Шукшпря

Ашо килей ало, тумонь эзем лангсо, пильгесэ юхаезь, озадо аштесь Илька. Вишка Илюша, кода тензэ мери вечкема бабазо. Илька вансь верев, пельтнень лангс. Эрьва мезть ардыть верьга: алашат, скалт, — те шкане цёрынесь эрьва кодамо тюссо арты эйсэст.
Ваксозонзо лоткась цёра. Палязо карксазь якстере каркссо ды викшнезь эрьва кодамо суресэ.
Ванат палянть лангс ды дивсят. Маряви, ёматы те ломанесь — ёматы чиськак. Кедьпесэнзэ якстере кескав, кодамо эрси Якшаматянть.
— Илька цёрам, кувать вешнинь эйсэть. Адя кудов. Аваткак стомавсь эйсэть учозь.
Илька тандадозь вансь цёранть лангс. Зяро аволь цёранть, кода кескавонть лангс педявтынзе сельмензэ.
— А неть — каванямкат теть, — мерсь цёрась ды тонгизе кедензэ кескавонтень.
Те цёрастонть Илюша содызе тетянзо.
— Вай, тетяй, вечкема тетяй! Мекс зярс эзимик муе? Учомак, тетяй, мон нейке сан: шляса чамам, каванямкатнень кандсынь бабань туртов — сон пингень перть истят эзь некшне.
Чии Илька кудов мезе вий. Тупор-тапор тапсевить пильгензэ, секе-тев велявтни удалов — кода а лиядомс тетянть эйстэ.
Вармакс оршизе Инечинь палянзо, кенкшеськак эзь кенере пекставомо, кода Илька панжизе сонзэ мекев.
Сась те таркантень, ашо килеенть ваксс, тетязо — а тесэ, а тосо.
Истя аварьгадсь Илюшань седеезэ, истя кармась рангомо — Олдай баба цють эзь кевере пецьканть лангсто.
— Илюша! Илюша! Мезде истя тандадыть?
Цёрынесь панжинзе сельмензэ, эрьге сельведтензэ начксь натой тодовось. Илька кутмордызе бабанзо.
— Бабай, каванямкатнень варчнить, конатнень тетям кандынзе? Ней теть а маняван, моньгак улить тетямгак, авамгак. А тон яла мерят, карго кандымим. Арази каргонть туртов кандован? Курок молян школав, тонадан ловномо ды...
Неть валтнэде мейле цёрынесь матедевсь псакань удомасо.
Олдай баба састыне вельтизе нуцьканзо пандтнезь ватоласо, палызе коняс, кирвазтсь штатол ды, чова вайгельсэ рангозь, панжизе вальманть.
Чинть лисемс Олдай баба вансь шабра кудонть лангс, конань вальманзо ды кенкшензэ чавозельть тумо лазсо. Сон ацирьгадозь вансь се кудонть лангс, козонь чачсь Илюша.
Чилисемась эзь капша стямо Деба пандонть ёндо. Мерят чипаесь седей марясь велень эрицятненень, конат, прок коткудавт, чинь-чоп пивтить эсест пизэсэ. Велесэ читне пек кувакат: а кенерят мадеме — мекев уш стяма. Дюм чоподава кудотнева уш толт палыть. Кинь трубасто качамо лиси, кие кардазсо котьми. Мезе теят — истямо уш велень эрямось.
Трактортнэ эзть кенере лисеме паксяв, Илька уш пильгелангсоль.
— Бабай, течи тонган кавонст цюлкат — котан допрок каладсть, паксяв молемстэ кевть понгонить.
Верень пиемс чии паксянть ёнов пиже зорява Илюша.
— Эй, Шукшпря! Седе куроксто сак, — серьгеди Митя лелясь ды панжсы тракторонть кенкшензэ.
Сы кудов ярсамо Илюша, сизезь ёвтни:
— Течи Митя лелянь марто тыц ардтнинь, целанек борозданть монсь сокия. Вай, кодамо паро! Касан — трактористэкс карман важодеме.
— Эно мекс истя рана сыть? — кевкстни бабазо.
— Мекс, мекс? Тонсь содат — Митя лелянь эсензэ цёразо ули. Кадык ардтнить... Курок монськак кшнинь айгор кильдян.
Аламос арсезь, кевкстизе бабанзо:
— Мекс тень Шукшпря мерить? Мезе те истямось?
— Мон, цёрам, монськак а содан те валдонть. Улема, сон омбомасторонь.
Илька неть валтнэде мейле судонзояк верев кепедизе.
Истя кортнематне яла прядовильтькак. Ансяк касы Илюша, ды седе тов седеяк стака ули толковамс тензэ сонзэ кевкстематнень.
Лиясто ваны Олдай цёрыненть лангс, петерь-петерь певерить сельведензэ: «Вай, а кастови, а кепедеви, а стявтови пильгелангс — седеем мари, кулан... Вай!..».
Ярсамодо мейле Илька яксесь велепесэ шукшпрянтень. Саи палка, сокари. Вант, кем муи, кота. Кементь кандсы кудов, керясы верьксэнть — колоша лиси.
Велень ломантне ёвтнильть, Илька вишкапингестэ ёмакшнось, ды сонзэ муизь се шукшпрястонть. Течис истя тензэ меритькак: Шукшпря.
Илька мезеяк а соды тетядонзо-авадонзо. Арси, целанек пингезэ юты тесэ, Олдай бабань кудосо.
Чокшнеланга, зярдо тевтне прялевильть, озыть эзем лангс ды кармить бакулямо.
— Иля пеле, бабай, касан, сайсамизь важодеме, свал карматано чевте кшиде бумболямо.
Цёрынесь сайсы бабанзо кеденть ды мик таймазкады:
— Мекс кедеть истят тарадовт?
— Те, Илюша, аволь тарадт, те сыречись сась монь мельга, — ёвтни бабазо.
— Мон сыречинтень а макстан. Вана кодамо уро исяк муинь. Путык тодовот алов — ванды вансынек кедеть.
Омбоце чистэнть Олдай баба эзь стяво. Сэредсть карязонзо, лажнось рунгозо, чулгсететсть пильгензэ. Лиякс меремс, сыречись совась Олдай бабас весе сэрьсэнзэ.
— Вай, апаро орма, косто даволось кандынзить?
Неть валтнэде мейле сыргозсь Илюшаяк ды ёртовсь пецькалангс — бабанзо кедензэ ваномо.
— Азё, Илюша, Маша патять кисэ чийнек, паряк, кодаткак ашо повт максы — ормась нолдасамам.
Ушов лисемстэ Илюша панжизе кенкшенть ды теке палмань стясь.
— Бабай, бабай, вечкема бабинем! Тон эдь а кулат, а кадсамак? Бути истя, кадык сыречись монь кедьскак тарадт нолды, кавонек сайсамизь!
— Тон мезть кортат, нолготуло? Ванды школав пурнамат. Азё, азё, иля стувто, кинь мельга кучитинь.
Аламо шкань ютазь Бойка Маша ульнесь Олдай бабань кедьсэ.
— Кулома ланга иля арсе, Олдай патяй. Тонь нуцькат пештешка, — раксезь ладсо кортнесь авась. — Стувтык сыречить.
Чокшне ёнов Олдай баба стявсь. Ормась нолдызе (жализе, нать, цёрыненть), ды кундась сон пачалксень панеме. Истят пачалксеть киненьгак а паневить: сэрейть, оевть. Сэвсак вейкенть — седеетькак витеви.
Илюшаньгак ёжозо паролгадсь. Сон соды: ванды школав моли бабанзо марто.
Чокшнень перть цёрынесь токшесь-штюпась панаронзо, конань бабазо рамизе школав молеманень. Кавонест ризныть чинть кувалма.
«Вай, кодаяк чись а лиси! Седе курок бу!» — яла тошксесь цёрынесь эстензэ.
— Иля лабордо, мадть, удомат а яви. Уроксто матедеват, прат, прок овто, партанть лангсто, ды тонавтыцясь мекев пантянзат, — пейдезевсь бабинесь.
Истямо мазыйкс марявсь Илюшанень бабанзо пейдемась!
Велень ломантне скалосткак эзизь пансе стадав, Олдай баба марто Илюшат уш пильгелангсот.
Олдай баба раужо цецяв руцясо. Илюша ашо коцтонь викшнезь палясо, пильгесэнзэ од котат.
Авакай-корьмакай, кода састынестэ моли шкась, мерят лоткась.
...Вальмава неявсть школав ютыцят. Тетяст-аваст марто — улема, васень классос; конатне ськамост, покшокс эсь пряст ловить — тетятне-аватне удало эли икеле молить.
Бабась чекась-покась, путсь столенть лангс шумбра кши ды лиссь ушов.
Эзь кенере бабась панжоманть путомо, кода икелест лоткась машина. Тосто лиссь сэрей ава, сельмукшсо, кедьсэнзэ кедень сумка.
— Те цёрынесь, улема, Шукшпря? — коське чова сурсонзо невтсь цёрыненть ёнов.
Илька потазевсь бабанзо удалов.
Авась рузаваль. Велеванть ардтнесь, вешнесь Илюшань — кияк эйстэнзэ а соды. Мейле чарькодсть: те Шукшпря. Ды истя книгазонзояк сёрмадсь — Шукшпря. Илька лиссь бабанзо удалдо.
— Патяй, минь капшатано школав, арась шканок, — ды цёрынесь кедте кармась ускомо бабиненть эйсэ.
— Иля капша, цёрыне, монень эряви кортамс бабать марто. Тон учомизь, минь кортнетяно. А кувать.
Сынь совасть.
— Евдокия Степановна, — кармась кортамо рузавась, — мон сынь роносто, кортамось карми молеме Илькадо. Тынь уш сыредиде...
Неть валтнэде мейле бабиненть прок сулей вачкодизе. Рузавась яла кортась, Олдай баба мезеяк эзь маря, ансяк тандадозь вансь лангозонзо. Чарькодевсть меельце валонзо: «Илькань сайсынек ошов».
Рузавась стясь столенть экшстэ, панжизе кенкшенть ды казямосто мерсь:
— Анокстадо, ванды сатано кисэнзэ, конёвтне уш анокт.
Олдай баба озавсь: а стяви, а серьгедеви.
Зярдо авась озась машинантень, Илька совась кудос.
Бабась лайшесь. Табуретканть лангсто стямсто новольсь масторов. Илюша ноцковтызе тодовонзо алдо чеменев уронть ды юхаезь чийсь машинанть мельга...
Зярс иля чие, ниле чары мартонть а сасасак. Илька велявтсь кудов. Бабазо яла озадоль эсь таркасонзо.
— Мезе тейсь мартот, бабай? Таго сындеряй, невтьса, кода сыре ломанть покордамс.
Олдай чарькодсь: сась шка ёвтнемс Илюшанень икелень эрямонзо.
Чокшнеланга Илька кузсь каштлангс ды сэтьместэ учось, мезде карми ёвтнеме бабазо.
«Кавксо иеде теде икеле шабрасон эрясть кавто мазый превей ломанть. Лездынек вейкенек-вейкенек туртов кие мейсэ машты. Эринек кавто кудосо — марявсь, прок ве семиясо. Вечкемась одтнэнь туртов кандсь тейтерне. Кодамоль кенярксось! Ансяк эрьва часиянть ули пезэ. Кармасть симеме. Тейтерьканть саизь ошов эйкакшонь кудов.
Кавто иень ютазь чачсь цёрынест. Мазый, чамаумарензэ кувтолдыть, сельмензэ — прок пиземеде мейле менелесь. Эзизь сайнеяк кедьстэнь. Вечкевсь тень эйдесь.
Те вишка цёрынесь ульнить тон. Тетят ды ават ёмавтызь эсь пряст стякодо...
Зяро монень савсь тюремс тонь кис, ней вана таго... Содак, тонь ули сазорот. Муик сонзэ. Монь илямак стувтне. Сак калмамон. А те, шабрань кудось, конадо свал теть ёвкст ёвтнилинь — чачома кудот».
— Арась, арась! Аволь истя! Монь кудом вейке, тетям-авам — те тон. Кияк монень а эряви...
Валске марто машинась таго лоткась кудост икелев. Велень ломантне састь Шукшпрянь ошов ильтямо. Олдай баба ливтсь кудосто пазава, баславизе цёрыненть, каясь кирьгаванзо крёст.
— Азё! Пазось мартот улезэ!
Истя сэтьместэ мерсь Олдай баба, натой сонсь талакадсь.
— Тон мезть, бабай, кинь кунсолат? Модас теть сюконян, илямак максо.
Бабанть седеезэ авардсь, ансяк сон эзь невте пря. Сезевсь сыречинть седейнильксэзэ.
Машинась састыне токавсь таркастонзо. Илька вансь бабанзо лангс удалце вальмаванть. Бабазо лиссь кинть куншкас ды снартнесь чиеме. Пильгетне тапавсть, ды сон весе сэрьсэ прась пулев кинть лангс.
— Нолдамизь! Нолдамизь! Ванодо, бабам прась! Нолдамизь! — пижнесь цёрынесь.
Кода Илька эзь вачкое кенкшенть — тензэ эзь панжово. Удалов уш кадовсь чачома велезэ, кудозо, бабазо, ялганзо...
Илька арды машинасонть, ваны пертьпельга. А пе, а ушодкс. Кодашка минек модась!
Вана неявить ошонь покш кудотне. Вай! Те мезе истямось? Ашти ве пильге лангсо, сельмензэ колмо ды весе лият: ожо, пиже, якстере. Машинатне кунсолыть эйсэнзэ!
Лоткасть кшнинь кенкш икелев. Машинась бибикстась-тейсь, ортась панжовсь ломантеме. Те седеяк абунгавтызе цёрыненть.
— Вана пачкодинек, цёра. Ней те — тонь эрямо кудот, тейтертне ды цёратне — сазорот-ялаксот, — лекстясь ильтицязо.
Секе чистэнть интернатсо стявтозельть стройс весе группатне. Илькань ливтизь весень икелев, ды рузавась, кона ускизе, мерсь:
— Цёрынеть ды тейтернеть! Тыненк сась од ялга, лемезэ Шукшпря... Вай, нолдынк чумом, лемезэ Илюша. Тееведе тензэ паро оякс. Кадык сон карми ловомо эсь прянзо прок чачома кудосо.
Те яволявкстонть мейле Илюшань перька кармасть чарамо од ялганзо ды кевкстнеме, кинь мезе талновты.
— Мекс тонеть васня мерсть Шукшпря?
— А содан, — кепединзе лавтовонзо Илька, — те лемсэнть веленек тень мереть.
— Ванодояк, шукшпря рузокс — помойка, — мерсь цёрынесь ды колмоксть сельгсь цёрыненть лангс.
Те чистэнть саезь Илюша эзизе марсе эсь лемензэ, конасо тензэ мериль бабазо.
Ульнесть эйкакшонь кудосонть паро ялганзояк, ансяк пельсть налксеме цёрыненть марто Паша Сыровонь пингстэ, конань сельме удалга лемдизь Промокс.
Ильканень арасель кодамояк эрямо Промодо. Ков а моли, Промо яла вакссонзо. Валсояк покордасы, мокшнанзонк нолдасынзе. Урядамо, пенчень-ваканонь шлямо, баня уштомо свал понгиль Шукшпря.
Зярыяксть орголесь. Ды ков туят? Конёвтомоль. Милиционертнэ кундасызь — мекев интернатов.
Недлячива эйкакштнень сайнилизь клубов, кинонь ваномо.
Промо ялганзо марто икелест аштиця тейтерькатнень, кода свал, кармась ноцковтнеме пулодо. Шукшпря эзь кирдеве, стясь таркастонзо, мольсь Промо ваксс ды кодак лоштясы! Тона эзь учнеяк, мик новольсь стулонть лангсто. Стясь, чукадизе панаронзо, кундась Илькань мештес, ды кавонест, теке псакат, кармасть кеверькшнеме пулев масторганть.
Физкультурань ветицясь истя кундынзе кавонест пиледе, цёркатне мик урнозевсть.
— Вана тень нолдынк. Сон монь кисэ вал каясь, — энялдозевсь вейке тейтересь Шукшпрянь кисэ.
Тонавтыцясь нолдызе Шукшпрянь.
— Сюкпря ёвтак Ленанень. Ваканонь шлямо тонгак понговлить, кодаткак кинот авольть уле, — тандавтызе Илюшань.
Кинось мольсь. Эзь фатяяк Шукшпря, кода Лена сась ваксозонзо.
— Мон содаса тонь леметь, — мерсь тейтернесь.
— Содасак... Кие а содасы монь лементь... — нолдызе прянзо Шукшпря.
Тейтерькась мизолдозевсь:
— Тонь леметь Илюша.
Илюшань натой сельведензэ тусть. Умок истя тензэ эзь мерекшне.
Лена полавтызе Илюшань эрямонзо. Ней сынь свал вейсэльть. Лена лезды Илюшанень уроконь анокстамсто — сон паро тонавтниця. Ламолгадсть ялганзояк, Промонь эйстэ кармасть тукшномо. Тона яла вешнесь, кода покордамс цёрыненть.
Интернатсо пурнасть покш промкс.
— Вечкевикс эйкакшт! — ушодызе сонзэ Вера Николаевна, эйкакшонь кудонь прявтось. — Течи туить эсест      чачома-касома кудосто ниленьгемень цёракайть ды тейтерькат. А сёпса, стака ульнесь мартонк, минь тынк туртов ульнинек тетякскак, авакскак. Кеман, тынь мусынк эсенк кинк. Паро эрямо тенк!
Цяпамотне ульнесь чурот, весе содасть, теде мейле воспитательницатне теить киштемань-морамонь чокшне. Физкультурань ветицясь кевкстинзе, паряк, кияк ёвты меельце вал туицятнень пельде. Лиссь Лена ды ушодсь:
— Мон пек кенярдан: туян тестэ. Кода парсте авольть корта кудодонть, сон аволь эсень. Ды кодат авольть уле тонавтыцятне, воспитательтне, сынь зярдояк а полавтсызь тетянок-аванок.
Те шкане Илькань мельс ледсь, кода сонзэ саизь, кода бабазо ёматотсь пуленть потс...
  Чувтотне ульнесть озавтозь теке пикс вельде — весе вейкеть, валанят. Зняро чувтот! Эрьванть эсензэ эрямозо. Мерят весе мазый артовкстнэ ушодовсть те парконть эйстэ. Весе сакшныльть тей, сэтьме экшесэнть оймсеме. Ютат эзганзо, мерят одс чачат. Весе сэредьксэть-ормат чувтотне эстест сайсызь. Потстонзо лисят прок ансяк чачозь эйде.
Эзементь лангсо озадольть Лена ды Илька. Ванность документэст, конатнень максызь интернатсто. Ней сынь покш ломанть. Вечкемадо кортнематне меельце чокшнестэнть арасельть, истякак неявсь вановтстост.
Молить сынь паркканть, кецить мазычинтень, чалгить истя — вейкеяк цеця аволь понго пильгалост. Истя эрси ансяк вечкицятнень.
— Лена, кода арсят, сыре патят кенярды эйзэть? — кевкстизе цёрась.
— Кода эно! Учи эйсэнь — а учован.
— Монгак, ансяк сован кудонтень, серьгедян: «Бабай, сынь! Мекс столесь апак пурна?».
Кавонест, вейкест-вейкест лангс варштазь, мизолдозевсть. Ды уцяскав шкастонть Илькань турванзо педязь педясть тейтеренть турватнес. Васенце паламо! Пси вечкема! Эх, од пора, од пора!
  Ансяк эрямосонтъ лисни истя, кода а арсяткак. Илька ильтизе Ленань, велявтыксэль вокзалов, кода маризе удалдо содавикс вайгеленть:
— Мезе, жених, ильтявсь Ленат? Аламодо эзинек кенере, Ленаткак...
Илька кепедизе прянзо — икелензэ аштесь Промо. Тонась пееньпачк ёртсь тензэ:
— Шукшо, эйсэть учи кияк?
— Учи, — мерсь цёрынесь, — бабам учи. — Вайгелезэ калгодкстомсь.
Промо мизолдозевсь:
— А пек васоло ули почта, азё макст телеграмма, тердик бабать, кадык калмамо сы, прякат уски, а минь сэвсынек. Тувако Ленаньгак тердик. Эно ки карми кандолазтнэнь икеле цецяпусмонь кандомо?
Весе раказевсть. Шукшпря сювордынзе кедензэ ды ёртовиксэль Промо лангс, кода удалдо каятотсь вайгель:
— Шпанат! Тынь тюремат вешнетядо? Кудов! Нейке кудов, нолготулот!
Чиезь тусть кие ков. Ансяк Шукшпря кадовсь тарказонзо.
— Тон мекс ковгак а ношкстат? — кевкстизе цёраломанесь.
— Монень а ков молемс. Тесэ кудом арась, автобусось велев сырги ансяк ванды.
— Хм... Мон эрян а пек васоло. Адя инжекс, бути ули мелеть. Ансяк вант, мезеяк зепезэть иля стувто. Весть кода-бути сан чокшнень рейсстэ — тейтерька озадо крильцялангсо, аварди. Мекс лайшат, кевкстнян. Тона прок ведь кургозонзо каясь. Саия кудов, чайде симдия. Валске марто ёматотсь часон марто...
Миша лелясь эрясь ламо этажонь ашо кудосо. Совась лифтс, лепштизь котоце номерэнть.
Зярдо совасть квартирас, Илюшканень марявсь, сон таго понгсь эйкакшонь кудос: койкадо башка потстонзо мезеяк эзь нее.
«Секскак тейтересь веенст част салась», — ютась Илькань прява.
— Монсь масторов каян фуфайка, тон таркас мадть.
Удомась Ильканень кодаяк эзь педя. Миша леляськак секе- тев кевкстнесь цёрыненть, кие сон, костонь.
Илька ёвтнесь, ёвтнесь ды эзизе маряяк, кода матедевсь. Онстонзо неизе бабанзо. Тона ашо руцясо, кши-сал марто вальмало ашти. Кевкстнить эйсэнзэ велень эрицятне:
— Кодамо чись течи, Олдай баба? Мекс истя наряжить?
— Сех покш чись течи — Илюша сы.
Тарцк тейсь Илька, кармась пурнамо-сэрнямо.
— Ков истя, зоря марто? Удок!
— Сюкпря теть, Миша леляй. Сак инжекс тенек велев. Эряви пурнамс, бабам учи.
— Сестэ мезть... Хлопадик кедеть паро цёракс.. Ужо аламос. Казне максан бабать туртов. Вана нинть пацязо лиядсь, вестькак эзизе сюлмсе, царства небесной тензэ... Азё, капшак. Мезеяк арась седе паро, зярдо эйсэть учить. Мон уш колмошка иеть… — кудазорось озась столенть пес, нолдызе шержев прянзо.
— Азё, Илька. Азё, иляк калавто седеем.
Вана эчке палманенть эйс чавозь лазось, косо сёрмадозь веленть лемезэ. Лемеськак уш а неяви: олась.
Автобусось лоткась веленть пес. Цёрась валгсь. Моли велеванть прянь кепедезь. Эрицятне ваныть мельганзо, тошксить мезде-бути эсь ютковаст. Седеезэ зуйк мерсь: пачкодсь Олдай бабань кудонзо ваксс. Илька таргизе зепестэнзэ пацянть. «Сован, састыне каяса бабань лавтовонзо ланга», — арсесь Илька.
Крильцялангсо нардтнинзе пильгензэ, каштмолезь совась кудыкелев, панжизе кудокенкшенть — кудосонть а куш-а каш.
Эзизе маряяк, кода кудонтень совась Агай баба, шабраст.
— Кият тон? Мезекс совить чаво кудонтень? — кевкстсь тона.
Илька кепедизе прянзо.
— Вай, Илюша, пачкодить... Эзить учово бабать туртов. Кулоськак тонь учозь. Вана, вальманть эзга новольсь...
Теке чистэнть якасть калмазырев. Агай баба невтизе, косо Олдаень калмозо.
— Олдай, дугинем, ванык, кода цёрат кассь-кепететсь. Сон эзинзить стувто, эзь ёма стяко кастомат.
Калмолангсто Илька кевкстизе бабанть:
— А мекс минек кудонть кенкшензэ, вальманзо эзинк чаво лазсо?
— Куломадо икеле Олдай кармавтсь истя. Кадык, келя, кудось свал панжадо учи Илюшань эйсэ.
— Сюконян модас теть, Агай баба. Вана казне теть. Саик, — Илька венстизе тензэ пацянть.
Илька кадовсь эрямо велес. Важодсь ракшань андыцякс, чокшне тонавтнесь трактористэкс. Шкань ютазь макссть тензэ трактор. Зярдо арды калмазыренть вакска, лотки ды ваны, прок бабанзо бажи неемс — сельмензэяк копачавить сельведьсэ.
Свал ледстни Ленадояк, учи пельдензэ сёрмат. Иеде ламо сёрмалить вейкест-вейкест туртов. Почтань кандтницясь, Вера, яла ракси лангсонзо:
— Ансяк тонь лангс важодян, Илья Семёнович. Пандт аламошка!
Цёрась ливтнезь ливтнесь тейтеренть сёрматнеде. Юткошкасто таргасынзе, адя педе-пев ловномост.
Ансяк кенярксось а кувакаль. Ней якси важодема таркав прянь нолдазь, мерят аволь Илькаяк. Кевкстнить эйсэнзэ, мезе теевсь, сон ансяк чатьмони. Теде соды Верка почтальонкась ськамонзо. Сёрмат Ленань пельде уш кавто ковт арасельть.
Недлячистэ, кудоютконь тевтнень теемадо мейле, Илька таргизе Ленань сёрманзо ды одов кармась ловномонзо: «Вечкевиксэм! Монь вечкевиксэм!..». Неть валтнэде сельметькак конявить, ды ансяк маряви, кода инзейсэ качадыця лембе вармась палси ды кутмори рунгот...
— Илька! Илька! — те Верань, газетань кандтницянть, вайгелезэ. — Тонеть телеграмма.
Илька кода аштесь, истяк палманекс каназкадсь прок. «Кодамояк апаро тев Лена марто?..»
— Тон мекс амариця пангокс теевить? — Бойка Вера чийсь Илька ваксс ды венстизе телеграмманть.
«Вечктян. Вастомак. Лена».
Кенярсонь пачк Илюша кепедизе Верань ды веляськадсь мартонзо.
Агай баба озадоль крильцяпесэ ды кургонь автезь вансь Илькань лангс.
Цёрась совась пирес ды сезнесь цела берёма цецят.
Лиссь ушов Яков атяяк, кармась прясонзо чаравтомо:
— Илькань шкава, бувала, симан колмошка цяркат, ды козоньгак тень а токи, а сон цецинеть пурны, световод, прах саезэ!
  Вана уш автобусонь лоткамо таркась… Цецят… Пси палсемат… Уцяскав сельведть…
Кавто вечкиця седейтне вастовсть…
Кудов мольсть апак капша, луга потмова. Ледстнесть эйкакшпоранть, ошонть…
Аволь пек васоло марявсть вайгельть.
— Шукшпря, Шукшпря! — пижнесть эйкакштне прянь нолдазь молиця вейке цёрыненть мельга.
Зярдо неизь Ленань, орголесть кие ков. Икелест лиядсь ансяк се пакшинесь, конань лангсо нарьгасть.
— Мекс теть истя мерить?
— А содан.
— Косот тетят-ават?
— А содан. Мон умок уш ськамон эрян.
Лена варштась Илька лангс: те эрямонть ютызь сыньгак.
— Эно мон туян. Костояк вешнема удома тарка. Чокшнетне экшелгадсть, — ды цёрынесь варяв понкссонзо сыргась седе тов.
— Шукшпря! — серьгедсь Илья. — Тракторсо ардтнеме ванды молят?
— Молевлинь, бути сайсамак.
— Сестэ адя инжекс. Ванды пиже зорява стяма тенек.