кирнявтан  ды…». Сон учось аламос ды кирнявтсь. Нумолнэ вансь ведьсельмес прыця ловонть лангс, секс эзь тандадояк, ансяк мерсь:
— Иля налкставтне!
Верьгиз васня ацирьгадсь, мейле абунгадозь кевкстсь:
— Тон содымик?
— Содытинь, — мерсь Нумолнэ, — ансяк монень а зярдо мартот озямс, тевем ули.
— Кодамо? — седеяк абунгадсь  Верьгиз.
— Арсян, мекс ведьсельмес прыця ловось ёми? Дюния лисни…
Тесэ Нумолнэнень сась ёжо. Сон шаштсь Верьгизэнь эйстэ веёнов, мейле напустясь ков сельмензэ неить.
Верьгизнэнь Нумолнэ уш эзь эряво. Сон арсесь седе, ков ловось ёми…