Седей талновкст

* * *
Килеенть керизь валскень зорява — илязо тока электричествань уськтнес. Керизь вечкема чувтом, конань марто касынь-кепетинь…
Ловонь кондямо ашо рунгостонзо лиссть эрексиянь ванькс байгинеть. Неть ульнесть килеенть сельведензэ. Мон саия вейке истямо байгиненть коморозон, совавтыя кудов. Аламо шкань ютазь сон сезевсь ды келемсь. Монень марявсь, сезевсь седей ризкстэнть…

  * * *
Тейтересь пек мазыель. Мартонзо вастневинек ансяк ков. Мейле ульнесь свадьбанок…
Ковонь ютазь явинек. Ялган, содавиксэнь дивсесть-абунгалесть: истямо мазыйка ёмавтынь.
Сынь, нама, эзть сода: чамань мазычиде башка ломаненть улезэ оштё вейке мазызэ. Сонзэ лемезэ — оймень мазычи…

* * *
Мон аштинь икелензэ кумажа лангсо, сон — стядо. Вечкевиксэм варштась сельмезэнь.
—  Зяроксть истя аштить эрямот перть? — кевкстимим.
—  Колмоксть. Васенцеде, зярдо армиясо присяга приминь. Омбоцеде — аванень чачома чистэнзэ цецят сезнинь. Колмоцеде — вана…
Сонгак новольсь кумажа лангс, кутмордымим ды мерсь:
—  Мон — васенцеде ды, нама, меельцеде.

  * * *
Мекс-бути саинь мель сёрмадомс шабра бабадонть, кона кулось чаво кудос. Озынь — жалямонь валдо башка сёрмадомс а мезе. Сонензэ те ней эзь эряво.

  * * *
Кодат ламо тюсонь неть ярмункатне! Течияк молинь тов. Ды, кемтядо-арась, весе тюстнэ монь туртов ёмасть, зярдо неия, кода вейке эчке цёраломанесь микшнесь киска левкст. Пильгалонзо аштесь пиштякатнень аваст ды сельведев сельмсэ ильтясь эсензэ левкстнэнь. Эрьвасонть ульнесь эрямозо, ансяк кияк эзь снартне теде содамс…
Кортыть: кискась ломанень ялга… Арази ялгат микшнить?

  * * *
Авань праздниктенть икеле монень мерсть сёрмадомс сындест. Васня шождаль: анокстынь ванькс конёв, ручка. Мейле...
Недлянь ютазь сёрмадовксось путозель редакторонть столензэ лангс. Тонань натой кургозояк автевсь, зярдо кувака сёрмадовксонть таркас икельдензэ неизе конёв листкес тешкстазенть:
«Вай, ават!!!»

* * *
Парксо оймсинь эземне лангсо, ваксозон озась цёрыне. Кедьсэнзэ кирдсь мороженой.
—  Леляй, мороженойденть седе тантей мезеяк арась. Ёвтык, мезесь сехте корсяня-чапамо?
«Порцька, сал, горчица...» — лован эськан. Ды сеске ледсь мелезэнь эйкакшпингем. Текень мельга весемесь уезевсь пряпотмован: веле, вирь, ташто кудонок, авам. Ужока…
—  Моданть лангсо сехте чапамот авать сельведензэ.
—  Мон весементь чарькодия. Сюк теть, леляй, — мерсь цёрынесь ды ношкстась эсь кияванзо.
—  Ков тон? Ужо! Лоткак!
«Про-стя-монь веше-еме!» — кандынзе пилезэнь сонзэ валтнэнь стамбарнэ пувиця ялткесь.